1 TIMOTE 3 - Bibəl ta Sar̄

Ngé kɔr no ngé kán̄ naā gə̄

¹ Najə̄ ń toō i najə̄ kə́ rɔ̄kum kə́ to kadə̄ deē taā kem. Ré deē sāā kəla kɔr no ngé kán̄ naā gə̄ anī, gḛy i kəla kə́ majə.

² Adə̄ majə kadə̄ ni i de kə́ najə̄ gətóo dɔn tə́ ō, nə̄yá̰n i kógə̄ḿ beē ō, ni i de kə́ nge kəhɔ rɔ̄n dɔ yá̰á̰ tə́ ō, nge rāā yá̰a̰ kadə̄ mān̄ dɔ loon aĺ ō, i de kə́ de gə̄ a rɔȳnən̄ ō, i de kə́ nge kəhɔ de gə̄ kə̄ rɔ̄n tə́ majə ō, kə́ ger̄ loo ndóō de gə̄ yá̰a̰ ō,

³ i de kə́ nge rāā ɓəlo kasə aĺ ō, nge rɔ̄ɔ̄ de gə̄ aĺ ō, banī ni i de kə́ hálən sɔl̄ lɔm ō, nge kɔ̄l̄ kə de gēé aĺ ō, rāā ta nar aĺ ō,

⁴ ger̄ loo kɔr no de kə́ kem kújə yān tə́ gə̄ majə ō, ger̄ loo rāā kadə̄ ngánən gə̄ oōn̄ tan majə ō, ɓōlə́n̄ ndílən ō.

⁵ Tɔdɔ̄ deē ń ger̄ loo kɔr no de kə́ kem kújə yān tə́ gə̄ alé ní, a a̰a̰ gō Egəlijə yā Nə́ɓā i ba̰ý?

⁶ Kadə̄ ni i de kə́ taā kem ngɔr ɓáý alé, na sōgə́ kɔjə rɔ̄ kə́ kemən tə́ rāā adə̄ Nə́ɓā gān̄g sarya dɔn tə́ tītə̄ ń gāngəń dɔ diabəl tə́ ní.

⁷ Tá ɓáý to̰ ní, majə kadə̄ de kə́ ndágá gə̄ ədan̄ najə̄ yān majə, na sōgə́ de gə̄ kídə̄nən̄ ō, əsō kum gūmbə̄ yā diabəl tə́ ō.

Ngé rāā kəla nə̄ɓō yá̰a̰ gə̄

⁸ Ngé rāā kəla nə̄ɓō yá̰a̰ gə̄ ní, yādə́ i tītə̄ ń noō ō. Ādə̄ nin̄ i de gə̄ kə́ de gə̄ rɔȳn̄də́ gə̄ ō, nin̄ i ngé míndə jōó aĺ gə̄ ō, ngé ka̰ȳ kasə ngá̰ý gə̄ aĺ ō, ngé sāā kənge yá̰a̰ kə ta róbə́ kə́ gō tə́ aĺ gə̄ alé ō.

⁹ Kadə̄ nin̄-ngɔ̄mə̄n̄ yá̰á̰ ń taā kem teē kumjí dɔ tə́ ní, kə gír̄ kə́ unjə̄ njáý njáý.

¹⁰ Kadə̄ nāān̄də́ pá tá, ré najə̄ gətóo dɔdə́ tə́ anī, əndān̄də́ ngé rāā kəla nə̄ɓō yá̰a̰ gə̄ tə́ ɓáý.

¹¹ Yā dəyá̰ gə̄ i tītə̄ ń noō ō, ādə̄ nin̄ i dəyá̰ gə̄ kə́ de gə̄ ɓōlə́n̄ ndíĺdə́ ō, nin̄ i ngé tām̄ kə de gēé aĺ ō, ngé kəhɔ rɔ̄də́ dɔ yá̰á̰ tə́ gə̄ ō, ādə̄ nin̄ i ngé ra dɔ ndūdə́ tə́ gə̄ tū yá̰a̰ gə̄ tə́ malang ō.

¹² Ādə̄ nge rāā kəla nə̄ɓō yá̰a̰ i de kə́ nə̄yá̰n i kógə̄ḿ beē ō, ger̄ loo kɔr no ngánən gə̄ ō, de kə́ kem kújə yān tə́ gə̄ ō majə.

¹³ Tɔdɔ̄ ngé gə̄ ń rāān̄ kəla nə̄ɓō yá̰a̰ majə ní de gə̄ rɔȳn̄də́ ō, asən̄ kənī kemdə́ kɔrə̄ń najə̄ kə́ dɔ taā kem ń ɓoojí naā tə́ kə Kərist Jeju ní ō.

Yá̰á̰ kə́ to loo mundə̄ tə́ kə́ bo ngá̰ý

¹⁴ m̄-ndang yá̰a̰ gə̄ ń toō m-ādī, ɓá tā ba m̄-gír̄ kaw̄ gōí tə́ ngɔr.

¹⁵ Ba ré m-ɔ́r bā̰ā̰ ɓáý anī, i beé n ā ī-gerə̄ń háĺ kə́ yā rāā kem kújə yā Nə́ɓā tə́ ní. Kújə́ ní i Egəlijə yā Nə́ɓā kə́ ndi kə kumneé. I nin̄ malang n i ngé kəhɔ najə̄ kə́ rɔ̄kum dɔɔ́ ō, ngé kɔsə kíl najə̄ kə́ rɔ̄kum ō ní.

¹⁶ Rɔ̄kum, yá̰á̰ kə́ to loo mundə̄ tə́ ń taā kem adə̄jí ní, i yá̰á̰ kə́ bo ngá̰ý. Kərist tél deē, ɔjəń rɔ̄n kə̄ ndágá adə̄ de gə̄ a̰a̰nən̄, Ndíl kə́ Táĺ teē kum de gə̄ dɔ tə́ kadə̄ ni i de kə́ gōtə́ ō, de kə́ dɔ rā̰ tə́ gə̄ a̰a̰nən̄ ō, de gə̄ ənīn̄ mbēr̄ najə̄ yān dan gíŕ nápar de gə̄ tə́ ō, de gə̄ taān̄ kemən dɔ nang tə́ laā ō, ɔsənən̄ kə̄ dɔɔ́ ɔsən̄neé gɔnən ō.