1 SAMUEL 14 - Bibəl ta Sar̄

Jonatan ənī ɓūtə̄ ngé rɔ̄ɔ̄ gə̄ kógə̄ḿ yā Pilistin gə̄ rɔ̄ɔ̄

¹ Ndɔ̄ kə́rēý tə́ anī Jonatan ń i ngōn̄ Saul ní dəje nge kəla yān kə́ balsáá ń a ətō yá̰a̰ rɔ̄ɔ̄ yān gə̄ ní na: Ī-reē ādə̄ j-aw̄ bátə́ rɔ̄ɔ̄ ɓūtə̄ ngé rɔ̄ɔ̄ gə̄ yā Pilistin gə̄ ń ndin̄ sɔɔ̄ nojí gidə kə́rēý tə́ noō. Banī Jonatan əda bɔbə̄n alé.

² Bɔbə̄n Saul ndi i ta ngóy dɔ nang kə́ Gibea tə́, gír kāgə̄ gərenadə kə́ Migəron tə́. De gə̄ ń seneé ní asən̄ ɓú mehḛ́.

³ Deē ń epod i jīn tə́ ní i Ahia ngōn̄ Ahitub. Ahitub i ngōkó̰o̰ Ikabod kə́ ngōn̄ Pinas. Pinas i ngōn̄ Eli ń kété i nge tun̄ yá̰a̰ yā Kɔ́ɔ̄ɓē kem ɓē kə́ Silo tə́ ní. Jonatan ń aw̄ ní de gə̄ gerə̄n̄ gōn alé.

⁴ Yā kaw̄ kugə̄ń rɔ̄ɔ̄ ɓūtə̄ ngé rɔ̄ɔ̄ gə̄ yā Pilistin gə̄ tə́ ni, Jonatan mān̄ i mbo̰ō̰ mbal̄ gə̄ kə́ ton̄ tītə̄ ngān̄g deē beé kə́ ran̄ dām̄ jōó tə́. Kógə̄ḿ rīn na i Boses ō, kə́rēý rīn na i Sene ō.

⁵ Mbal̄ gə̄ ní kógə̄ḿ ra i dām̄ mbɔ́r ɓē kə́ ko̰ó̰ tə́, ba sɔɔ̄n̄ ta naā kə ɓē kə́ Mikəmas ō, kə́rēý ra i dām̄ mbɔ́r ɓē kə́ geleé tə́ ba sɔɔ̄n̄ ta naā kə ɓē kə́ Geba ō.

⁶ Jonatan əda nge kətō yá̰a̰ rɔ̄ɔ̄ yān na: Ī-reē ādə̄ j-aw̄ bátə́ loo ń ngé kəja mɔtədə́ aĺ gə̄ ń noō ndin̄ tū tə́ ní. Majanī Kɔ́ɔ̄ɓē a rāā yá̰a̰ tām̄ yājí tə́. Ká ré jḭḭ̄ i ngá̰ý aké i sḛ́ý beē gə̄gē anī yá̰á̰ kə́ a ɔgə̄ Kɔ́ɔ̄ɓē tetə rɔ̄ɔ̄ kadə̄jí gətóo.

⁷ Nge kətō yá̰a̰ rɔ̄ɔ̄ yā Jonatan tél ədan na: Ī-rāā yá̰a̰ malang ń kemií ndigə ní. Ī-njə̄rā kə̄ noó ādə̄ j-aw̄ na mā i gōí tə́ tītə̄ ndílí kə́ a un gōí beē.

⁸ Jonatan tél əda na: Ngɔlaā ní j-a j-aw̄ i kum kə̄ rɔ̄də́ tə́ adə̄ de gə̄ yādə́ gə̄ a a̰a̰n̄jí.

⁹ Ré ədan̄jí na: Ī-dəbaī, ī-raī gotoó noo, ī-ngóōījí ādə̄ j-aw̄ j-ugə̄ń rɔ̄sí tə́ anī, j-a jə-ra gotə kógə̄ḿ ō, j-a j-aw̄ rɔ̄də́ tə́ aĺ ō.

¹⁰ Ba ré ədan̄jí na: Ālī kə̄ dɔɔ́ rɔ̄jí tə́ laā anī, j-a j-al̄ yā kaw̄. Tɔdɔ̄ nge ń noō i yá̰á̰ kə́ ɔjə kadə̄ Kɔ́ɔ̄ɓē əladə́ kem jījí tə́ kɔ̄ɔ́.

