1 SAMUEL 13 - Bibəl ta Sar̄

Israel gə̄ rɔ̄ɔ̄n̄ Pilistin gə̄ ō, Saul rāā yá̰á̰ kə́ gōtə́ aĺ ō

¹ Ɓāl̄ Saul i … loo ń əndānən̄ mban̄g ní. Ni-o̰o̰ ɓē dɔ Israel gə̄ tə́ ɓāl̄ jōó.

² Ni-gə̄rā de gə̄ dūbú mətá dan Israel gə̄ tə́ kadə̄ nin̄ i ngé rɔ̄ɔ̄ yān gə̄. Kə́ dūbú jōó gə̄ ndin̄ seneé Mikəmas ō, gō nang kə́ mbalá kə́ Betel tə́ ō. Ba kə́ dūbú kógə̄ḿ gə̄ ndin̄ i kə ngōnən Jonatan kem ɓē kə́ Gibea yā Benjamḛ tə́. Saul əya̰ gotə ngán Israel gə̄ adə̄ tél aw̄n̄ ɓēé.

³ Ndɔ̄ kə́rēý tə́ anī Jonatan tɔ̄l̄ nge ko̰o̰ ɓē yā Pilistin gə̄ ń ndi kem ɓē kə́ Geba tə́ ní, anī Pilistin gə̄ oōn̄. Loo ń noō tə́ Saul adə̄ kɔ̄rə́n̄ tōw̄ dɔ nang kə́ Israel tə́ malang, tɔdɔ̄ əda na: Ādə̄ Hebəro gə̄ gerə̄n̄ gō.

⁴ Israel gə̄ malang oōn̄ kadə̄ Saul tɔ̄l̄ nge ko̰o̰ ɓē yā Pilistin gə̄, adə̄ wōn̄g na rāā Pilistin gə̄ kə Israel gēé ngá̰ý. Loo ń noō tə́ Israel gə̄ malang ɔsən̄ dɔdə́ naā tə́ rɔ̄ Saul tə́ Gilgal.

⁵ Pilistin gə̄ ɔsən̄ dɔdə́ naā tə́ yā rɔ̄ɔ̄ Israel gə̄ ō. Púsə rɔ̄ɔ̄ yādə́ gə̄ i dūbú kutə mətá ō, ngé kal̄ sə́nda rɔ̄ɔ̄ yādə́ gē i dūbú mehḛ́ ō, kutə ngé rɔ̄ɔ̄ yādə́ kə́ ngé njə̄rā kə njadə́ gə̄ i ngá̰ý tītə̄ nán̄g ngárə̄ḿnjēý kə́ ta bā tə́ ō. Nin̄ aw̄ ndin̄ Mikəmas. Loo ń ndin̄ tū tə́ ní, ré deē ra Bet Aben anī i kə̄ dām̄ kə́ gír ɓē tə́.

⁶ Dan ń de kə́ Israel gə̄ a̰a̰n̄ kadə̄ yo otə́ bḭḭ tɔdɔ̄ Pilistin gə̄ ń gīrə̄n̄də́ ní reēn̄ ngɔr ngá̰ý anī ɓɔ̄ɔ̄n̄ rɔ̄də́ kə̄ kem bəlo gə̄ tə́ ō, kem bəlo mbal̄ gə̄ tə́ ō, dɔ mbal̄ gə̄ tə́ ō, kem loo kə́ rāā gíŕ nángāá gə̄ tə́ ō, kə̄ kem bəlo kə́ ndēr̄ yā taāń man̄ ndī gə̄ tə́ ō.

⁷ Ngé kə́rēý gə̄ gāngə̄n̄ bā Jurdḛ yā kaw̄ dɔ nang kə́ Gad tə́ ō, Galaad tə́ ō. Dan ń noō tə́ ní Saul na̰y Gilgal ɓáý ō, de kə́ gōn tə́ gə̄ malang a ndewn̄ i mbée ō.

⁸ Saul ngóō kum mbang kənge naā yādə́ kə Samuelé ń Samuel ɔjən ní ndɔ̄ sīrí. Banī Samuel ugə̄ Gilgal aĺ ō, de gə̄ əlan̄ gír kəya̰n kɔ̄ɔ́ ba a tḭ̄ḭ̄n̄ i naā ō.

⁹ Anī Saul əda de gə̄ na kə reēn̄ kə yá̰a̰ tun̄ kə́ yā róō horoó ō, yá̰a̰ tun̄ kə́ tām̄ yā kem kógə̄ḿ tə́ ō, kə adə̄nən̄ laā. Gō tə́ anī nəkɔ́ ndējə̄ Nə́ɓā yá̰a̰ tun̄ kə́ yā róō horoó ní.

