1 SAMUEL 26 - Bibəl ta Sar̄

Dabid mbātə́ tɔ̄l̄ Saul ɓáý to̰

¹ De gə̄ kə́ Jip aw̄ əngen̄ Saul kem ɓē kə́ Gibea tə́ ba ədanən̄ na: Dabid ɓɔ̄ɔ̄ rɔ̄n i dɔ ngán mbal̄ gə̄ kə́ Hakila tə́, ngɔr kə̄ kə̄sāá ní ī-ger̄ aĺ a?

² Anī Saul aw̄ kem dəla loo kə́ Jip tə́ yā ndəle Dabid. Ngé rɔ̄ɔ̄ gə̄ kə́ Israel tə́ kə́ gerə̄n̄ rɔ̄ɔ̄ tɔȳ madə̄də́ gə̄ asən̄ dūbú mətá aw̄n̄ seneé.

³ Saul rāā gérger yān i kadə róbə́ tə́ dɔ ngán mbal̄ gə̄ kə́ Hakila tə́ ń ran̄ sɔɔ̄n̄ ta naā kə loo kə́ kə̄sāá tə́ ní. Dabid ndi i kem dəla loo tə́. Ni-a̰a̰ kadə̄ Saul reē i ngɔ̄dən tə́ kem dəla loo tə́,

⁴ tām̄ ni-əla de gə̄ kəndā ma̰ȳ looó, adə̄ ni ger̄ ká̰ý ká̰ý kadə̄ Saul ugə̄.

⁵ Ni-aw̄ ugə̄ loo ń Saul rāā gérger yān tū tə́ ní tə́, ba a̰a̰ loo ń Saul nin̄ kə Abner kə́ ngōn̄ Ner ń i ngol áskar gə̄ ní ton̄ tū tə́ ní. Saul to i danaá kem gérgereé, ba ɓūtə̄ ngé rɔ̄ɔ̄ gə̄ ton̄ gīrə̄n̄ gidən.

⁶ Dabid əda Ahimelek ń i Het ní nin̄ kə Abisai kə́ ngōn̄ Seruya ō kə́ ngōkó̰o̰ Joab ō na: I náā n ndigə kaw̄ seḿ bátə́ rɔ̄ɔ̄ Saul tə́ kem gérgereé ní? Anī Abisai tél ədan na: M-ā m-āw̄ seí.

⁷ Ndɔ̄ɔ́ anī Dabid nin̄ kə Abisai udən̄ kem gérger yā ngé rɔ̄ɔ̄ gə̄ tə́. Saul to kem gérgereé danaá to a ɓīī ō. Nənga yān i kə́ kudə kum kə̄ dɔ tə́, ba Abner nin̄ kə ɓūtə̄ ngé rɔ̄ɔ̄ gēé ton̄ kə gō gidəneé a ɓīīn̄.

⁸ Abisai əda Dabid na: Ɓōólaā Nə́ɓā əla madə̄ ba̰ā̰í jīí tə́. Adə̄ ādə̄m̄ ta róbə ādə̄ m-āw̄ m-ɔ́sən kə nəngaá ta kógə̄ḿ ngóy m-ə́ren nang tə́. M-ā m-ɔ́sən i nja jōó alé.

⁹ Dabid əda Abisai na: Ī-lōō tɔ̄lən. Ɔ́jəń na deē a tɔ̄l̄ mban̄g kə́ Kɔ́ɔ̄ɓē ur yibə̄ ngār dɔn tə́ kanjə̄ kənge najə̄ a?

¹⁰ Tītə̄ ń Kɔ́ɔ̄ɓē ndiń kə kumneé noō ní, m-ə́daī najə̄ kə́ rɔ̄kum, Kɔ́ɔ̄ɓē nəkɔ́ a tɔ̄lən. Majanī a oy i yo kə́ karī, aláa a oy i ta rɔ̄ɔ̄ tə́.

¹¹ Ré m̄-tɔ̄l̄ mban̄g ń Kɔ́ɔ̄ɓē ur yibə̄ ngār dɔn tə́ ní anī, ādə̄ mā i yá̰á̰ kə́ to yḛr kum tām̄ yā Kɔ́ɔ̄ɓē tə́. Ní ɔ̄r̄ nənga ń ra kum kə̄ dɔn tə́ noō ō, ún gaĺ man̄ yān ō, ba ādə̄ j-aw̄.

¹² Adə̄ Dabid un nənga ō gaĺ man̄ ō kə́ dɔ Saul tə́ ba ɔtə aw̄n̄. Deē a̰a̰də́ aĺ ō deē ger̄ gōdə́ aĺ ō de kə́ ndól̄ dɔ ɓīī tə́ gətóo ō. De gə̄ malang a ɓīīn̄ i mbée, tɔdɔ̄ Kɔ́ɔ̄ɓē ənī ɓīī katə̄ dɔdə́ tə́.

¹³ Dabid mān̄ aw̄ ra gidə kə́ nú tə́ dɔ mbalá dɔɔ́, ba dɔ dáńdə́ kə gérger yā Saul i sa̰y.

¹⁴ Dabid tūr̄ kumən kə̄ rɔ̄ ɓūtə̄ ngé rɔ̄ɔ̄ gə̄ tə́ ba əga kɔŕ ədań Abner kə́ ngōn̄ Ner na: Abner, ā ī-ndigəm̄ aĺ a? Abner tél ədan na: I ḭ̄ náā n ā ə́ga kɔŕ ta mbī mban̄g tə́ toō?