¹¹ Adə̄ nin̄ jōó mbak ní əya̰n̄ rɔ̄də́ adə̄ Pilistin gə̄ a̰a̰n̄də́. Anī Pilistin gə̄ ədan̄ na: Á̰a̰ī Hebəro gə̄ ń ɓɔ̄ɔ̄n̄ rɔ̄də́ kem bəlo gə̄ tə́ ní n a teēn̄ noó.

¹² Ba Pilistin gə̄ ní ədan̄ Jonatan nin̄ kə nge kətō yá̰a̰ rɔ̄ɔ̄ yānneé na: Ālī kə̄ rɔ̄jí tə́ laā na j-aw̄ kə yá̰á̰ kógə̄ḿ yā kədasí. Anī Jonatan əda nge kətō yá̰a̰ rɔ̄ɔ̄ yān na: Āl̄ gōḿ tə́ na Kɔ́ɔ̄ɓē əladə́ kem jī Israel gə̄ tə́ kɔ̄ɔ́ ɓá.

¹³ Jonatan əndā jīn gə̄ kə njan gə̄ nang tə́ a alə̄ń ta kaw̄ dɔɔ́, ba nge kətō yá̰a̰ rɔ̄ɔ̄ yān al̄ gōn tə́. Jonatan tɔ́sə̄ Pilistin gə̄ tə́nīdə́. Ba nge kətō yá̰a̰ rɔ̄ɔ̄ yān i nge tɔ̄l̄də́ gōn tə́.

¹⁴ Tetə rɔ̄ɔ̄ kə́ ta kəga dɔ yā Jonatan nin̄ kə nge kətō yá̰a̰ rɔ̄ɔ̄ yānneé ní rāā adə̄ Pilistin gə̄ kutə jōó oyn̄. Loo ń Pilistin gə̄ oyn̄ tū tə́ ní i loo kə́ sḛ́ý beē ngóy.

¹⁵ Ɓōĺ kə́ ngá̰ý əsō kem gérger yā Pilistin gə̄ tə́ ō, kem de gə̄ malang ń ndin̄ kə gō gidə gérgereé ní ō. Ɓūtə̄ ngé rɔ̄ɔ̄ gə̄ kə́ ngé nujə loo gə̄ ní kə̄ngā sāā gān̄gdə́ ō. Dɔ nang ndebə, adə̄ i ɓōĺ kə́ ḭḭ i rɔ̄ Nə́ɓā tə́.

¹⁶ Ngé kum̄ loo yā Saul gə̄ ran̄ kem ɓē kə́ Gibea yā Benjamḛ tə́ a a̰a̰n̄neé loo. Nin̄ a̰a̰n̄ kósə Pilistin kə́ ngá̰ý gə̄ ń a̰a̰n̄ woy woy kə̄ loo gə̄ tə́ ní.

¹⁷ Saul əda ngé rɔ̄ɔ̄ yān gə̄ na: Ī-ɓāríī de gə̄ ba á̰a̰ī ké i náā n ḭḭ danjí tə́ laā aw̄ wa. Ɓārə́n̄ de gə̄ anī i Jonatan nin̄ kə nge kətō yá̰a̰ rɔ̄ɔ̄ yānneé n gətóon̄ ní.

¹⁸ Ndɔ̄ ngeé ń noō tə́ ní sandúkə yā Nə́ɓā i dan ngán Israel gə̄ tə́, adə̄ Saul əda Ahia na: Ādə̄ reēn̄ kə sandúkə yā Nə́ɓāá.

¹⁹ Dan ń Saul ra a ɔr̄ najə̄ kə nge tun̄ yá̰á̰ ní loo majaĺ kem gérger yā Pilistin gə̄ tə́ i kum kə̄ kété kété. Anī Saul əda Ahia na kə lōō gír sāā kem ndigə yā Nə́ɓā tə́.

²⁰ Saul nin̄ kə de gə̄ ń seneé ní kánə̄n̄ naā ba aw̄n̄ ta rɔ̄ɔ̄ tə́. Madə̄ ba̰ā̰də́ gə̄ télən̄ kə kaskaraá kə̄ dɔ naā tə́ tɔ̄lə̄n̄neé naā, adə̄ yá̰a̰ a̰a̰ gō naā aĺ bátə́ dɔ dandə́ tə́.

²¹ Hebəro gə̄ ń əlan̄ dɔdə́ gíŕ tɔ́gə yā Pilistin gə̄ tə́ aw̄n̄neé rɔ̄ɔ̄ tə́ sedə́ ní, tél ɓɔ̄ɔ̄n̄ rɔ̄də́ kə ngán Israel gə̄ ń nin̄ i kə Saul ō, Jonatan ō ní.

