1 TIMOTE 4 - Bibəl ta Sar̄

Ngé ndóō de gə̄ yá̰á̰ kə́ rɔ̄kum aĺ gə̄

¹ Banī Ndíl əda wáńg na ta ngóy ndɔ̄ gə̄ tə́ anī, de kə́rēý gə̄ a əya̰n̄ taā kem kɔ̄ɔ́, yā kəhɔń gō ndíĺ kə́ ngé gól̄ de gə̄ ō, gō yá̰á̰ ndóō yā ndíĺ kə́ majaĺ gə̄ ō.

² Nin̄ a ndúmə̄n̄ sɔɔ̄ń najə̄ kə́ sor̄ yā ngé gól̄ loo gə̄. Ngé gól̄ loo gə̄ ngeé ń toō ní, dan wurdə́ i kə́ magə́rā kɔ̄ɔ́, tītə̄ kə́ əlan̄ gində̄ horoó adə̄ kərē tá əndān̄ tū tə́ beē.

³ Nin̄-ɔgə̄n̄ de gə̄ taā naā ō, ɔgə̄n̄ ngé taā kem gə̄ ń gerə̄n̄ najə̄ kə́ rɔ̄kum ní, kəsa yá̰á̰ kə́rēý gə̄ ń Nə́ɓā rāā kadə̄ əsan̄ kə ndadāá ní ō.

⁴ Tɔdɔ̄ yá̰a̰ malang ń Nə́ɓā rāā ní i kə́ majə, adə̄ ré deē əsa kə ndadāá anī, kógə̄ḿ kə́ yā kadə̄ deē mbātə́ gətóo.

⁵ Tɔdɔ̄ yá̰a̰ gə̄ ní télən̄ yá̰á̰ kə́ ɔrə̄n̄ kam̄də́ tayā kɔ̄ɔ́, kə ta kūl̄ najə̄ yā Nə́ɓāá ō, kə ta kūl̄ ndɔ̄ȳ ō.

Nge rāā kəla yā Jeju Kərist kə́ majə

⁶ Ré ɔ́jə́ ngákó̰ó̰í gə̄ yá̰a̰ gə̄ ń toō anī, ḭ̄ i nge rāā kəla kə́ majə yā Kərist Jeju, kə́ ulīn̄ kə najə̄ gə̄ kə́ dɔ taā kem tə́ ō, kə yá̰á̰ ndóō kə́ majə ń ún gō ní ō.

⁷ Banī ī-mbātə́ kɔr̄ súū kə́ to mbóo gə̄ ń i najə̄ kə́ kanjə̄ kumən gə̄ yā ɓə́ga dəyá̰ gə̄ ní. Ī-ndóō rāā yá̰a̰ kə gō ń Nə́ɓā ndigə ní.

⁸ Tɔdɔ̄ ndóō kənī gambəla i yá̰á̰ kə́ majə, ba i tām̄ yā yá̰á̰ kə́ ngá̰ý aĺ tə́. Banī ndóō rāā yá̰a̰ kə gō ń Nə́ɓā ndigə ní, i yá̰á̰ kə́ majə tām̄ yā yá̰a̰ gə̄ tə́ malang. Tɔdɔ̄ Nə́ɓā ənī míndən tāmən tə́. Ba míndən ń ənī ní, i tām̄ yā ndi kə kumuú kə́ ngɔr ń toō tə́ ō, kə́ ndɔ̄ń tə́ ō.

⁹ Najə̄ ń toō i najə̄ kə́ rɔ̄kum kə́ to kadə̄ de gə̄ taān̄ kem kə taá malang.

¹⁰ Tɔdɔ̄ ré jə-rāāī kəla ngá̰ý ō, jə-rɔ̄ɔ̄ī ō anī, i tām̄ kəndā kə́ j-əndāī kemjí dɔ Nə́ɓā ń ndi kə kumneé tə́ ní. Ni i nge kajə de gə̄ malang, ba kə́ ngá̰ý ɓáa ni a ajə i ngé taā kem gə̄.

¹¹ Yá̰á̰ ń kadə̄ ə́da de gə̄ kadə̄ rāān̄ ō, ī-ndóōdə́ ō ní n noó.

¹² Ādə̄ deē kídī tām̄ ḭ̄ kə́ i ngōn̄ kə́ balsáá ɓáý tə́ alé. Ba ādə̄ loo kɔr̄ najə̄ tə́ ō, loo rāā yá̰á̰ tə́ ō, loo táŕ tə́ ō, loo taā kem tə́ ō, loo rāā háĺ kə́ unjə̄ njáý njáý tə́ ō ɓáa, ḭ̄ i yá̰á̰ ndájə̄ tām̄ yā ngé taā kem gə̄ tə́.

¹³ Ə̄ndā rɔ̄í ta tə́da makətūbə̄ tə́ ō, ta kɔjə de gə̄ najə̄ tə́ ō, ta ndóōdə́ yá̰á̰ tə́ ō, bátə́ kadə̄ m-ūgəń.

¹⁴ Yá̰á̰ ń Nə́ɓā adī karī, kə ta kūl̄ najə̄ kə́ ni-əndā ta ngé koō ta yān gə̄ tə́ adə̄ ədan̄ tām̄ yāí tə́ ní ō, kə ta kūl̄ kəndā kə́ kum kɔ̄ɔ́ gə̄ əndān̄ jīdə́ dɔí tə́ ō ní, ī-lōō kídə̄ yá̰á̰ ní.

¹⁵ Yá̰á̰ ń kadə̄ ī-rāā ní n noó, ə̄ndā rɔ̄í ta tə́. I loo ń noō tə́ n de gə̄ malang a gerə̄n̄ kaw̄ kum kə̄ kété yāí ní.

¹⁶ Ə̄ndā kumií gír rɔ̄í īkɔ́ tə́ ō, gíŕ yá̰á̰ ndóō yāí tə́ ō. Ə́hɔ rɔ̄í tɔgə tū yá̰a̰ gə̄ ń noō tə́. Loo ń ré ī-rāā beé anī, ā ájə rɔ̄í īkɔ́ ō, ā ájə́ ngé gə̄ ń oōn̄ najə̄ taí tə́ ní ō.