1 SAMUEL 4 - Bibəl ta Sar̄

¹ Ba najə̄ kɔr̄ Samuel i tām̄ yā ngán Israel gə̄ tə́ malang. Ndɔ̄ kə́rēý tə́ anī ngán Israel gə̄ aw̄n̄ yā rɔ̄ɔ̄ Pilistin gə̄. Nin̄ əndān̄ gérger yādə́ i kadə Eben Ejer tə́, banī Pilistin gə̄ əndān̄ yādə́ i Apek.

Sandúkə yā Nə́ɓā i kem jī Pilistin gə̄ tə́

² Pilistin gə̄ reē ran̄ kə ta naá no ngán Israel gə̄ tə́ yā rɔ̄ɔ̄də́. Rɔ̄ɔ̄ ní reē təngā ngá̰ý. Pilistin gə̄ tetən̄ ngán Israel gə̄ rɔ̄ɔ̄. Nin̄ tɔ̄lə̄n̄də́ asə dūbú sɔ́ loo rɔ̄ɔ̄ ní tə́ bembeé.

³ Ngán Israel gə̄ tél aw̄n̄ gogə́ gérger yādə́ tə́. Anī kum kɔɔ̄ kə́ Israel tə́ gə̄ ədan̄ na: Kɔ́ɔ̄ɓē əya̰ Pilistin gə̄ adə̄ tetən̄jí rɔ̄ɔ̄ ɓōólaā i tām̄ yā rí tə́? J-awī gō sandúkə madə̄ naā yā Kɔ́ɔ̄ɓē tə́ Silo, ādə̄ reē ajəjí jī ngé ba̰ā̰jí gə̄ tə́.

⁴ Ngán Israel gə̄ əlan̄ de gə̄ Silo adə̄ aw̄ reēn̄ kə sandúkə madə̄ naā yā Kɔ́ɔ̄ɓē nge tɔgə yá̰a̰ malang ń ndi dɔ de kə́ dɔ rā̰ tə́ gə̄ kə́ ngé ngɔ̄m̄ loo gə̄ tə́ ní. Ngán Eli kə́ jōó gə̄ ń i Hopəni nin̄ kə Pinas ní, nin̄ i kadə sandúkə madə̄ naā yā Nə́ɓā tə́.

⁵ Dan ń sandúkə madə̄ naā yā Kɔ́ɔ̄ɓē ugə̄ gérgereé anī, ngán Israel gə̄ malang túrə̄n̄ kɔĺ rɔ̄nel̄ kə́ ngá̰ý, adə̄ dɔ nang ndebə.

⁶ Pilistin gə̄ oōn̄ kōō kɔĺ rɔ̄nel̄ kə́ ngá̰ý ní anī ədan̄ na: Kɔĺ rɔ̄nel̄ ń ɓār̄ ngá̰ý kem gérger yā Hebəro gə̄ tə́ noō kumən na i rí? Gō tə́ ɓáa gerə̄n̄ kadə̄ i sandúkə yā Kɔ́ɔ̄ɓē n ugə̄ kem gérgereé.

⁷ Ɓōĺ rāā Pilistin gə̄ tām̄ ədan̄ na: Nə́ɓā kógə̄ḿ reē kem gérger yādə́ tə́. Ədan̄ ɓáý to̰ na: Yá̰á̰ kə́ to kum kaȳ aĺ əsō dɔjí tə́ tɔdɔ̄ kété gə̄ ní i beé alé.

⁸ Yá̰á̰ kə́ to kum kaȳ aĺ əsō dɔjí tə́. I náā n a ɔr̄jí jī nə́ɓā kə́ nge tɔ́gə́ ń toō tə́ ní? I nə́ɓā ń tə̄ndā de kə́ Ejiptə gə̄ kem dəla loo tə́ kə ndéý kə́ tayā tayā gə̄ ní.

⁹ Pilistin gə̄, ə́hɔī rɔ̄sí tɔgə. Ī-raī dəngam, na sōgə́ ī-rāāī ɓəlo yā Hebəro gə̄ tītə̄ ń nin̄ rāān̄neé ɓəlo yāsí kété ní. Ī-raī dəngam ba ī-rɔ̄ɔ̄īdə́.

¹⁰ Pilistin gə̄ əlan̄ gír rɔ̄ɔ̄ ngán Israel gə̄. Nin̄ tetən̄də́ rɔ̄ɔ̄, adə̄ ngán Israel gə̄ a̰ȳn̄ naā kógə̄ḿ kógə̄ḿ kə̄ ɓē yādə́ gə̄ tə́. Rɔ̄ɔ̄ ní rāādə́ ngá̰ý. Dan deē yādə́ gə̄ tə́ ní, ngé kə́ kə njadə́ gə̄ ń tɔ̄lə̄n̄də́ ní asən̄ dūbú kutə mətá.