²² Gotə de gə̄ malang kə́ Israel tə́ ń ɓɔ̄ɔ̄n̄ rɔ̄də́ gō nang kə́ mbalá yā Epəraim tə́ ní, dan ń oōn̄ kadə̄ Pilistin gə̄ a̰ȳn̄ naā anī, teē ndɔ̄də̄n̄də́ ō, rɔ̄ɔ̄n̄də́ ō.

²³ Kɔ́ɔ̄ɓē tetə rɔ̄ɔ̄ adə̄ Israel gə̄ ndɔ̄ ń noō tə́ i tītə̄ ń noō. Rɔ̄ɔ̄ ní aw̄ bátə́ mān̄ ɓē kə́ Bet Aben kum kə̄ gidə kə́ nú tə́.

Ngán Israel gə̄ ajən̄ Jonatan

²⁴ Ndɔ̄ ń noō tə́ ní de kə́ Israel tə́ gə̄ a̰a̰n̄ tápə̄, tɔdɔ̄ Saul ədadə́ na: Deē ń a əsa yá̰á̰ kété no mbang kudə tə́ kanjə̄ kadə̄ m̄-dal ba̰ā̰ dɔ madə̄ ba̰ā̰ḿ gə̄ tə́ ní ndɔ̄ĺ i dɔ kɔ́ɔ̄ tə́. Adə̄ dan ngán Israel gə̄ tə́ ní deē əsa yá̰a̰ alé.

²⁵ Nin̄ malang ugə̄n̄ kem ku kāgə̄ gə̄ tə́. Tá yibə̄ tejə to nang tə́ loo ní tə́.

²⁶ Dan ń ngán Israel gə̄ udən̄ kem ku kāgə̄ gə̄ tə́ ní, a̰a̰n̄ yibə̄ tejə kə́ a a̰ȳ nang tə́ to beé ɓá tā ba deē ɔdə tan tə́ alé, tɔdɔ̄ de gə̄ malang ɓōlə́n̄ ndɔ̄ĺ ń Saul ədadə́ najə̄n ní.

²⁷ Ba Jonatan ger̄ kadə̄ bɔbə̄n əndā gúu dɔ de gə̄ tə́ kadə̄ túbən̄ alé. Adə̄ ni-əla ta kāgə̄ ń jīn tə́ ní ɔdəń yibə̄ tejə aw̄ń tan tə́. Loo ń noō tə́ kumən a̰a̰ loo ráráńg.

²⁸ Anī deē kógə̄ḿ kə́ dan ngán Israel gə̄ tə́ ədan na: Bɔbí əndā gúu dɔjí tə́ adə̄ jə-túbī əda na: Deē ń a əsa yá̰a̰ ɓōólaā ní ndɔ̄ĺ i dɔ kɔ́ɔ̄ tə́. I yá̰á̰ ń noō n tɔ́gə de gə̄ malang gətóoń ní.

²⁹ Jonatan əda na: Bɔbə́ḿ reē i kə yá̰á̰ kə́ to rɔ̄ tō ndoó dɔ ɓē tə́. Tām̄ sḭḭ̄ kɔ́ gə̄ á̰a̰ī kadə̄ dan ń m-ɔ́də yibə̄ tejə ń toō taḿ tə́ sḛ́ý ní kumḿ a̰a̰ loo já̰já̰.

³⁰ Adə̄ ré ɓōólaā de gə̄ əsan̄ i yá̰a̰ gə̄ ń əhɔn̄ ta rɔ̄ɔ̄ tə́ jī madə̄ ba̰ā̰ gə̄ tə́ ní anī tɔ́gə́də́ kə́ yā rɔ̄ɔń Pilistin gə̄ a tɔȳ nge ń toō aĺ a?

³¹ Ndɔ̄ ngé ń noō tə́ ní tetən̄ Pilistin gə̄ rɔ̄ɔ̄, ba ngɔ̄də̄n̄də́ Mikəmas bátə́ Ayalon. Kɔr asə ngán Israel gə̄ nák,

³² adə̄ udən̄ dɔ yá̰a̰ kənge kə́ kəhɔ ta rɔ̄ɔ̄ tə́ gə̄ ń i batə̄ gə̄ kə bə̄yā̰ gə̄ kə man̄g gə̄ kə ngán man̄g gə̄ ní, əjan̄ míndə́də́ ba əsan̄də́ kə̄ loo nəkɔ́ ń mósə́də́ a̰ȳ tū tə́ ní tə́.

