1 SAMUEL 23 - Bibəl ta Sar̄

¹ Ədan̄ Dabid ndɔ̄ kə́rēý tə́ na Pilistin gə̄ ra na a rɔ̄ɔ̄n̄ ɓē kə́ Keila noó ō na ra a ɔyn̄ kōō kə́ kem gárāá gə̄ noó ō.

² Anī Dabid dəje Kɔ́ɔ̄ɓē na ké kə n-aw̄ kə n-ənī Pilistin gə̄ ní rɔ̄ɔ̄ wa. Kɔ́ɔ̄ɓē ədan na kə aw̄ na a tetə Pilistin gə̄ rɔ̄ɔ̄ ō na a taā ɓē kə́ Keila jīdə́ tə́ yā kəya̰n dɔɔ́ ō.

³ Banī deē yā Dabid gə̄ ədanən̄ na: Jḭḭ̄ i dɔ nang kə́ Juda tə́ ba ɓōĺ rāājí kɔ̄ɔ́ ɓá. Ré j-awī Keila kənī ɓūtə̄ áskar gə̄ yā Pilistin gə̄ rɔ̄ɔ̄ tə́ to̰ anī ɓōĺ a rāājí kə́ tɔȳ dɔ nge ń toō.

⁴ Dabid tél dəje Kɔ́ɔ̄ɓē najə̄ ɓáý to̰, anī Kɔ́ɔ̄ɓē ədan na kə ɔr̄ dɔɔ́ kə aw̄ Keila na n-a n-əla Pilistin gə̄ jīn tə́.

⁵ Loo ń noō tə́ Dabid aw̄ Keila kə deē yān gēé ba aw̄ ənī Pilistin gə̄ rɔ̄ɔ̄. Ni-tetədə́ rɔ̄ɔ̄ tetə kə́ to ɓōĺ ngá̰ý ō ɔy yá̰a̰ kul̄ yādə́ gə̄ téləń ō. I beé n Dabid ajəń de kə́ kem ɓē kə́ Keila tə́ gə̄ ní.

⁶ Dan ń Abiatar ngōn̄ Ahimelek a̰ȳ reē ɓɔ̄ɔ̄ rɔ̄n rɔ̄ Dabid tə́ ní, ni-aw̄ Keila kə yá̰a̰ ndḛḛ̄ sāá jīn tə́.

⁷ Dan ń Saul oō kadə̄ Dabid udə kem ɓē kə́ Keila tə́ anī əda na: Nə́ɓā əlan jīḿ tə́ tā. Nəkɔ́ utə̄ ta róbə dɔn tə́ tɔdɔ̄ udə kem ɓē kə́ a utə̄n̄ ta i kə bápə́ kə́ rákə̄ yá̰a̰ ta tə́ kadə̄ ngan̄g tə́.

⁸ Saul ɓāŕ ngé rɔ̄ɔ̄ gə̄ malang kadə̄ aw̄n̄ Keila kutə̄ Dabid nin̄ kə deē yān gēé tə́.

⁹ Dan ń Dabid ger̄ kadə̄ Saul a nómə̄n i ni anī əda Abiatar ń i nge tun̄ yá̰á̰ ní kadə̄ reē kə yá̰a̰ ndḛḛ̄ sāá.

¹⁰ Ba gō tə́ anī əda na Kɔ́ɔ̄ɓē Nə́ɓā yā Israel gə̄, mā nge kəla yāí m-ōō kadə̄ Saul núm̄ reē kem ɓē kə́ Keila tə́ yā nujəń kɔ̄ɔ́ najə̄ yāḿ tə́ ní,

¹¹ de kə́ kem ɓēé gə̄ a əlamə̄n̄ jīn tə́ a? Tītə̄ ń nge kəla yāí oōń ní, Saul a reē rɔ̄kum a? Kɔ́ɔ̄ɓē Nə́ɓā yā Israel, m̄-rāāī ɓɔ́ ba ə́dam̄. Kɔ́ɔ̄ɓē tél ədan na: Saul a reē.

¹² Anī Dabid tél dəje ɓáý to̰ na: De kə́ Keila tə́ gə̄ a əlamə̄n̄ kə deē yāḿ gēé jī Saul tə́ a? Kɔ́ɔ̄ɓē tél ədan na: A əlan̄sí jīn tə́.

¹³ Tā anī Dabid ɔr̄ dɔɔ́ kə deē yān gə̄ kə́ asən̄ ɓú mehḛ́ ń noō. Nin̄ teēn̄ kɔ̄ɔ́ kem ɓēé ba dáȳn̄ kə̄ loo gə̄ tə́. De gə̄ ədan̄ Saul na Dabid na teē kem ɓē kə́ Keila tə́ a̰ȳ kɔ̄ɔ́, anī Saul loo gír kaw̄ rɔ̄ tə́ kɔ̄ɔ́.

¹⁴ Dabid aw̄ ndi kem dəla loo kə́ Jip tə́, mbo̰ō̰ mbal̄ gə̄ kə́ loo kaw̄ tū tə́ tōr̄ ngá̰ý tə́, gō nang kə́ mbalá tə́. Saul ndəlen i kə dɔ ndɔ̄ gə̄, banī Nə́ɓā əya̰ Dabid adə̄ əsō jīn tə́ alé.

