1 SAMUEL 2 - Bibəl ta Sar̄

¹ Ana ndɔ̄ȳ Nə́ɓā əda na: M-ə́nge rɔ̄nel̄ dan wurəḿ tə́ kə ta kūl̄ Kɔ́ɔ̄ɓē ō, m-ɔ̄r̄ dɔḿ dɔɔ́ i kə ta kūl̄ Kɔ́ɔ̄ɓē ō. M-ásə kəgō madə̄ ba̰ā̰ḿ gə̄ ō, m̄-rāā rɔ̄nel̄ tɔdɔ̄ Nə́ɓā dḭḭ̄m̄ ō.

² De kə́ táĺ tītə̄ Kɔ́ɔ̄ɓē gətóo. I ḭ̄ ngóy n i de kə́ ndi noó rɔ̄kum ní, mbal̄ kə́ tītə̄ Nə́ɓā yājí gətóo.

³ Ī-lōōī ndájə̄ najə̄ ō, ī-lōōī ngonjə̄ ō, tɔdɔ̄ Kɔ́ɔ̄ɓē i Nə́ɓā kə́ ger̄ yá̰a̰ malang. Ni i nge gān̄g sarya dɔ yá̰a̰ malang ń de gə̄ rāān̄ tə́ ní.

⁴ Ga̰ gərā yā go̰ rɔ̄ɔ̄ gə̄ i kə́ tétə̄ kɔ̄ɔ́, ba de gə̄ ń tə́sōn̄ ní əngen̄ tɔ́gə.

⁵ Ngé gə̄ ń kété nin̄ i ngé ndān̄ gə̄ ní, ngɔlaā a rāān̄ i kəla yā madə̄də́ gə̄ yā kəngeń yá̰a̰ kəsa, ba ngé gə̄ ń kété nin̄ i ngé ɓō gə̄ ní, ngɔlaā rāān̄ kəla to̰ alé. Dəyá̰ kə́ kujə gə̄gē ojə ngán gə̄ nja sīrí, ba rɔ̄ kó̰ó̰ ngáń kósə ndəlē kɔ̄ɔ́.

⁶ I Kɔ́ɔ̄ɓē n i nge rāā kadə̄ deē oy ō, ndi kə kumneé ō ní. I ni n i nge kaw̄ kə deé ɓádá ō, teē seneé ō ní.

⁷ I Kɔ́ɔ̄ɓē n i nge rāā kadə̄ deē tél nge rɔ̄ tō ndoō ō, nge kənge yá̰a̰ ō ní. Ni i nge tél kə deé kə̄ nang tə́ ō, nge kɔsən kə̄ dɔɔ́ ō.

⁸ I ni n i nge kun nge tɔ́gə gətóó ń teē əsō ní dɔɔ́ ō, i nge kun nge rɔ̄ tō ndoō kɔ̄ɔ́ dɔ bū loo tə́ ō ba kadə̄də́ loo kə́ to ngol dan ngār gə̄ tə́ kadə̄ ndin̄neé ní. Dɔ nang malang i yā Kɔ́ɔ̄ɓē. I ni n i nge kəndā dɔ nang dɔ birə̄n tə́ ní.

⁹ Ni a ngɔ̄m̄ nge ra dɔ ndūn tə́ loo njə̄rān gə̄ tə́, banī ngé kem ndul gə̄ tá a oyn̄ kum til tə́. Tɔdɔ̄ i tɔ́gə deē n i nge tetə rɔ̄ɔ̄ kadə̄n ní alé.

¹⁰ Kɔ́ɔ̄ɓē a tetə madə̄ ba̰ā̰n gə̄ rɔ̄ɔ̄. Ni a ndi dɔ rā̰ tə́ yā ndángəń rɔ̄n dɔdə́ tə́. Kɔ́ɔ̄ɓē a gān̄g sarya dɔ de gə̄ tə́ bátə́ ta ngóy dɔ nang tə́. A əndā mban̄g yān ń urən̄ yibə̄ ngār dɔn tə́ gə̄rān̄neé ní ō, a adə̄ mban̄g ní tɔ́gə ō, a ɔsə gɔnən ō.

