1 SAMUEL 18 - Bibəl ta Sar̄

¹ Dan ń Dabid a tɔ̄l̄ ta najə̄ ń ɔr̄ kə Saulú ní anī nel̄ Jonatan ngōn̄ Saul seneé ngá̰ý, adə̄ tárən tītə̄ rɔ̄n nəkɔ́ beē.

² Ndɔ̄ ń noō tə́ Saul ngɔ̄m̄ Dabid rɔ̄n tə́ ba əya̰n adə̄ tél aw̄ ɓē bɔbə̄neé alé.

³ Jonatan əhɔ madə̄ naā kə Dabidí tɔdɔ̄ tárən tītə̄ rɔ̄n nəkɔ́ beē.

⁴ Ni-ɔr̄ kūbə̄ kə́ rɔ̄n tə́ ń əla dɔ madə̄ gə̄ tə́ ní ō, ró̰ȳ kūbə̄ áskar yān kə́ rɔ̄n tə́ gə̄ ō, adə̄ Dabid. Adə̄n kaskar yān ō, ga̰ gərā yān ō, ndāŕ do̰ō̰ ɓōdə̄ yān ō.

⁵ Loo malang ń Saul əla Dabid tū tə́ ní, kəla kə́ tū tə́ njə̄rā majə. Saul əndān dɔ ngé rɔ̄ɔ̄ gə̄ tə́. Nel̄ de gə̄ malang seneé ō, nel̄ ngé kəla gə̄ yā Saul seneé ō.

Saul sāā tɔ̄l̄ Dabid

⁶ Dan ń Dabid tɔ̄l̄ Pilistin ní gír gān̄g á ngé rɔ̄ɔ̄ gə̄ télən̄ kə̄ ɓēé ní, dəyá̰ gə̄ teēn̄ kem ɓē gə̄ kə́ gō nang kə́ Israel tə́ malang kə̄ ndágá ba tə́nīn̄ ta mban̄g Saul kə pāá ō, kə ndāmāá ō. De gə̄ əndan̄ kɔdə ō, yá̰á̰ kə́ ɓār̄ gōsə̄ kə́ rang gə̄ ō, urən̄ kɔĺ rɔ̄nel̄ ō.

⁷ Dəyá̰ gə̄ ń a ndāmə̄n̄ naā ní unən̄ pā ədan̄ na: Saul tɔ̄l̄ madə̄ ba̰ā̰n gə̄ i dūbú ba Dabid tɔ̄l̄ i dūbú kutə.

⁸ Wōn̄g rāā Saul ngá̰ý tām̄ najə̄ ní nelə̄n alé. Ni-əda na: Ɔjən̄ yā Dabid i dūbú kutə ba yāḿ mā ɓáa i dūbú kógə̄ḿ beē ní. Na̰y i kadə̄ əndānən̄ mban̄g ngóy tā.

⁹ Əla gír ndɔ̄ ń noō tə́ ní Saul a a̰a̰ Dabid i kə kum sə̄wāá.

¹⁰ Teē kə kōŕneé anī ndíĺ kə́ majaĺ kógə̄ḿ ḭḭ rɔ̄ Nə́ɓā tə́ reē udə kem Saul tə́ ba rāān adə̄ a̰a̰ oy oy kem kújə yān tə́. Dabid ugə kənde adə̄ Saul tītə̄ ń a ugəń kété gə̄ ní, ba Saul ndi i kə nəngaá jīn tə́.

¹¹ Saul un nənga kə̄ dɔɔ́ ba əda na: M-ā m-ɔ́sə Dabid yā kəren kadə ndogə̄ mbal̄ tə́. Banī Dabid əja rɔ̄n kɔ̄ɔ́ ta nənga tə́ nja jōó.

¹² Loo ń noō tə́ Saul ɓōĺ Dabid, tām̄ ni ger̄ kadə̄ Kɔ́ɔ̄ɓē i naā tə́ seneé ba əya̰n ni kɔ̄ɔ́.

¹³ Ni-ɔr̄ Dabid rɔ̄n tə́ kɔ̄ɔ́ ba əndān adə̄ ni i ngol áskar kə́ dūbú gə̄. Adə̄ Dabid a un dɔ de gə̄ aw̄ń ta rɔ̄ɔ̄ tə́ ō, téləń sedə́ ō.

¹⁴ Yá̰a̰ malang ń teē kə de gēé yā kaw̄ rāā ní rāān̄ majə ō, Kɔ́ɔ̄ɓē i naā tə́ seneé ō.

¹⁵ Dan ń Saul a̰a̰ yá̰á̰ kə́ bo ngá̰ý gə̄ ń Dabid rāā ní anī ni ɓōlə́n kɔ̄ɔ́.

¹⁶ Banī de gə̄ malang kə́ gō nang kə́ Israel tə́ ō, kə́ gō nang kə́ Juda tə́ ō, tárən̄ Dabid, tɔdɔ̄ i ni n un dɔdə́ aw̄ń sedə́ ta rɔ̄ɔ̄ tə́ ō, téləń sedə́ ō ní.

