1 SAMUEL 28 - Bibəl ta Sar̄

¹ Dan ngeé ń noō tə́ ní Pilistin gə̄ kánə̄n̄ ngé rɔ̄ɔ̄ yādə́ gə̄ kə̄ naā tə́ yā kaw̄ń rɔ̄ɔ̄ ngán Israel gə̄ tə́. Anī Akis əda Dabid na: Majə na ī-ger̄ kadə̄ ḭ̄ ní ā āw̄ seḿ ta rɔ̄ɔ̄ tə́ kə deē yāí gēé.

² Anī Dabid tél əda Akis na: Majə, īkɔ́ ā ī-ger̄ yá̰á̰ ń nge kəla yāí a rāā ní ɓáý. Akis tél əda Dabid ɓáý to̰ na: Majə, m-úniī kadə̄ ḭ̄ i nge ngɔ̄mə̄m̄ kə́ njɔ́ḿ gə̄ tə́.

Saul aw̄ koō taá rɔ̄ dəyá̰ kə́ En Dor tə́

³ Samuel oy kɔ̄ɔ́ adə̄ ngán Israel gə̄ malang rāān̄ yon ō dubə̄nən̄ kem ɓē yān tə́ Rama ō Saul ɔgə̄ kadə̄ deē oō ta kɔdə̄ sāā gə̄ dɔ nang yān tə́ ō.

⁴ Ndɔ̄ kə́rēý tə́ anī Pilistin gə̄ kánə̄n̄ ɓūtə̄ ngé rɔ̄ɔ̄ yādə́ gə̄ naā tə́ malang loo kógə̄ḿ, ba aw̄ ndin̄ sedə́ kadə ɓē kə́ Sunem tə́ ō. Saul kán̄ ngé rɔ̄ɔ̄ gə̄ yā ngán Israel gə̄ malang ba aw̄ ndin̄ kadə mbal̄ kə́ Gilboa tə́ ō.

⁵ Dan ń Saul a̰a̰ gérger yā Pilistin gə̄ anī kemən gān̄g man̄.

⁶ Saul dəje Kɔ́ɔ̄ɓē najə̄, banī Kɔ́ɔ̄ɓē dalən alé. Kɔ́ɔ̄ɓē ɔr̄ najə̄ seneé kə nīí aĺ ō kə wə̄lā kə́ táĺ gə̄ yā nge tun̄ yá̰a̰ yā Nə́ɓāá aĺ ō kə nge koō ta kógə̄ḿ aĺ ō.

⁷ Tā anī Saul əda ngé kəla yān gə̄ na: Ī-sāāī kɔdə̄ sāā kógə̄ḿ kə́ dəyá̰ ādə̄ m-āw̄ ndḛḛ̄ sāá rɔ̄n tə́. Anī ngé kəla yān gə̄ ədanən̄ na kɔdə̄ sāā kógə̄ḿ kə́ dəyá̰ na ndi kem ɓē kə́ En Dor tə́ noō.

⁸ Saul ɔr̄ kūbə̄ kə́ rɔ̄n tə́ kɔ̄ɔ́ ba tə́lá kə́ rang gə̄ rɔ̄n tə́ adə̄ deē gerə̄n alé, ba adə̄ de gə̄ jōó dānə̄nən̄. Nin̄ aw̄ ugə̄n̄ rɔ̄ dəyá̰ ní tə́ ndɔ̄ɔ́. Saul əda dəyá̰ ní na: m̄-sāā kadə̄ ī-dəje de kə́ koy kógə̄ḿ najə̄ ādə̄m̄. Deē ń m-ā m-ə́daī rīn ní ī-ɓārə́n ādə̄ teē reē.

⁹ Dəyá̰ ní tél ədan na: Yá̰á̰ ń Saul rāā ní īkɔ́ ī-ger̄ majə. De kə́ kem ɓēé gə̄ ń a ɓārə́n̄ de kə́ koy gə̄ kadə̄ teē reēn̄ adə̄ de gə̄ oōn̄ tadə́ ní, Saul tɔ̄l̄də́ kɔ̄ɔ́ malang. Gūmbə̄ kə́ a tɔ̄l̄ deē ń noō ə̄yā kadə̄ əhɔm̄ i tām̄ rí tə́?

¹⁰ Saul túbə kə rī Kɔ́ɔ̄ɓēé əda na: Tītə̄ ń Kɔ́ɔ̄ɓē ndiń kə kumneé noō ní, yá̰a̰ a rāāī dan najə̄ ń toō tə́ alé.

¹¹ Dəyá̰ ní əda na: Kə m̄-ɓāŕ i náā n kə m-ādī? Saul əda na: Ī-ɓāŕ Samuel ādə̄m̄.

¹² Dəyá̰ ní a̰a̰ Samuel anī əga kɔŕ ngá̰ý ba əda na: Ī-gólə̄m̄ i najə̄ rí tə́? Ḭ̄ i Saul.

¹³ Mban̄g tél əda dəyá̰ ní na: Ī-lōō ɓōĺ ba ə́dam̄ yá̰á̰ ń á̰a̰ā̰ ní. Dəyá̰ ní əda Saul na n-a̰a̰ na i ndíl deē kógə̄ḿ kə́ koy kə́ teē gíŕ nángāá n a reē ní.

