1 SAMUEL 7 - Bibəl ta Sar̄

¹ Adə̄ de kə́ Kiryat Yearim gə̄ reē unən̄ sandúkə yā Kɔ́ɔ̄ɓē ní aw̄n̄neé. Nin̄ aw̄n̄ kə sandúkə́ ní aw̄ əndān̄ kem kújə yā Abinadab ń ndi i dɔ ngōn̄ mbalá ní tə́. Ba ɔrə̄n̄ ngōn̄ Abinadab ń rīn na i Elajar ní əndānən̄ kə rī ngɔ̄m̄ sandúkə yā Kɔ́ɔ̄ɓēé.

Tetən̄ Pilistin gə̄ rɔ̄ɔ̄. Samuel i ngār kə́ Israel tə́

² Ndɔ̄ gə̄ mānən̄ ngá̰ý gō ndɔ̄ ń əndānəń sandúkə yā Kɔ́ɔ̄ɓē Kiryat Yearim tə́ ní. Ndɔ̄ gə̄ ń mānə̄n̄ ní asən̄ ɓāl̄ kutə jōó pá tá kadə̄ ngán Israel gə̄ əlan̄ gír nōō kə̄ dɔ Kɔ́ɔ̄ɓē tə́ ɓáý.

³ Tā anī Samuel ədadə́ na: Ré ī-tél ī-reēī rɔ̄ Kɔ́ɔ̄ɓē tə́ i kə kemsí malang anī, ɓesə̄ yā tə̄rā gə̄ ō, ɓesə̄ Astarte gə̄ ō, kə́ dɔ dáńsí tə́ ní, ī-ró̰yīdə́ kɔ̄ɔ́ ō, ə́hɔī gō Kɔ́ɔ̄ɓē ō, i ni ngóy n ā ī-rāāī kəla yān ō ní. I loo ń noō tə́ ń ni a ɔr̄sí kɔ̄ɔ́ jī Pilistin gə̄ tə́ ní.

⁴ Adə̄ ngán Israel gə̄ ró̰ȳn̄ ɓesə̄ Baal gə̄, kə ɓesə̄ Astarte gə̄ kə́ dɔ dáńdə́ tə́ kɔ̄ɔ́ ba rāān̄ i kəla yā Kɔ́ɔ̄ɓē ngóy.

⁵ Gō tə́ anī Samuel əda na: Ādī Israel gə̄ kánə̄n̄ naā malang Misəpa na m-ā m̄-ndɔ̄ȳ Kɔ́ɔ̄ɓē tām̄ yāsí tə́ loo ń noō tə́.

⁶ Nin̄ kánə̄n̄ naā Misəpa. Uȳn̄ man̄ ba ɓōkə́n̄ nang tə́ no Kɔ́ɔ̄ɓē tə́. Ndin̄ ɓō tām̄ yā Nə́ɓā tə́ ndɔ̄ ń noō tə́ ba ədan̄ wáńg na n-rāān̄ yá̰á̰ kə́ majaĺ kə Kɔ́ɔ̄ɓēé. Samuel əla gír kɔr no ngán Israel gə̄ i loo ngeé ń noō tə́ Misəpa.

⁷ Dan ń Pilistin gə̄ oōn̄ kadə̄ ngán Israel gə̄ kánə̄n̄ naā Misəpa anī, ngār yādə́ gə̄ aw̄n̄ yā rɔ̄ɔ̄ Israel gə̄. Adə̄ dan ń ngán Israel gə̄ oōn̄ ní ɓōĺ rāādə́ ngá̰ý.

⁸ Nin̄ ədan̄ Samuel na: Ī-lōō ndi taí mbóo ō, kəya̰jí kɔ̄ɔ́ ō. Ī-nōō kə̄ dɔ Kɔ́ɔ̄ɓē Nə́ɓā yājí tə́ ādə̄ ajəjí jī Pilistin gə̄ tə́.

⁹ Samuel əhɔ ngōn̄ batə̄ kə́ ta mba tə́ tɔ̄l̄ ba róō horoó adə̄ Kɔ́ɔ̄ɓē. Gō tə́ anī no kə̄ dɔ Kɔ́ɔ̄ɓē tə́ tām̄ yā Israel gə̄ tə́. Anī Kɔ́ɔ̄ɓē adə̄n yá̰á̰ ń dəjen ní.

¹⁰ Dan ń ra a róō ngōn̄ batə̄ horoó ɓáý ní a, Pilistin gə̄ reēn̄ yā rɔ̄ɔ̄ Israel gə̄. Banī Kɔ́ɔ̄ɓē rāā adə̄ man̄ ndang kə ngangá ngá̰ý dɔdə́ tə́ ndɔ̄ ń noō tə́. Kɔ́ɔ̄ɓē əla ɓōĺ kə́ ngá̰ý kemdə́ tə́ adə̄ a̰ȳn̄ naā no Israel gə̄ tə́.

¹¹ De kə́ Israel tə́ gə̄ teēn̄ kem ɓē kə́ Misəpa tə́ ngɔ̄də̄n̄ Pilistin gə̄. Tɔ̄lə̄n̄də́ bátə́ ugə̄n̄neé gidə ɓē kə́ Bet Kar tə́.

¹² Samuel un mbal̄ kógə̄ḿ udə kə nja dɔɔ́ dɔ dán ɓē kə́ Misəpa kə Hasen tə́ ba əndā rī mbal̄ ní na i Eben Ejer. Kumən na i mbal̄ dḭḭ̄. Tɔdɔ̄ əda na: Kɔ́ɔ̄ɓē dḭḭ̄jí bátə́ ugə̄ sejí loo ń toō tə́.

¹³ Nə́ɓā əla dɔ Pilistin gə̄ nang tə́ adə̄ əndān̄ njadə́ dɔ nang yā Israel gə̄ tə́ to̰ alé. Dan ń Samuel ndiń kə kumneé ɓáý ní, Kɔ́ɔ̄ɓē a rāā yá̰á̰ kə́ tōr̄ kə Pilistin gēé i kə dɔ ndɔ̄ gə̄.

¹⁴ Ɓē gə̄ ń Pilistin gə̄ táān̄ jī Israel gə̄ tə́ adə̄ əla gír i dɔ ɓē kə́ Ekəron tə́ bátə́ ugə̄ń Gat ní, tél reēn̄ gír jī ngán Israel gə̄ tə́ gogə́ malang. Israel gə̄ tél taān̄ dɔ nang yādə́ jī Pilistin gə̄ tə́. Lɔm to dɔ dán Israel gə̄ kə Amor gēé tə́.

¹⁵ Samuel ndi ngār sarya dɔ Israel gə̄ tə́ bátə́ oyń.

¹⁶ Kə dɔ ɓāl̄ gə̄ ń noō ní a njə̄rā a teē Betel ō, Gilgal ō, Misəpa ō, a gāngəń sarya yā Israel gə̄ ń ndin̄ kə gō loo gə̄ ń noō ní.

¹⁷ Pá tá a tél a aw̄ gogə́ ɓēé Rama ɓáý. Tɔdɔ̄ kújə yān i noó ō, a gān̄g sarya yā Israel gə̄ i noó ō, rāā loo tun̄ yá̰a̰ yā Kɔ́ɔ̄ɓē i noó ō.