¹⁵ Dabid əda Abner na: Abner, ḭ̄ i de kə́ dəngam aĺ a? Tá de kə́ tītīí gətóo dɔ nang kə́ Israel tə́ ɓáý to̰. Ba i ba̰ý á ī-ngɔ̄m̄ mban̄g ń i kɔ́ɔ̄í ní alé ní? Deē kə́rēý reē tɔ̄lən tə́.

¹⁶ Yá̰á̰ ń ī-rāāī ní majə alé. Tītə̄ ń Kɔ́ɔ̄ɓē ndiń kə kumneé noō ní, majə kadə̄ óyiī malang, tɔdɔ̄ kɔ́ɔ̄sí ń i mban̄g ń Kɔ́ɔ̄ɓē ur yibə̄ ngār dɔn tə́ ní sḭḭ̄ ī-ngɔ̄m̄niī alé. Á̰a̰ loo kum kə̄ dɔn tə́ ké nənga yān ō gaĺ man̄ yān ō ton̄ noó wa.

¹⁷ Saul ger̄ ndū Dabid adə̄ ni-əda na: Ngōnə̄ḿ Dabid, i īkɔ́ n m-ōō ndūí toō a? Dabid ndigən əda na: Kɔ́ɔ̄ ɓē gə̄, i mā nəkɔ́.

¹⁸ Gō tə́ anī əda na: Kɔ́ɔ̄ ɓē gə̄, ā ī-ndəlem̄ i tām̄ rí tə́? m̄-rāā i rí yāí? I rí kə́ majaĺ n m̄-rāā ní.

¹⁹ Kɔ́ɔ̄ ɓē gə̄, m̄-rāāī ɓɔ́, ōō najə̄ ń mā nge kəla yāí m-ā m-ə́daī ní: Ré i Kɔ́ɔ̄ɓē n ra seí ta rāām̄ yá̰á̰ kə́ beē anī, ādə̄ un usə yá̰a̰ ndējə̄ kə́ kotə majə. Ba ré i de gə̄ anī, ādə̄ Kɔ́ɔ̄ɓē ndɔ̄ĺdə́. Tɔdɔ̄ ɓōólaā tə̄ɓāmə̄n̄ kɔ̄ɔ́, ɔgə̄mə̄n̄ ndi dɔ nang ń Kɔ́ɔ̄ɓē adə̄ deē yān gə̄ tə́ ní. Adə̄ to i tītə̄ kə́ ədamə̄n̄ na kə m-āw̄ kə m̄-rāā ɓesə̄ gə̄ beé.

²⁰ Ba mā m̄-ndigə koy sa̰y rɔ̄ Kɔ́ɔ̄ɓē tə́ alé. Kɔ́ɔ̄ ɓē gə̄, i tām̄ rí tə́ á ī-rɔ̄ɔ̄m̄ mā ń i ngáɓer kə̄njá ní? I tām̄ rí tə́ á ā ī-ngɔ̄də̄m̄ tītə̄ loo ngɔ̄də̄ kerwḛy dɔ mbal̄ gə̄ tə́ ní?

²¹ Saul əda na: m̄-rāā majaĺ. Ngōnə̄ḿ Dabid, ī-tél ī-reē. M-ā m̄-rāāī majaĺ to̰ alé, tām̄ ndɔ̄ɔ́ laā ḭ̄ á̰a̰ā̰ kadə̄ ndi kə kumuú yāḿ mā i yá̰á̰ kə́ gātə̄n i ngá̰ý ta kumií tə́. Rɔ̄kum, yá̰á̰ ń m̄-rāā ní i tītə̄ kə́ i nge kɔ̄r̄ n rāā yá̰a̰ beé. m̄-rāā i yá̰á̰ kə́ gōtə́ aĺ ngá̰ý.

²² Dabid tél əda na: Kɔ́ɔ̄ ɓē gə̄, nənga yāí n toó. Ādə̄ balsáa yāí kógə̄ḿ reē un.

²³ Ādə̄ Kɔ́ɔ̄ɓē əndā njají kógə̄ḿ kógə̄ḿ tām̄ yá̰á̰ kə́ gōtə́ ń jə-rāāī tə́ ní ō tām̄ yá̰á̰ kə́ rɔ̄kum tə́ ō. Ɓōólaā Kɔ́ɔ̄ɓē əlaī jīḿ tə́ banī m-ɔ́də tɔ̄lī alé. Tɔdɔ̄ ḭ̄ i mban̄g ń Kɔ́ɔ̄ɓē ur yibə̄ ngār dɔí tə́ ní.

²⁴ Tītə̄ ń ndií ḭ̄ kə kumií i yá̰á̰ kə́ gātə̄n i ngá̰ý ta kum mā tə́ ní, ādə̄ ndiḿ mā kə kumḿ i yá̰á̰ kə́ gātə̄n i ngá̰ý ta kum Kɔ́ɔ̄ɓē tə́ ō ba ādə̄ ɔrə̄m̄ kɔ̄ɔ́ kum yá̰á̰ kə́ to yo gə̄ tə́ malang.

²⁵ Saul əda Dabid na: Ngōnə̄ḿ Dabid, ādə̄ Kɔ́ɔ̄ɓē rāā majə seí. Rɔ̄kum ā ī-rāā yá̰á̰ kə́ bo gə̄ ō ā ī-teē deē ō. Dabid aw̄ loo yān, ba Saul tél dɔ tə́ aw̄ gogə́ ɓēé.