Dabid taā Mikal kə́ ngōn̄ Saul

¹⁷ Saul əda Dabid na: Ngōnə̄ḿ kə́ dəyá̰ kə́ ngatɔ́gə́ ń toō rīn na i Merab. I ni n m-ā m-ādī seneé kadə̄ ī-taān ní. Banī ə́hɔ rɔ̄í tɔgə loo rāā kəla yāḿ tə́ ba ī-rɔ̄ɔ̄ rɔ̄ɔ̄ gə̄ yā Kɔ́ɔ̄ɓē. Saul gír̄ kemən tə́ kété na: Jə-lōōī tɔ̄lən kə jījí ba ādə̄ i Pilistin gə̄ tá tɔ̄l̄nən̄.

¹⁸ Dabid əda Saul na: Mā i náā, aké gír kaaḿ i náā, aké gír yā bɔbə́ḿ i náā dɔ nang kə́ Israel tə́ á kadə̄ m̄-tél um mban̄g ní?

¹⁹ Ba ndɔ̄ ń kadə̄ Merab taāń Dabid tə́ anī Saul unən adə̄n i kə Adriel kə́ Abel Mehola tá kadə̄ taān.

²⁰ Ba ngōn̄ Saul kə́ dəyá̰ ń rīn na i Mikal ní rāā tɔdɔ̄ Dabid ngá̰ý. Ba dan ń ədan̄ Saul gotə anī Saul a̰a̰ kadə̄ i yá̰á̰ kə́ majə.

²¹ Ni-əda kə̄ kemən tə́ na: M-ā m-adə̄n Mikal kadə̄ tél gūmbə̄ kə́ yā kəhɔnneé kadə̄ əsōń jī Pilistin gə̄ tə́. Adə̄ malang ní ɓáa Saul mēr̄ Dabid tél umən i nja jōó.

²² Saul əda ngé kəla yān gə̄ na: Ɔ̄rī najə̄ ń toō loo mundə̄ tə́ kə Dabidí ə́dainiī na: Nel̄ mban̄g seí ō, jḭ̄ ngé kəla yān gə̄ malang jə-táriī ō ní ī-tél mum mban̄g.

²³ Ngé kəla yā Saul gə̄ aw̄ ədan̄ Dabid najə̄ ní. Anī Dabid ədadə́ na: Sḭḭ̄ á̰a̰ī kadə̄ tél um mban̄g ní i yá̰á̰ kə́ hɔliyɔ a? Tá mā i nge ndoō ō, de kə́ bo aĺ ō.

²⁴ Ngé kəla gə̄ yā Saul télən̄ kə najə̄ gə̄ ń Dabid ɔr̄ sedə́ ní aw̄ ədan̄ Saul. Nin̄ ədanən̄ na: Najə̄ gə̄ ń Dabid ɔr̄ sejí ní n noó.

²⁵ Anī Saul əda na: Āw̄ ə́daī Dabid na: Kadə̄ karī kə́ tām̄ yā taā naā tə́ ń mban̄g a sāā ní i ta mɔtə Pilistin gə̄ ɓú kógə̄ḿ ngóy yā daləń ba̰ā̰ dɔ madə̄ ba̰ā̰n gə̄ tə́. Saul núm̄ kəla Dabid jī Pilistin gə̄ tə́ i tītə̄ ń noō.

²⁶ Ngé kəla gə̄ yā Saul aw̄ ədan̄ Dabid najə̄ ní, anī ni a̰a̰ kadə̄ yá̰á̰ ń mban̄g gān̄g dɔn tə́ ní i yá̰á̰ kə́ majə, adə̄ ni ndigə tél um mban̄g. Kété pá tá kadə̄ ndɔ̄ ń mban̄g ɔjə ní asə anī.

²⁷ Dabid nin̄ kə deē yān gēé aw̄ tɔ̄lə̄n̄ Pilistin gə̄ ɓú jōó ba reē kə ndāŕ ta mɔtədə́ adə̄ tə́dan̄ ta kum Saul tə́ yā kadə̄ ni téləń umən. Loo ń noō tə́ Saul adə̄ ngōnən Mikal taā Dabid.

²⁸ Dan ń Saul a̰a̰ ō, ger̄ ō, kadə̄ Kɔ́ɔ̄ɓē i naā tə́ kə Dabid ō, kadə̄ ngōn̄ kemən kə́ dəyá̰ ń rīn na i Mikal ní tár Dabid ō anī,

²⁹ ni ɓōĺ Dabid tɔȳ kə́ kété ɓáý ō, tél madə̄ ba̰ā̰ Dabid i kə́ mbóńg gə̄ tə́ ō.

³⁰ Dan ngeé ń noō tə́ ní ngār gə̄ yā Pilistin gə̄ teē a rɔ̄ɔ̄n̄ ngán Israel gə̄. Ba kə dɔ kaw̄də́ rɔ̄ɔ̄ tə́ gə̄ malang ní Dabid rɔ̄ɔ̄ tɔȳ gotə ngol áskar gə̄ yā Saul malang adə̄ rīn ɓār̄ ngá̰ý.