1 SAMUEL 30 - Bibəl ta Sar̄

Ɔyn̄ yá̰a̰ kənge kə́ Sikəlag. Dabid ngɔ̄də̄ gō Amalek gə̄

¹ Dabid nin̄ kə deē yān gēé ugə̄n̄ kem ɓē kə́ Sikəlag tə́ i kə ndɔ̄ kə́ nge ko̰ mətá. Ba kété pá tá kadə̄ nin̄ ugə̄n̄ ní, Amalek gə̄ aw̄ ɓogən̄ de gə̄ kə́ dɔ nang kə́ Negeb tə́ ō de gə̄ kə́ kem ɓē kə́ Sikəlag tə́ ō. Nin̄ nujən̄ ɓē sák sák kɔ̄ɔ́ ō əlan̄ hor dɔ tə́ ō.

² Nin̄ əhɔn̄ dəyá̰ gə̄ ō ngáń kə́ dūú gə̄ ō de kə́ tɔgə gə̄ ō ɓəloó, banī tɔ̄lə̄n̄ deē alé. Gō tə́ anī aw̄n̄ loo yādə́ kə de gə̄ ń nin̄ əhɔn̄də́ ɓəloó ní.

³ Adə̄ dan ń Dabid nin̄ kə deē yān gēé reē ugə̄n̄ kem ɓēé ní, nin̄ a̰a̰n̄ kadə̄ ɓē i kə́ əlan̄ hor dɔ tə́ kɔ̄ɔ́ ō nə̄yá̰də́ gə̄ kə ngáńdə́ kə́ dəngam gə̄ ō kə́ dəyá̰ gə̄ ō i kə́ əhɔndə́ aw̄n̄ sedə́ kɔ̄ɔ́ ō.

⁴ Dabid nin̄ kə madə̄n gēé mbutən̄ kə̄ nōō tə́ nōōn̄ bátə́ adə̄ tɔ́gə́də́ kə́ yā kadə̄ nōōn̄neé to̰ gətóo kɔ̄ɔ́.

⁵ Nə̄yá̰ Dabid kə́ jōó gə̄ ń i Ahinoam kə́ Jisreel ō Abigail kə́ nə̄yá̰ nge yo Nabal kə́ Karmel ō ní, əhɔn̄də́ aw̄n̄ sedə́ ō.

⁶ Loo təngā Dabid ngá̰ý tɔdɔ̄ de gə̄ ɔrə̄n̄ najə̄ tə́nīn kə mbalá yā tɔ̄lən: de gə̄ malang ní wurdə́ atə̄də́ ngá̰ý tām̄ yā ngáńdə́ kə́ dəngam gə̄ ō kə́ dəyá̰ gə̄ ō tə́. Banī Dabid tél əhɔ rɔ̄n tɔgə kə ta kūl̄ Kɔ́ɔ̄ɓē Nə́ɓā yānneé.

⁷ Dabid əda nge tun̄ yá̰á̰ ń i Abiatar ngōn̄ Ahimelek ní na: m̄-rāāī ɓɔ́, ún epod ī-reēń ādə̄m̄. Anī Abiatar un epod reēń adə̄n.

⁸ Dabid dəje Kɔ́ɔ̄ɓē na: Ré m̄-sōn̄g gō ngé ɓogə gə̄ ń noō anī m-ā m-ə́ngédə́ a? Anī Kɔ́ɔ̄ɓē ədan na: Ī-sōn̄g gōdə́ na ā ə́hɔ́də́ ō ā ī-gān̄g dɔ deē yāí gə̄ ō.

⁹ Dabid nin̄ kə deē yān kə́ ɓú mehḛ́ gēé aw̄n̄. Nin̄ ugə̄n̄ ta man̄ kə́ Besor tə́.

¹⁰ Anī de gə̄ ɓú jōó kɔr rāādə́ ngá̰ý adə̄ asən̄ teē man̄ alé. Nin̄ dəban̄ loo ń noō tə́. Banī Dabid nin̄ kə gotə de kə́ ɓú sɔ́ gēé aw̄n̄ kə̄ nodə́ tə́. Nin̄ na̰yn̄ kə̄ loo sōn̄g gō ngé ɓogə gə̄ ní tə́.