³³ De gə̄ a̰ȳ reē ədan̄ Saul na: Ngán Israel gə̄ rāān̄ yá̰á̰ kə́ gōtə́ aĺ kə Kɔ́ɔ̄ɓēé, tɔdɔ̄ əsan̄ dā̰ dɔ mósən tə́. Anī Saul əda na: Sḭḭ̄ i de kə́ sew aĺ gə̄. Ī-ndūbūrūī mbal̄ kógə̄ḿ kə́ bo ī-reēīneé rɔ̄ḿ tə́ ngɔr ń toō tə́.

³⁴ Ba āw̄ ə́daī de gə̄ ādə̄ náā nəkɔ́ a reē kə man̄g yān, aláa batə̄ yān rɔ̄ḿ tə́ laā. A əjan̄ míndə dā̰ yādə́ gə̄ i loo ń toō tə́ laā tá gō tə́ anī a əsan̄ ɓáý. I beé tá a rāān̄ majaĺ kə Kɔ́ɔ̄ɓēé kə ta kūl̄ kəsa dā̰ yādə́ gēé loo ń əjan̄ míndə́də́ tū tə́ adə̄ mósə́də́ a̰ȳ tū tə́ ní alé. Ndɔ̄ɔ́ ndɔ̄ ngeé ń noō tə́ ní ngán Israel gə̄ malang reēn̄ kógə̄ḿ kógə̄ḿ kə man̄g yādə́ gə̄ ń əhɔn̄ ní ba əjan̄ míndə́də́ loo ngeé ń noō tə́.

³⁵ I beé n Saul rāań loo tun̄ yá̰a̰ adə̄ Kɔ́ɔ̄ɓē ní. Loo tun̄ yá̰á̰ kə́ ta kəga dɔ ń Saul rāā adə̄ Kɔ́ɔ̄ɓē ní n noó.

³⁶ Gō tə́ anī Saul əda deē yān gə̄ na: J-awī ngɔ̄də̄ Pilistin gə̄ tə́ ndɔ̄ɔ́. J-ɔyiī yá̰a̰ kənge yādə́ gə̄ bátə́ kadə̄ loo tīī dɔjí tə́ ō, j-əya̰ī deē kógə̄ḿ ādə̄ ndi kə kumneé aĺ ō. De gə̄ tél ədanən̄ na: Yá̰a̰ malang ń á̰a̰ā̰ kadə̄ i yá̰á̰ kə́ majə ní ī-rāā. Banī nge tun̄ yá̰a̰ əda na: Ādə̄ j-oōī yā Nə́ɓā pá tá.

³⁷ Tā anī Saul dəje Nə́ɓā na ké kə n-aw̄ ngɔ̄də̄ Pilistin gə̄ tə́ wa. Ké Nə́ɓā a əla Pilistin gə̄ kem jī ngán Israel gə̄ tə́ wa. Banī Nə́ɓā ədan najə̄ ndɔ̄ ń noō tə́ alé.

³⁸ Anī Saul ɓāŕ ngār gə̄ malang ba ədadə́ na: Ə̄ndāī ma̰ȳ majə á̰a̰ī ké i yá̰á̰ rí kə́ majaĺ n i kə́ rāā ɓōólaā ní wa.

³⁹ Tītə̄ ń Kɔ́ɔ̄ɓē nge kajə ngán Israel gə̄ ndiń kə kumneé noō ní, deē ń rāā yá̰á̰ kə́ majaĺ ɓōólaā toó, ká i ngōnə̄ḿ Jonatan gə̄gē anī a oy. Ba dan de gə̄ tə́ malang ní, deē kógə̄ḿ kə́ tūrə̄n najə̄ tə́ gətóo.

⁴⁰ Loo ń noō tə́ Saul tél əda Israel gə̄ malang na: Sḭḭ̄ ī-raī dām̄ kógə̄ḿ ō, jḭḭ kə ngōnə̄ḿ Jonatan, j-a jə-ra dām̄ kə́rēý tə́ ō. De gə̄ ədan̄ Saul na: Yá̰á̰ ń á̰a̰ā̰ kadə̄ i yá̰á̰ kə́ majə ní ī-rāā.

