1 SAMUEL 21 - Bibəl ta Sar̄

¹ Tā anī Dabid əsō róbó ō, Jonatan tél ta kaw̄ gogə́ ɓēé ō.

Dabid ugə̄ Nob ɓē Ahimelek

² Dabid aw̄ Nob ɓē Ahimelek nge tun̄ yá̰a̰. Ahimelek tə́nī tan kə ɓōló ba dəjen na: I ba̰ý á īkɔ́ i kə kérí ba de kə́ dānī gətóó ní?

³ Anī Dabid tūr̄ ədan na: Mban̄g əlam̄ ba ədam̄ na: Kəla ń m-ə́laī toó ā ə́dá yá̰á̰ kə́ tū tə́ kógə̄ḿ kadə̄ deē ger̄ alé. I tām̄ najə̄ ń noō tə́ n m-ɔ́jə loo kógə̄ḿ kadə̄ j-ənge naā tū tə́ kə ngé dānə̄ḿ gēé ní.

⁴ I rí n i kə́ to kəsa ngɔr ń toō tə́ ní? Ādə̄m̄ mápá mí, aláa yá̰a̰ kəsa kə́ rang ń to jīí tə́ ní.

⁵ Nge tun̄ yá̰á̰ tél əda Dabid na: Mápá kə́ karī gətóo ba i mápá kə́ kɔr̄ kam̄ n to laā. Adə̄ ré madə̄ mbāí gə̄ ní ɔdən̄ rɔ̄ dəyá̰ gə̄ aĺ pá tá m-ā m-ādī ɓáý.

⁶ Dabid əda nge tun̄ yá̰á̰ ní na: A̰á̰ā̰ ɔgə̄n̄jí sāā dəyá̰ gə̄ kɔ̄ɔ́ tītə̄ ń a ɔgə̄n̄neéjí kété dan ń m̄-rāā yā kaw̄ kə̄ ta rɔ̄ɔ̄ tə́ ní. Adə̄ balsáa gə̄ ní yá̰á̰də́ i kə́ táĺ. Mbā ń j-a j-aw̄ toó i mbā kə́ karī. Ɓá tā ba téĺ kə́ táĺ ɓōólaā kə ta kūl̄ yá̰á̰də́ gə̄ ń toō.

⁷ Adə̄ nge tun̄ yá̰a̰ adə̄ Dabid mápá kə́ kɔr̄ kam̄ gə̄ ní, tɔdɔ̄ mápá kə́ rang gətóo. Mápá gə̄ ní i kə́ ndējə̄n̄ Kɔ́ɔ̄ɓē pá tá gō tə́ anī ɔyn̄ kɔ̄ɔ́ kem loo kə́ táĺ tə́ yā ɓōkə́nń kə́ kijə gotoó.

⁸ Ba ndɔ̄ ngeé ń noō tə́ ní nge kəla yā Saul kógə̄ḿ ndi ta kum Kɔ́ɔ̄ɓē tə́ yā rāā yá̰á̰ kə́ sɔɔ̄ dɔn. Deē ní rīn na i Doeg. Ni i Edom deē. Ba ni i ngol ngé kul̄ yá̰a̰ gə̄ yā Saul.

⁹ Dabid əda Ahimelek ɓáý to̰ na: Yá̰á̰ kə́ tītə̄ nənga, aláa kaskar gətóo jīí tə́ a? M-ún kaskar yāḿ aĺ ō, m-ɔ́ý yá̰a̰ rɔ̄ɔ̄ yāḿ gə̄ aĺ ō, tɔdɔ̄ mban̄g əlam̄ i kəla kə́ láẃ ngá̰ý.

¹⁰ Anī nge tun̄ yá̰á̰ tél ədan na: Pilistin ń ī-tɔ̄lə̄n wól loo kāgə̄ sén gə̄ tə́ á rīn na i Goliat ní, kaskar yān to laā. I kə́ ɓír̄ gidə kə kūbūú ba to gidə kūbə̄ yā nge tun̄ yá̰á̰ tə́ noō. Ré ī-ndigə kun anī ún, tɔdɔ̄ yá̰a̰ rɔ̄ɔ̄ kə́ rang gətóo laā. Dabid əda na: Kaskar kə́ rang kə́ to tītə̄n gətóo, adə̄ ādə̄m̄ seneé laā.

Dabid i ɓē Pilistin gə̄ kə́ Gat tə́

¹¹ Dabid ɔr̄ dɔɔ́ ndɔ̄ ń noō tə́. Ni-a̰ȳ Saul aw̄ sa̰y. Aw̄ ugə̄ rɔ̄ Akis mban̄g kə́ Gat tə́.

¹² Ngé kəla yā Akis gə̄ ədan̄ Akis na: I deē ń toō n i Dabid ń i mban̄g kə́ dɔ nang yā ngán Israel gə̄ tə́ ní aĺ a? I ni n de gə̄ ənīn̄ pā seneé ndāmə̄nneé ədan̄ na Saul tɔ̄l̄ dūbú ba Dabid tɔ̄l̄ i dūbú kutə ní aĺ a?

¹³ Najə̄ ní əla ɓōĺ kem Dabid tə́, adə̄ ni ɓōĺ Akis ń i mban̄g kə́ Gat ní ngá̰ý.

¹⁴ Ni-tɔ̄ rāā yá̰a̰ tītə̄ de kə́ nge kɔ̄r̄ kə̄ ta kumdə́ tə́ noō: Ɔr̄ najə̄ mbit mbit dandə́ tə́ ō, a tə́jā yá̰a̰ gə̄ tū bápə gə̄ kə́ ta róbə́ kújə́ tə́ ō, əya̰ ndɔl tan adə̄ də̄yā̰ mbāýn tə́ ō.

¹⁵ Anī Akis əda ngé kəla yān gə̄ na: Sḭḭ̄ ī-gerī majə kadə̄ i nge kɔ̄r̄ tá ī-reēī seneé rɔ̄ḿ tə́ i tām̄ rí tə́?

¹⁶ Ndoō ngé kɔ̄r̄ gə̄ rāām̄ á ī-reēī kə deē ń toō kadə̄ rāā kɔ̄r̄ dɔḿ tə́ a? Deē ń noō kadə̄ udə kem kújə yāḿ mā tə́ a?