¹¹ Gō tə́ anī Elkana tél aw̄ gogə́ ɓē yān kə́ Rama tə́. Ba ngōn̄ tá na̰y gogə́ Silo yā rāā kəla yā Kɔ́ɔ̄ɓē ta kum Eli nge tun̄ yá̰á̰ tə́.

Ngán Eli gə̄

¹² Ngán Eli gə̄ i ngé tun̄ yá̰á̰ kə́ háĺdə́ nujə kɔ̄ɔ́ gə̄. Nin̄ gerə̄n̄ Kɔ́ɔ̄ɓē alé.

¹³ Háĺ kə́ majaĺ ń a rāān̄ kə gír de gēé ní n toó: Tītə̄ ń toō ré deē kə́rēý tɔ̄l̄ dā̰ yā tun̄ anī, dan ń a ndīrə̄n̄ dā̰ ní ngōn̄ nge kəla yā nge tun̄ yá̰a̰ a reē kə gində̄ kə́ tan i mətá jīn tə́

¹⁴ yā kɔsəń dā̰ dɔ horoó kem jóó. Ká jóó ní i jóo gində̄ kə́ bo, aké i kə́ dūú, aké i jóó nánjə gə̄gē anī, ni a tɔ́sə̄ i dā̰ kə́ kemeé. Dā̰ malang ń gində̄ kə́ ta mətá a teēń ní i yā nge tun̄ yá̰a̰. Yá̰á̰ ń ngán Eli gə̄ rāān̄ kə ngán Israel gə̄ malang ń a aw̄n̄ Silo ní n noó.

¹⁵ Kə́rēý gə̄ anī pá tá kadə̄ róōn̄ yibə̄ dā̰ ń tɔ̄lə̄n̄ yā tun̄ ní, ngōn̄ nge kəla yā nge tun̄ yá̰a̰ a reē ba a əda deē ń a tun̄ yá̰á̰ ní na: Ādə̄m̄ dā̰ kə́ yā tə́ngā tām̄ yā nge tun̄ yá̰á̰ tə́. Ni a taā dā̰ kə́ ndīr̄ jīí tə́ aĺ bátə́. Ni-ndigə i dā̰ kə́ mbōl̄ ngóy.

¹⁶ Ba ré deē ní tél ədan na: Ādə̄ róōn̄ yibə̄ dā̰ ní horoó pá tá ún dā̰ ń kemií ndigə ní anī ngōn̄ ní a tél a ədan na: M-ɔ́də alé. m̄-gḛy kadə̄ ādə̄m̄ ngɔr ń toō tə́. Ba ré ī-gḛy aĺ a m-ā m̄-taā kə gúú.

¹⁷ Majaĺ yā balsáa gə̄ ní i kə́ bo ngá̰ý ta kum Kɔ́ɔ̄ɓē tə́, tɔdɔ̄ nin̄ rāān̄ yá̰á̰ kə́ tun̄ yā Kɔ́ɔ̄ɓē i yá̰á̰ kə́ karī tə́.

¹⁸ Ba Samuel ń ni i ngōn̄ ní a rāā kəla i ta kum Kɔ́ɔ̄ɓē tə́. Kūbə̄ kə́ gírən tə́ i epod lḛ́ḛ.

Gír kojə yā Samuel

¹⁹ Kə dɔ ɓāl̄ gə̄ ń noō kó̰o̰n a ur̄ ngōn̄ kūbə̄ kūl̄ a aw̄ń adə̄n. A aw̄ń i dan ń nin̄ kə ngaaneé a aw̄n̄ Silo tun̄ yá̰á̰ kə́ kə dɔ ɓāl̄ gēé tə́ ní.

²⁰ Eli tɔ́r̄ tan dɔ Elkana tə́ ō, dɔ nə̄yá̰n tə́ ō, ba əda Elkana na: Ādə̄ Kɔ́ɔ̄ɓē adī ngáń kə́ rang gə̄ kə dəyá̰ ń toō kum gótə ngōn̄ ń i kə́ kadə̄ Kɔ́ɔ̄ɓē tə́ ní. Gō tə́ anī Elkana nin̄ kə Ana tél aw̄n̄ ɓēé.