¹⁴ Saul dəje dəyá̰ ní na ké deē ní ké to i ba̰ý wa. Anī dəyá̰ ní tél ədan na i de kə́ tɔgə ɓə́ga n teē gíŕ nángāá a reē ní. Ba rɔ̄n i kə́ ɓír̄ kə kūbūú. Loo ń noō tə́ Saul ger̄ kadə̄ i Samuel. Adə̄ ni-ɔsə non nang tə́ non tə́ rɔȳnneé.

¹⁵ Samuel dəje Saul na: Ī-njə́ɓām̄ i najə̄ rí tə́? Ī-ɓārə́m̄ i tām̄ rí tə́? Anī Saul ədan na: m̄-ndi i kə sōlōó kekəre. Pilistin gə̄ a sāān̄ i rɔ̄ɔ̄m̄ ō Nə́ɓā əya̰m̄ kɔ̄ɔ́ ō daləm̄ najə̄ to̰ aĺ ō. Ɔr̄ najə̄ seḿ kə ngé koō ta gēé aĺ ō kə nīí aĺ ō. Adə̄ m̄-ɓāríī i yā kadə̄ ī-reē ə́dam̄ yá̰á̰ ń sɔɔ̄ kadə̄ m̄-rāā ní.

¹⁶ Samuel əda na: Ká ré Kɔ́ɔ̄ɓē əya̰ī kɔ̄ɔ́ ō ni-tél madə̄ ba̰ā̰í ō anī ī-dəjem̄ mā najə̄ i tām̄ rí tə́?

¹⁷ Kɔ́ɔ̄ɓē rāā i yá̰á̰ ń ni ədam̄ á m-ə́daī najə̄n kété ní, ni-taā ngār jīí tə́ kɔ̄ɔ́ ba téləń adə̄ de kə́ rang ń i Dabid ni.

¹⁸ Ḭ̄ ī-mbātə́ ta Kɔ́ɔ̄ɓē adə̄ ī-tɔ̄l̄ Amalek gə̄ malang ī-tetəń wōn̄g yān kə̄ nang tə́ alé. I tām̄ najə̄ ń noō tə́ n ni rāań yá̰á̰ kə́ beé seí ɓōólaā ní.

¹⁹ Adə̄ ḭ̄ ō ngán Israel gə̄ ō ní, Kɔ́ɔ̄ɓē a əlasí jī Pilistin gə̄ tə́. Bírí ní ḭ̄ ō ngání kə́ dəngam gə̄ ō ā ī-reēī gōḿ tə́ ɓádá. Ba ngé rɔ̄ɔ̄ gə̄ yā ngán Israel gə̄ ní, Kɔ́ɔ̄ɓē a əladə́ jī Pilistin gə̄ tə́.

²⁰ Kə̄ ta jī tə́ noō Saul teē əsō nang tə́ kə ngālən gēé malang, tɔdɔ̄ najə̄ ń Samuel ədan ní rāān kə ɓōló. Tá tɔ́gən gətóó ɓáý to̰ tām̄ əsa yá̰a̰ kadaá aĺ ō ndɔ̄ɔ́ aĺ ō.

²¹ Dəyá̰ ní reē rɔ̄ɔ̄ Saul tə́ anī a̰a̰ kadə̄ kem Saul nujə sák sák kɔ̄ɔ́. Ni-əda Saul na: Kɔ́ɔ̄ ɓē gə̄, á̰a̰ā̰ m-ōō taí, m-ə̄nī rɔ̄ḿ kɔ̄ɔ́ m̄-rāań yá̰á̰ ń ə́dá ní.

²² Ba ngɔlaā ní ta i dɔí tə́ kadə̄ ōō yāḿ tā. M-ā m̄-reē kə yá̰a̰ kəsaá kadə̄ ə́sá ə́ngeń tɔ̄gə̄ pá tá kadə̄ ə̄sō róbó ɓáý.

²³ Saul mbātə́ kəsa yá̰a̰ kɔ̄ɔ́, banī ngé kəla yān gə̄ ō dəyá̰ ní ō ran̄ seneé ngá̰ý adə̄ ta tɔ̄l̄ ta tə́ anī ni ndigə. Ni-ḭḭ ndi dɔ tə̄rá.

²⁴ Dəyá̰ ní aw̄ kə ngōn̄ man̄g kógə̄ḿ kə́ a ulə̄n kadə̄ əndā yibə̄n. Ni-əhɔ ngōn̄ man̄g ní tɔ̄l̄ láẃ kanjə̄ kɔr bā̰ā̰. Gō tə́ anī ndégə̄ ndujə̄ ló̰ȳ ba ɔr̄ makəla tə́.

²⁵ Ni-reē kə yá̰a̰ kəsa ní adə̄ Saul nin̄ kə ngé kəla yān gēé adə̄ əsan̄. Gō tə́ anī nin̄ əsōn̄ róbó ta kaw̄ gogə́ kə̄ ndɔ̄ɔ́ ndɔ̄ nəkɔ́ ń noō tə́.