1 TESALONIK 3 - Bibəl ta Sar̄

¹ Loo ń noō tə́ ní, j-asə tə́gā tají to̰ alé, adə̄ jə-gír̄ kadə̄ kə́ só tə́ i kadə̄ jə-ndi Aten kə kéŕjí,

² ba ngōkó̰ó̰jí Timote ń i nge rāā kəla naā tə́ kə Nə́ɓāá loo kɔjə Najə̄ kə́ Majə yā Kərist tə́ ní, j-əlan kadə̄ aw̄ mbūsə̄sí ō, adə̄sí tɔ́gə loo taā kem yāsí tə́ ō.

³ Yā kadə̄ yá̰á̰ kə́ tōr̄ gə̄ ń a rāān̄jí toō, ɔr̄ tɔ́gə deē kógə̄ḿ dansí tə́ alé. Tɔdɔ̄ sḭḭ̄ kɔ́ gə̄ ī-gerī kadə̄ Nə́ɓā əndā dɔ yá̰á̰ ń noō danaá kɔ̄ɔ́ ɓá tām̄ yājí tə́,

⁴ adə̄ dan ń jḭḭ i sesí ní, jə-tāāsí kété j-əda na yá̰á̰ kə́ tōr̄ gə̄ na a rāān̄jí. I yá̰á̰ ní n rāā yá̰a̰ adə̄ ī-gerī majə ní.

⁵ I tām̄ ń toō tə́ n m-ásə́ tə́gā taḿ to̰ alé, adə̄ m-ə́la Timote kadə̄ oō najə̄ kə́ dɔ taā kem yāsí tə́ ní. m̄-ɓōĺ kadə̄ Nge Nāā de gə̄ nāāsí, yā kadə̄ j-ɔr sesí i ndāńg karī.

⁶ Ba ngɔlaā ní, Timote ḭḭ rɔ̄sí tə́ tél ugə̄ rɔ̄jí tə́, ədají najə̄ kə́ majə kə́ dɔ taā kem yāsí tə́ ō, tár yāsí tə́ ō. Ədají na ī-gírī dɔjí tə́ majə ngándáńg ō, ngur ka̰a̰jí na rāāsí tītə̄ yājí ō.

⁷ Adə̄, ngákó̰ó̰jí gə̄, taā kem yāsí rāā adə̄ kemjí tetə kə̄ nang tə́ dan yá̰á̰ kə́ to ɓōĺ gə̄ tə́ ō, yá̰á̰ kə́ tōr̄ gə̄ tə́ ō.

⁸ Adə̄ ngɔlaā ní jə-tél jə-ndi kə kumjí gogə́, tɔdɔ̄ ī-raī ngan̄g loo ɓoo naā yāsí kə Kɔ́ɔ̄ɓēé.

⁹ Rɔ̄nel̄ malang ń j-ənge tām̄ yāsí tə́ ní, j-a jə-rāā i ba̰ý n j-a jə-ndadə̄ń Nə́ɓā kadə asə gō tə́ ní?

¹⁰ Ndɔ̄ɔ́ gə̄gē, kadaá gə̄gē ní, yá̰á̰ ń jə-dəje Nə́ɓā kə ngangāá ngá̰ý ní n toó: I kadə̄ adə̄jí ta róbə kadə̄ jə-tél j-a̰a̰ī naā gogə́ ō, kadə̄ j-adə̄sí yá̰á̰ ń gətóo tū taā kem yāsí tə́ ní ō.

¹¹ Kadə̄ Bɔbə̄jí Nə́ɓā nəkɔ́ ō, Kɔ́ɔ̄ɓē yājí Jeju ō, ndɔ́rə̄n̄jí ta róbə aw̄n̄neé sejí loosí.

¹² Ādə̄ Kɔ́ɔ̄ɓē rāā adə̄ tár yāsí kə́ tām̄ yā naā tə́ ō, tām̄ yā de gə̄ tə́ malang ō, to tītə̄ yājí ń j-aw̄ń tām̄ yāsí tə́ ní.

¹³ Ādə̄ ni-rāā adə̄ kemsí ra ngan̄g, yā kadə̄ sḭḭ̄ i de kə́ táĺ gə̄ ō, de kə́ najə̄ gətóo dɔdə́ tə́ gə̄ ō, ta kum Bɔbə̄jí Nə́ɓā tə́, dan ń Kɔ́ɔ̄ɓē yājí Jeju a reē kə deē yān gēé malang ní. Adə̄ i tītə̄ ń noō!