1 SAMUEL 16 - Bibəl ta Sar̄

Nə́ɓā gə̄rā Dabid kadə̄ ndi mban̄g

¹ Kɔ́ɔ̄ɓē əda Samuel na: Mə̄kɔ́ m̄-mbātə́ Saul kɔ̄ɔ́ ō, ni i mban̄g yā ngán Israel gə̄ to̰ aĺ ō, ba ḭ̄ ā ī-to i dan nōōn tə́ bátə́ a? Ī-tūr̄ yibə̄ kem gajə dā̰ yāí tə́ ba ɔ̄r̄ dɔɔ́. M-ə́laī ɓē Jese kə́ Betlehem, tɔdɔ̄ mban̄g ń m̄-gə̄rān ní i dan ngánən gə̄ tə́.

² Samuel əda na: M-ā m-āw̄ i ba̰ý? Ré Saul oō anī a tɔ̄lə̄m̄. Kɔ́ɔ̄ɓē əda Samuel na: Ā ə́hɔ mandə man̄g jīí tə́, ba ā ə́da na ī-reē na i tun̄ yá̰á̰ yā kadə̄ Kɔ́ɔ̄ɓē.

³ Ba ā ī-ɓāŕ Jese kadə̄ reē loo tun̄ yá̰á̰ ní tə́. Loo ń noō tə́ mə̄kɔ́ m-ā m-ɔ́jiī yá̰á̰ ń kadə̄ ī-rāā ní. Deē ń m-ā m-ɔ́jiī seneé ní, ā úr yibə̄ dɔn tə́ yā kɔr̄ń kamə̄n kadə̄m̄.

⁴ Samuel rāā yá̰á̰ ń Kɔ́ɔ̄ɓē ədan ní. Ni-aw̄ Betlehem anī kum kɔɔ̄ kə́ kem ɓēé gə̄ teē tə́nīn̄ tan kə sōlōó kekəre ba dəjenən̄ na ké reē i reē kə́ majə nəkɔ́ wa.

⁵ Anī ni ədadə́ na: A̰á̰ā̰, m̄-reē i tun̄ yá̰á̰ tə́ yā kadə̄ Kɔ́ɔ̄ɓē. Ní ī-tə́goī rɔ̄sí ādə̄ unjə̄ njáý njáý ba ī-reē āwī seḿ loo tun̄ yá̰á̰ tə́. Samuel mēr̄ Jese nin̄ kə ngánən kə́ dəngam gēé kadə̄ tə́gon̄ rɔ̄də́ kadə̄ unjə̄ njáý njáý ba kə aw̄n̄ loo tun̄ yá̰á̰ ní tə́ ō.

⁶ Loo ń nin̄ ugə̄n̄ ní Samuel a̰a̰ Eliab anī əda kə̄ kemən tə́ na: Deē ń Kɔ́ɔ̄ɓē a ur yibə̄ dɔn tə́ mandang ní n ra noḿ tə́ toō.

⁷ Banī Kɔ́ɔ̄ɓē əda Samuel na: Ī-lōō ka̰a̰ gidən kə́ ndágá kə́ majə ō, ka̰a̰ ngālən kə́ ngá̰ý ō. Tɔdɔ̄ m̄-gērān alé. Najə̄ ń toō i najə̄ ka̰a̰ yá̰á̰ ń kə́ deē ndul tə́ alé. De gə̄ a a̰a̰n̄ i gidə deē ndágá banī Kɔ́ɔ̄ɓē a a̰a̰ i kem deē.

⁸ Gō tə́ anī Jese ɓāŕ Abinadab adə̄ mān̄ ta kum Samuel tə́, banī ni-əda na: I ni ń toō n Kɔ́ɔ̄ɓē gə̄rān ní aĺ ō.

⁹ Jese adə̄ Sama mān̄ ta kum Samuel tə́ banī ni-əda na: I ni ń toō n Kɔ́ɔ̄ɓē gə̄rān ní aĺ ō.

¹⁰ I beé n ngán Jese gə̄ sīrí mānə̄n̄neeé ta kum Samuel tə́ ní banī Samuel əda Jese na: Kɔ́ɔ̄ɓē gə̄rā deē kógə̄ḿ dandə́ tə́ alé.