^11-12 Əngen̄ deē kógə̄ḿ kə́ Ejiptə kem bembeé anī reēn̄ seneé rɔ̄ Dabid tə́. Ni-əsa yá̰a̰ aĺ ō a̰ȳ man̄ aĺ ō ndɔ̄ mətá. Adə̄nən̄ mápa kadə̄ əsa ō man̄ kadə̄ a̰ȳ ō. Gō tə́ anī adə̄nən̄ kótə̄ kə́ mbō̰ dɔ naā tə́ kə́ kɔr̄ makəla tə́ ō, dɔ bəra nduú kə́ tutə gə̄ jōó ō. Dan ń ni-əsa yá̰á̰ ní oy anī ənge tɔ́gə.

¹³ Dabid dəjen najə̄ əda na: Ḭ̄ i deē yā náā? Ḭ́ḭ i rá? Anī deē ní əda na: Mā i de kə́ Ejiptə, ɓəlo yā Amalek kógə̄ḿ. Ba asə ndɔ̄ mətá ɓōólaā n kɔ́ɔ̄ḿ əya̰m̄neé kɔ̄ɔ́ ní, tɔdɔ̄ mo̰y rāām̄.

¹⁴ Kété ní j-aw̄ jə-ɓogə yá̰a̰ gō nang kə́ Negeb yā Kəretə gə̄ tə́ ō yā Juda gə̄ tə́ ō gō nang kə́ Negeb yā Kaleb tə́ ō. J-əla hor dɔ ɓē kə́ Sikəlag tə́ ō.

¹⁵ Dabid dəjen na ké ndigə kɔrən ta róbə yā kaw̄ seneé gō ɓūtə̄ ngé ɓogə gə̄ ní tə́ wa. Anī deē ní tél ədan na: Ré ə̄nī míndí kə rī Nə́ɓāá ādə̄m̄ kadə̄ ā ī-tɔ̄lə̄m̄ aĺ ō ā ī-tél yā kəlam̄ jī kɔ́ɔ̄ḿ tə́ gogə́ to̰ aĺ ō anī, m-ā m-ɔ́riī ta róbə yā kaw̄ seí gōdə́ tə́.

Dabid tetə Amalek gə̄ rɔ̄ɔ̄

¹⁶ Adə̄ deē ní ɔr no Dabid aw̄ seneé gō Amalek gə̄ tə́. Dan ń əngen̄də́ ní tḭ̄ḭ̄n̄ naā i kə̄ loo gə̄ tə́ n ndi a əsan̄neé yá̰a̰ ō a̰ȳn̄neé yá̰a̰ ō rāānneé rɔ̄nel̄ yá̰a̰ kənge kə́ ngá̰ý ń ɔyn̄ dɔ nang yā Pilistin gə̄ tə́ ō Juda gə̄ tə́ ō ní.

¹⁷ Dabid tɔ̄l̄də́ kə gír looí ɓatə bátə́ loo tíbə, loo tīī tél tíbə gotə madāá. Deē kógə̄ḿ kə́ teē gətóo, ba i balsáá kə́ ɓú sɔ́ gə̄ ń alə̄n̄ gidə jámbal gə̄ tə́ á a̰ȳ aw̄n̄ kɔ̄ɔ́ ní tá ngóy.

¹⁸ Dabid taā yá̰a̰ malang ń Amalek gə̄ ɔyn̄ ní. Ni-taā nə̄yá̰n kə́ jōó gə̄ ō.

¹⁹ Dan ngáń kə́ dūú gə̄ tə́ ō de kə́ tɔgə gə̄ tə́ ō ngáń kə́ dəngam gə̄ tə́ ō kə́ dəyá̰ gə̄ tə́ ō ní, ta deē kógə̄ḿ tḭ̄ḭ̄ alé. Yá̰a̰ malang ń ɔy aw̄n̄neé ní Dabid taā reēń gogə́ malang.

²⁰ Ni-əhɔ man̄g gə̄ kə batə̄ gə̄ kə bə̄yā̰ gə̄ malang téləń. Ba najə̄ ń ngé njə̄rā kété no yá̰a̰ kul̄ gə̄ ń toō tə́ a ədan̄ ní n toó: Yá̰a̰ kənge yā Dabid ń əhɔ ta rɔ̄ tə́ ní n toó.