¹⁵ Dabid a̰a̰ ger̄ kadə̄ Saul a ndəlen i yā tɔ̄lən. Ba dan ngeé ń noō tə́ ní Dabid ndi i Horsa kem dəla loo kə́ Jip tə́.

¹⁶ Ndɔ̄ kə́rēý tə́ anī Jonatan ngōn̄ Saul aw̄ rɔ̄ Dabid tə́ Horsa. Ni-aw̄ ɔr̄ najə̄ seneé kə rī Nə́ɓāá mbūsənneé.

¹⁷ Ni-əda Dabid na: Ī-lōō ɓōĺ tɔdɔ̄ bɔbə́ḿ Saul a əhɔī alé. I ḭ̄ n ā ó̰o̰ ɓē dɔ ngán Israel gə̄ tə́ ní, ba mā i pajā yāí. Adə̄ nge ń noō ní bɔbə́ḿ Saul nəkɔ́ ger̄ majə.

¹⁸ Jonatan ō Dabid ō ənīn̄ ndūdə́ jōó mbak ta kum Kɔ́ɔ̄ɓē tə́ rāānəń madə̄ naā. Gō tə́ anī Jonatan tél aw̄ gogə́ ɓēé, ba Dabid ndi Horsa.

Saul sāā kəhɔ Dabid

¹⁹ De gə̄ kə́ Jip aw̄n̄ rɔ̄ Saul tə́ Gibea ba ədanən̄ na: Dabid ɓɔ̄ɔ̄ rɔ̄n i gō nang yājí tə́ ní ī-ger̄ aĺ a? Ɓɔ̄ɔ̄ rɔ̄n i mbo̰ō̰ mbal̄ gə̄ kə́ loo kaw̄ tū tə́ ngan̄g ngá̰ý tə́, ngɔr kə̄ Horsa, dan ngán mbal̄ gə̄ kə́ Hakila tə́. Ré deē ra kə̄sāá anī i dām̄ mbɔ́r ɓē kə́ geleé tə́.

²⁰ Adə̄ kɔ́ɔ̄ ɓē gə̄, ré ī-ndigə kəhɔn dɔ jīn tə́ anī ī-reē na i jḭḭ kɔ́ gə̄ n j-a j-adī seneé ní.

²¹ Saul ədadə́ na: Ādə̄ Kɔ́ɔ̄ɓē rāā majə sesí tām̄ ka̰a̰ ń á̰a̰ī kum tō ndoō yāḿ tə́ ní.

²² Ba āwī, ī-dəjeī najə̄ kə́ dɔn tə́ ɓáý to̰ kadə̄ ī-gerīneé loo ń ta njan i tū tə́ ní kə gōó majə. De kə́rēý a̰a̰n tū tə́ a? Tɔdɔ̄ ədamə̄n̄ na ni i de kə́ kumən edə̄ ngá̰ý.

²³ Āwī á̰a̰ī loo gə̄ ń a ɓɔ̄ɔ̄ rɔ̄n tū tə́ ní malang. Ré ī-gerī kə gōó majanī ī-tél ī-reē ɔ́jəmī. Loo ń noō tə́ m-ā m-āw̄ sesí. Ré ni i dɔ nang ń noō tə́ anī m-ā m̄-sāān dan gír kojə yā Juda gə̄ tə́ malang yā teē dɔn tə́.

²⁴ De gə̄ ní əsōn̄ róbó aw̄n̄ ta kaw̄ kə̄ Jip kété no Saul tə́. Dan ń noō tə́ ní Dabid nin̄ kə deē yān gēé nin̄ i wól looó, kem dəla loo kə́ Maon tə́. Ré deē ra kəsāá anī loo ń nin̄ i tū tə́ ní i kə̄ dām̄ mbɔ́r ɓē kə́ geleé tə́.

²⁵ Saul nin̄ kə deē yān gēé aw̄n̄ sāān tə́. De gə̄ ədan̄ Dabid adə̄ ni oō kɔ̄ɔ́. Adə̄ ni-aw̄ ndi mbal̄ bo ń ra kem dəla loo kə́ Maon tə́ ní. Dan ń Saul oō anī ni sōn̄g gō Dabid kem dəla loo kə Maon tə́.

²⁶ Saul nin̄ kə deē yān gēé i gidə mbal̄ kə́ dām̄ kə́rēý tə́ o, Dabid nin̄ kə deē yān gēé i gidə mbal̄ kə́ dām̄ kə́ noō tə́ ō. Dabid nin̄ kə deē yān gēé njə̄rān̄ kə nāgá yā teēń kɔ̄ɔ́ jī Saul tə́. Na̰y i ngɔr̄ kadə̄ Saul nin̄ kə deē yān gēé ugə̄n̄ rɔ̄ Dabid gə̄ tə́ yā gīr̄də́ pá tá kəhɔdə́.

²⁷ Anī ngōmbang kəla kógə̄ḿ reē ugə̄ ba əda Saul na: Ī-reē láý na Pilistin gə̄ a rɔ̄ɔ̄n̄ i ɓē.

²⁸ Anī Saul lōō gír sōn̄g gō Dabid tə́ ba tél aw̄ tə́nī ta Pilistin gə̄ tə́ yā rɔ̄ɔ̄də́. I tām̄ najə̄ ń noō tə́ n əndān̄neé rī loo ní na i Mbal̄-kəya̰-naā ní.