²¹ Kɔ́ɔ̄ɓē dḭḭ̄ Ana adə̄ ojə ngáń kə́ dəngam gə̄ mətá ō, kə́ dəyá̰ gə̄ jōó ō ɓáý to̰. Ba Samuel ń ni i ngōn̄ ní tɔgə kə̄ ta kum Kɔ́ɔ̄ɓē tə́.

Eli kɔ̄l̄ kə ngánən gēé

²² Eli tɔgə ɓə́gá ngá̰ý kɔ̄ɔ́. Dan ń ni oō yá̰á̰ ń ngánən kə́ dəngam gə̄ a rāān̄ kə ngán Israel gēé ní ō, ɓīī ń a ɓīīn̄ kə dəyá̰ gə̄ ń ɔsən̄ dɔdə́ naā tə́ ta kújə kənge naā tə́ ní ō anī,

²³ ədadə́ na: Ī-rāāī yá̰a̰ beé i tām̄ rí tə́? De gə̄ malang a ədan̄ i najə̄ háĺsí kə́ majaĺ.

²⁴ Ngánə́ḿ gə̄, ādī asəsí. Najə̄ yāsí ń deē yā Kɔ́ɔ̄ɓē gə̄ a ɔrə̄n̄ á m-ōō ní i najə̄ kə́ majaĺ ngá̰ý.

²⁵ Ré i deē n rāā majaĺ kə deē madə̄neé anī Nə́ɓā a ra danaá yā mā̰ȳdə́ naā tə́. Ba ré deē rāā majaĺ i kə Kɔ́ɔ̄ɓēé anī, i náā n asə ra danaá yā mā̰ȳ ní? Banī najə̄ ń bɔbə̄də́ ədadə́ ní usədə́ alé. Tɔdɔ̄ Kɔ́ɔ̄ɓē ndigə kadə̄ oyn̄.

²⁶ Ba Samuel ń ni i ngōn̄ ní na̰y kə̄ loo tɔgə tə́ ō, kə̄ loo majə tə́ ō, kum kə kété kété, ta kum Kɔ́ɔ̄ɓē tə́ ō, ta kum de gə̄ tə́ ō.

Kənda kə́ a ənda Eli kə deē gēé

²⁷ Deē yā Nə́ɓā kógə̄ḿ reē ənge Eli ba ədan na: Najə̄ ń Kɔ́ɔ̄ɓē əda ní n toó: Kété dan ń kaaí gə̄ i gíŕ tɔ́gə yā mban̄g Parao̰ tə́ dɔ nang kə́ Ejiptə tə́ ní, m̄-tḛḛ̄ kumdə́ adə̄ a̰a̰ ger̄mə̄n̄.

²⁸ Dan de gə̄ kə́ gír ɓē yā ngán Israel gə̄ tə́ malang ní, i kaaí Aaro̰ n m̄-gə̄rān kadə̄ i ni n i nge tun̄ yá̰a̰ yāḿ kə́ kadə̄ al̄ aw̄ dɔ loo tun̄ yá̰a̰ yāḿ tə́ ō, róō kajaja ō, ra ta kumḿ tə́ kə epod. Tá yá̰a̰ malang ń ngán Israel gə̄ a tun̄ adə̄mə̄n̄ ní, m̄-tél kə núsənneé m-ādə̄n ō, m-ādə̄ ngánən gə̄ ō, ngán kaan gə̄ ō.

²⁹ Ba ī-kídī yá̰a̰ tun̄ gə̄ kə yá̰a̰ ndējə̄ gə̄ ń m-ə́da kadə̄ de gə̄ reēn̄neé kem loo kə́ táĺ tə́ ní i tām̄ rí tə́? Ī-ɓōĺ ngání gə̄ tɔȳm̄ mā tɔdɔ̄ ngán Israel gə̄ ń i deē yāḿ gə̄ ní reēn̄ kə yá̰a̰ ndējə̄ gə̄ adə̄mə̄n̄, anī ə́saī loon kə́ majə majə gə̄ kɔ̄ɔ́ malang ə̄ndāīneé yibə̄sí i tām̄ rí tə́?