²¹ Dabid tél reē ugə̄ ngɔr rɔ̄ de kə́ ɓú jōó gə̄ ń kɔr ɔgə̄də́ kaw̄ seneé adə̄ əya̰n̄də́ ta man̄ kə́ Besor tə́ ní. De gə̄ ní aw̄ ɔjən̄ no Dabid nin̄ kə ɓūtə̄ ngé rɔ̄ɔ̄ gə̄ ń seneé ní. Dabid njə̄rā kə̄ kété rɔ̄də́ tə́ kə ɓūtə̄ ngé rɔ̄ɔ̄ gə̄ ń i seneé ní ba rāādə́ lápə́ya.

²² Ba dan de gə̄ ń aw̄n̄ kə Dabidí tə́ ní, ngé kem ndul gə̄ ō ngé rāā hál gə̄ ō ədan̄ na: Nin̄ aw̄n̄ sejí aĺ ní j-a j-adīdə́ yá̰á̰ kógə̄ḿ dan yá̰a̰ gə̄ ń j-əhɔī ta rɔ̄ɔ̄ tə́ ní alé. Ba yá̰a̰ gə̄ ń j-a j-adidə́ ní i nə̄yá̰də́ gə̄ ō ngáńdə́ gə̄ ō ngóy. Ādə̄ ɔyn̄də́ ba aw̄n̄ loo yādə́.

²³ Banī Dabid əda na: Ngákó̰ó̰ḿ gə̄, ī-lōōī rāā yá̰á̰ kə́ tītə̄ ń noō kə yá̰á̰ ń Kɔ́ɔ̄ɓē adə̄jí ní. Ni-ngɔ̄m̄jí ō əla ɓūtə̄ ngé ɓogə gə̄ ń rɔ̄ɔ̄n̄jí ní kem jījí tə́ ō.

²⁴ Yá̰á̰ ń ə́daī noó de kə́ yā ndigə gōsí tə́ gətóo. Tɔdɔ̄ nge kaw̄ ta rɔ̄ɔ̄ tə́ ō nge ndi ta yá̰a̰ mbā tə́ ō ní, yá̰a̰ nə̄ɓō yādə́ a asə i naā: A nəɓōn̄ naā yá̰a̰ dɔ dáńdə́ tə́.

²⁵ Əla gír ndɔ̄ ń noō tə́ ní Dabid rāā adə̄ najə̄ ń ni əda ní tél i ndū najə̄ ō jī-bēl̄ loo rāā yá̰a̰ ō yā ngán Israel gə̄. Ba ndū najə̄ ní to bátə́ ɓōólaā ɓáý.

²⁶ Dan ń Dabid tél ugə̄ Sikəlag anī, əla kə núsə́ yá̰á̰ kə́ kəhɔ ta rɔ̄ɔ̄ tə́ gə̄ adə̄ kum kɔɔ̄ gə̄ kə́ Juda ń i madə̄ tan gə̄ ní ba ədadə́ na: Yá̰a̰ kənge yā madə̄ ba̰ā̰ Kɔ́ɔ̄ɓē gə̄ ń jə-taā jīdə́ tə́ ní núsən kə́ tām̄ yāsí tə́ kə́ yā rɔȳńsí n toó.

²⁷ Ni-əlań adə̄ ngé kə́ Betel ō kə́ Ramot ń ndin̄ gō nang kə́ Negeb tə́ ní ō kə́ Yatir ō

²⁸ Aroer ō Sipəmotə ō Esətemoa ō

²⁹ Rakal ō ngé gə̄ ń ndin̄ kem ɓē gə̄ yā Yerameel gə̄ tə́ ō ngé gə̄ ń ndin̄ kem ɓē yā Keni gə̄ tə́ ní ō

³⁰ ngé kə́ Horma ō Bor Asan ō Atak ō

³¹ Hebron ō ngé gə̄ ń ndin̄ kə gō ngán ɓē gə̄ malang ń ni mān̄ tū tə́ kə deē yān gēé ní ō.