¹¹ Sandúkə yā Nə́ɓā i kə́ kun kɔ̄ɔ́ ō, ngán Eli kə́ dəngam kə́ jōó gə̄ ń i Hopəni nin̄ kə Pinas ní oyn̄ ō.

Eli nge tun̄ yá̰a̰ oy ō, umən kə́ dəyá̰ oy ō

¹² De kógə̄ḿ kə́ gír ɓē yā Benjamḛ tə́ a̰ȳ ta rɔ̄ɔ̄ tə́ aw̄ ugə̄ Silo ndɔ̄ nəkɔ́ ń noō tə́. Kūbə̄ kə́ rɔ̄n tə́ i kə́ rə́yā̰ kɔ̄ɔ́ ō, dɔn i bumbə́rú malang ō.

¹³ Dan ń ni ugə̄ ní Eli ndi i kadə róbə́ tə́ dɔ kāgə̄ ndi yān tə́. Ndi a um̄ i ta róbə, tɔdɔ̄ kemən sōl̄ ngá̰ý najə̄ yā sandúkə yā Nə́ɓā tə́. Deē ní reē əda de kə́ kem ɓēé gə̄ yá̰á̰ ń rāā yá̰á̰ ní, adə̄ de kə́ kem ɓēé gə̄ malang nōōn̄ naā.

¹⁴ Eli oō sɔ̄ḿ ní anī əda na: Kum sɔ̄ḿ ń kósə de gə̄ ń toō a sɔ̄mə́n̄ ní na i rí? Deē ní reē kə nāgá kəda Eli najə̄ ní tə́.

¹⁵ Ba dan ngeé ń noō tə́ ní ɓāl̄ Eli i kutə ndōhó gidə i sɔ́sɔ́. Kumən ra ro ba a̰a̰ loo to̰ alé.

¹⁶ Deē ní əda Eli na: I mā n m-ḭ́ḭ ta rɔ̄ɔ̄ tə́ ní. M-ā̰ȳ ta rɔ̄ɔ̄ tə́ i ɓōólaā nəkɔ́ ń toō. Eli dəjen na: Ngōnə̄ḿ, i rí n rāā yá̰a̰?

¹⁷ Ni-tél ədan na: Ngán Israel gə̄ a̰ȳn̄ naā no Pilistin gə̄ tə́. Rɔ̄ɔ̄ rāādə́ rāā kə́ majaĺ ngá̰ý. Tá ngání kə́ jōó gə̄ ń i Hopəni nin̄ kə Pinas ní oyn̄ ō. Sandúkə yā Nə́ɓā ní unən̄ kɔ̄ɔ́ ō.

¹⁸ Dan nəkɔ́ ń əda rī sandúkə yā Nə́ɓā anī, Eli ḭḭ dɔ kāgə̄ ndi yān tə́ əsō kə gōneé ta róbə́ kújə́ tə́, gár gōn tɔ̄ɔ̄ yɔ́k yɔ́k adə̄ oy. Tɔdɔ̄ ni i de kə́ tɔgə ō, ɔȳ ngá̰ý ō. Ni-ndi ngār sarya dɔ ngán Israel gə̄ tə́ i ɓāl̄ kutə sɔ́.

¹⁹ Um Eli kə́ dəyá̰ ń i nə̄yá̰ Pinas ní ndān̄ ngōn̄, ba dɔ kojən i ngɔr. Loo ń ni oō najə̄ yā sandúkə yā Nə́ɓā ń taān̄ ní ō, najə̄ yā yo umən Eli ō, yo ngaan ō anī, kem ɔsə seneé adə̄ ndi kə̄ nang tə́ ojə ngōn̄.

²⁰ Dan ń rāā loo koy anī, dəyá̰ gə̄ ń ndin̄ rɔ̄n tə́ ní ədanən̄ na: Ī-lōō ɓōĺ, tɔdɔ̄ ngōn̄ ń ójən ní i kə́ dəngam. Banī ni dal aĺ ō, əndā kumən gír najə̄ ní tə́ aĺ ō.

²¹ Ni-əndā rī ngōn̄ ní na i Ikabod. Kumən na Kɔsə gɔn gətóo kɔ̄ɔ́. Tɔdɔ̄ dəyá̰ ní əda na: Unən̄ kɔsə gɔn dɔ nang kə́ Israel tə́ aw̄n̄neé kɔ̄ɔ́. Ni-əda najə̄ ní sɔɔ̄ń i sandúkə yā Nə́ɓā ń i kə́ kun kɔ̄ɔ́ ní ō, sɔɔ̄ń i umən ō, ngaan ō.

²² Ni-əda na: Kɔsə gɔn gətóo kɔ̄ɔ́ dɔ nang kə́ Israel tə́ i tām̄ sandúkə yā Nə́ɓā ń madə̄ ba̰ā̰ gə̄ un aw̄n̄neé kɔ̄ɔ́ ní tə́.