⁴¹ Anī Saul əda Kɔ́ɔ̄ɓē na: Nə́ɓā yā Israel, ə́dájí najə̄ kə́ kumən unjə̄ wáńg wáńg. Gō tə́ anī nin̄-túgə̄n̄ wə̄lā ɓáa wə̄lā ɔjə i dɔ Saul nin̄ kə ngōnən Jonatan, banī ngán Israel gə̄ tá teēn̄ karī.

⁴² Saul əda na: Ī-túgī wə̄lā dɔjí tə́ kə ngōnə́ḿ Jonatan. Nin̄-túgə̄n̄ wə̄lā anī wə̄lā ɔjə i dɔ Jonatan.

⁴³ Saul əda Jonatan na: Ədam̄ yá̰á̰ ń ī-rāā ní. Anī Jonatan əda Saul na: I kāgə̄ kə́ jīḿ tə́ n m-ə́la ta m-ɔ́dəń yibə̄ tejə sḛ́ý m-ó̰ó̰ ní. Ba mā n toó, m-ə̄ndā dɔ rɔ̄ḿ danaá kɔ̄ɔ́ ɓá tām̄ yā yo tə́.

⁴⁴ Saul əda na: Ādə̄ Nə́ɓā rāā yá̰á̰ kə́ tōr̄ ń toō ba tél rāā ɓáý to̰. A̰á̰ā̰ Jonatan ā óy.

⁴⁵ Banī de gə̄ ədan̄ Saul na: Jonatan ń tetə rɔ̄ɔ̄ kə́ bo ngá̰ý ń toō adə̄ ngán Israel gə̄ ní kə oy a? Nge ń noō i yá̰á̰ kə́ majaĺ bátə́. Tītə̄ ń Kɔ́ɔ̄ɓē ndiń kə kumneé noō, nənga dɔn kógə̄ḿ gə̄gē a əsō nang tə́ alé. Tām̄ yá̰á̰ ń ni-rāā kem ndɔ̄ kə́ ɓōólaā tə́ ní nin̄ rāān̄ i naā tə́ kə Nə́ɓāá. I beé n ngán Israel gə̄ taān̄neé Jonatan ta yo tə́ ní.

⁴⁶ Saul lōō gír ngɔ̄də̄ Pilistin gə̄ tə́, adə̄ tél aw̄n̄ gogə́ ɓēé.

Gotə najə̄ yā Saul kə́ rang gə̄

⁴⁷ Dan ń Saul o̰o̰ ɓē dɔ Israel gə̄ tə́ ní, ni-ənī madə̄ ba̰ā̰n gə̄ malang ń ndin̄ gīrə̄n̄ gidən ní rɔ̄ɔ̄. Ni-rɔ̄ɔ̄ Moab gə̄ ō, Amon gə̄ ō, Edom gə̄ ō, mban̄g kə́ Soba ō, Pilistin gə̄ ō. Kə dɔ kaw̄n rɔ̄ɔ̄ tə́ gə̄ malang ń noō ni a tetə i rɔ̄ɔ̄. Ndɔ̄ kə́rēý tə́ ni tetə Amalek gə̄ rɔ̄ɔ̄ ɔjəń tɔ́gən kə̄ ndágá.

⁴⁸ Ni-gān̄g dɔ ngán Israel gə̄ jī ngé rɔ̄ɔ̄də́ ba kɔyń yá̰a̰ kənge yādə́ gə̄ tə́ i tītə̄ noō.

⁴⁹ Ngán Saul kə́ dəngam gə̄ i Jonatan ō, Isəbi ō, Malkisua ō. Rī ngánən kə́ dəyá̰ kə́ jōó gə̄ na i Merab ō, Mikal ō. Merab i nga tɔ́gə, ba Mikal i gidən.

⁵⁰ Rī nə̄yá̰ Saul na i Ahinoam kə́ ngōn̄ Ahimas. Rī ngol ngé rɔ̄ɔ̄ gə̄ yā Saul na i Abner kə́ ngōn̄ Ner. Ner i ngōkó̰o̰ bɔbə̄ Saul.

⁵¹ Tɔdɔ̄ Kis kə́ bɔbə̄ Saul ō, Ner kə́ bɔbə̄ Abner ō ní nin̄ i ngán Abiel gə̄.

⁵² Dan ń Saul ndiń kə kumneé ní, ni rɔ̄ɔ̄ Pilistin gə̄ kə ngangá ngá̰ý. I tām̄ najə̄ ń noō tə́ n ni a ɔyń de kə́ ngé kəhɔ rɔ̄də́ tɔgə gə̄ ō, de kə́ ngan̄g gə̄ ō áskaraá ní.