¹¹ Gō tə́ anī Samuel dəje Jese na: Balsáa yāí gə̄ i laā malang a? Jese ədan na: Nge kə́ dūú na̰y noó ɓáý. Ni a ngɔ̄m̄ i yá̰a̰ kul̄ gə̄. Anī Samuel əda Jese na: Ə́la gōn tə́ ādə̄ reē. Ré ni ugə̄ pá tá j-a j-əsaī yá̰á̰ ɓáý.

¹² Loo ń noō tə́ Jese əla gō ngōnən kə́ dūú ní tə́ adə̄ reē. Ngōnən ní i de kə́ kərē kasə ō, ta kumən majə deē ō, balsáá ngá̰ý ō. Kɔ́ɔ̄ɓē əda Samuel na: Ḭ́ḭ dɔɔ́ úr yibə̄ dɔn tə́ na i ni.

¹³ Samuel un yibə̄ ń kem gajə dā̰á̰ ní ur dɔ Dabid tə́ ta kum ngákó̰o̰n gə̄ tə́. Əla gír i ndɔ̄ ń noō tə́ n Ndíĺ Kɔ́ɔ̄ɓē reēń dɔ Dabid tə́ ní. Gō tə́ anī Samuel ɔr̄ dɔɔ́ ta kaw̄ Rama.

¹⁴ Ndíĺ Kɔ́ɔ̄ɓē əya̰ Saul ba ndíĺ kə́ majaĺ kógə̄ḿ kə́ ḭḭ rɔ̄ Kɔ́ɔ̄ɓē tə́ tá reē a tápə̄ Saul.

¹⁵ Anī ngé kəla yā Saul gə̄ ədanən̄ na: Jə-ger̄ kadə̄ ndíĺ kə́ majaĺ kógə̄ḿ kə́ ḭḭ rɔ̄ Nə́ɓā tə́ reē a tápī.

¹⁶ Kɔ́ɔ̄jí ɔ̄r̄ najə̄ na jḭḭ i tām̄ yāí tə́. J-a jə-sāā deē kógə̄ḿ kə́ ger̄ kugə kənde majə yā kadī, kadə̄ ré ndíĺ kə́ majaĺ kógə̄ḿ kə́ ḭḭ rɔ̄ Nə́ɓā tə́ reē a njə̄ɓāī anī kɔ́ɔ̄ a ugə kənde dɔí tə́ kadə̄ i sóí tə́.

¹⁷ Saul əda ngé kəla yān gə̄ na: Ré i beé anī ī-sāāī gōsə̄ kógə̄ḿ kə́ ugə kənde majə ī-reēī seneé ādə̄mī.

¹⁸ Anī nge kəla kógə̄ḿ əda na: J-ədaī kə̄ laā aĺ ní m̄-ger̄ deē kógə̄ḿ noō, deē ní i ngōn̄ Jese kə́ Betlehem. Ni i gōsə̄ kə́ ugə kənde majə ngá̰ý. I de kə́ nge wur kil ō, go̰ rɔ̄ɔ̄ ō. Najə̄ kɔrə̄n to ngáā ō, i de kə́ majə deē ō, Kɔ́ɔ̄ɓē i naā tə́ seneé ō.

¹⁹ Saul əla de gə̄ rɔ̄ Jese tə́ kadə̄ əla kə ngōnən Dabid ń a ngɔ̄m̄ yá̰a̰ kul̄ gə̄ ní kə adə̄n.

²⁰ Jese əhɔ kərō kógə̄ḿ ō, un mápa ō, sɔl kasə nduú ō, əhɔ ngōn̄ bə̄yā̰ ō, adə̄ Dabid kadə̄ aw̄ń adə̄ Saul.

²¹ Dabid aw̄ ugə̄ rɔ̄ Saul tə́ ba rāā kəla yā Saul. Nel̄ Saul seneé ngá̰ý, adə̄ Saul unən adə̄ i ni n i nge kətō yá̰a̰ rɔ̄ɔ̄ yān gə̄ ní.

²² Gō tə́ anī Saul əla əda Jese na: M-gḛy kadə̄ Dabid rāā kəla adə̄m̄ kə̄ non tə́, tɔdɔ̄ nelə̄m̄ seneé ngá̰ý.

²³ Adə̄ dan ń ndíĺ kə́ majaĺ ń Nə́ɓā əlan ní reē a njə́ɓā Saul anī, Dabid un kənde kə̄ jīn tə́ a ugə ɓá anī ndíĺ ní əya̰ Saul adə̄ tél ndi jəke ō, rɔ̄n əsō naā tə́ ō.