³⁰ I beé ɓá ní, mā ń i Kɔ́ɔ̄ɓē Nə́ɓā yā ngán Israel gə̄ ní, yá̰á̰ ń m-ā m-ə́daī ní n toó: Kété ní m-ə̄nī ndūḿ m-ādə̄ gír kojə yāí ō gír deē yāí gə̄ ō, m-ə́da na i sḭḭ̄ n i ngé tun̄ yá̰a̰ yāḿ gə̄ bátə́ kə̄ no tə́ ní. Ba ngɔlaā ní i tītə̄ ń noō to̰ alé adə̄ m-ə́dá wáńg. Tɔdɔ̄ de gə̄ ń ɓōlə́n̄ ndílə́ḿ ní mā m̄-ɓōĺ ndíĺdə́ ō, de gə̄ ń a kídə̄mə̄n̄ ní a rāān̄də́ nja bə̄yā̰ kə́ gogə́ tə́ ō.

³¹ Ndɔ̄ gə̄ a reēn̄ noó kadə̄ de kə́ ngáā ngáā gə̄ kə́ gír kojə yāí tə́ ō, kə́ gír kaa yāí tə́ ō ní, m-ā m-ɔ̄r̄də́ kɔ̄ɔ́ kadə̄ deē a a̰a̰ de kə́ tɔgə ɓə́ga ta kújí tə́ to̰ alé.

³² Madí ń ā ī-rāāī naā dɔ loo tə́ seneé ní, ā á̰a̰n loo rāā kəla tə́ kem loo kə́ táĺ tə́ ō, ā á̰á̰ yá̰á̰ kə́ majə gə̄ malang ń ni a rāā kə ngán Israel gēé ní ō. Banī de kə́ tɔgə ɓə́gá kə́ gír kojə yāí tə́ a gətóo i kə́ bátə́ gə̄ tə́.

³³ Ɓá tā ba m-ā m-ə́ya̰ deē kógə̄ḿ kə́ gír yāí tə́ kadə̄ a ra ngɔr kadə loo tun̄ yá̰a̰ yāḿ tə́, yā rāań kadə̄ ī-nōō, kadə̄ man̄ nōō ndum kumií dɔí tə́ ō, kadə̄ wōn̄g rāāī ō. Ba gotə de kə́ ngáā ngáā gə̄ malang kə́ gír kojə yāí tə́ a oyn̄ malang.

³⁴ Yá̰á̰ ń ā ī-gerə̄ń kadə̄ najə̄ ń m-ə́da toó i najə̄ kə́ rɔ̄kum ní, i yá̰á̰ ń a rāā yā reē kə̄ dɔ ngání kə́ dəngam kə́ jōó gə̄ ń i Hopəni nin̄ kə Pinas ní tə́: Nin̄ jōó mbak a oyn̄ ndɔ̄ kógə̄ḿ beē.

³⁵ Gō tə́ anī m-ā m̄-gə̄rā nge tun̄ yá̰á̰ kə́ sew kə́ ni a rāā i yá̰á̰ ń kemḿ ndigə ní ō, yá̰á̰ ń ɓōn i kemḿ tə́ ní ō. M-ā m̄-rāā kadə̄ gír kɔjə yān a ndi kem kəla tun̄ yá̰á̰ tə́ ndi kə́ dan gān̄g aĺ. Ni a njə̄rā i ta kum mban̄g yāḿ ń urən̄ yibə̄ dɔn tə́ ní ngándáńg.

³⁶ Ba de kə́ gír kojə yāí tə́ ń a na̰y ní a aw̄ yā kəsō kə̄ nang tə́ no nge tun̄ yá̰á̰ ní tə́ najə̄ yā súū kə́ kum mbutə tə́ ō, yá̰a̰ kəsa tə́ ō, ba a əda na: m̄-rāāī ɓɔ́, ə̄ndām̄ tū kəla kógə̄ḿ yā ngé tun̄ yá̰a̰ gə̄ tə́, ādə̄ m-ə́ngeń yá̰a̰ kəsa kə́ taḿ tə́.