¹⁰ Dan ń tɔ̄l̄ ta kəla ndējə̄ Nə́ɓā yá̰a̰ tun̄ kə́ yā róō horoó ní anī Samuel ugə̄ ō. Ni-ɔtə tə́nī ta Samuel yā rāān lápə́ya.

¹¹ Samuel dəjen na ké i rí n rāā noó wa. Anī ni-tél ədan na: Dan ń m-á̰a̰ kadə̄ de gə̄ a əya̰mə̄n̄ i mbée ō, a tḭ̄ḭ̄n̄ i naā ō, ḭ̄ ūgə̄ tītə̄ ń ɔ́jəń ní aĺ ō, Pilistin gə̄ kánə̄n̄ naā Mikəmas ō ní,

¹² m̄-ə́da na Pilistin gə̄ a reēn̄ yā rɔ̄ɔ̄m̄ Gilgal kété kanjə̄ kadə̄ m̄-sɔl̄ kem Kɔ́ɔ̄ɓē. I tām̄ najə̄ ń noō tə́ n m̄-ndējəń Kɔ́ɔ̄ɓē yá̰a̰ tun̄ kə́ róō horoó kə dɔḿ ní.

¹³ Samuel əda Saul na: Ī-rāā yá̰a̰ i tītə̄ de kə́ kur̄ dɔn gətóo beē. Yá̰á̰ ń Kɔ́ɔ̄ɓē Nə́ɓā yāí ədaī kadə̄ ī-rāā ní ī-rāā i yá̰á̰ kə́ karī tə́. Nə́ngētə́ gēé ī-rāā i gō míndə ń Kɔ́ɔ̄ɓē Nə́ɓā ə́daī ní anī, Kɔ́ɔ̄ɓē a rāā kadə̄ i gír kojə yāí ń a o̰o̰ ɓē dɔ Israel gə̄ tə́ i kə́ mbóńg gə̄ tə́ ní.

¹⁴ Ba ń toō ní ā ó̰o̰ ɓē kadə̄ dan aw̄ sa̰y to̰ alé. Kɔ́ɔ̄ɓē gə̄rā deē ń kemən nəkɔ́ ndigə ní kɔ̄ɔ́ ɓá ō, ɔjə dɔn kadə̄ i ni n i ngār yā deē yān gə̄ ní ɓá ō. Tɔdɔ̄ ī-rāā yá̰á̰ ń ədaī kadə̄ ī-rāā ní alé.

¹⁵ Gō tə́ anī Samuel ɔtə əsō róbó aw̄. Ni-ḭḭ Gilgal ba aw̄ kem ɓē kə́ Gibea yā Benjamḛ tə́. Saul tə́da kutə de gə̄ ń seneé ní anī asən̄ ɓú mehḛ́.

¹⁶ Saul ō, ngōnən Jonatan ō, de gə̄ ń sedə́ ní ō, ndin̄ i kem ɓē kə́ Geba yā Benjamḛ tə́. Ba Pilistin gə̄ ndin̄ i Mikəmas.

¹⁷ Ɓūtə̄ ngé rɔ̄ɔ̄ kə́ ngé nujə loo gə̄ teēn̄ gérger yā Pilistin gə̄ tə́ ba kēgə̄n̄ naā gír loo mətá. Gír ɓūtə̄ kə́ ta kəga dɔ aw̄ kum kə̄ Opəra dɔ nang yā Sual tə́ ō,

¹⁸ kə́ nge ko̰ jōó aw̄ kum kə̄ Bet Horon ō, kə́ nge ko̰ mətá aw̄ kum kə̄ dɔ nin̄ ń i loo kə́ kḭḭ kə̄ dɔɔ́ ń deē ra dɔ tə́ anī a̰a̰ wól loo yā ɓon̄g gə̄ kum kə̄ dəla loo tə́ ní ō.

¹⁹ Dɔ nang kə́ Israel tə́ malang ní deē a̰a̰ kɔdə̄ kə́ nge koo yá̰a̰ to̰ alé, tɔdɔ̄ Pilistin gə̄ ndigən̄ kadə̄ Hebəro gə̄ oon̄ kaskar aĺ ō, nənga aĺ ō.

²⁰ Adə̄ Israel gə̄ malang a aw̄n̄ i ɓē Pilistin gēé n a ɔlən̄ ta kɔsə man̄g yādə́ gə̄ ō, kɔsə kə́ karī yādə́ gə̄ ō, kə̄ngā yādə́ gə̄ ō, gində̄ njár̄ kāgə̄ yādə́ gə̄ ō ní.

²¹ Gātə̄ kɔl ta kɔsə man̄g ō, kɔsə kə́ karī ō, kə̄ngā ō, gində̄ kə́ yā kəla ta kāgə̄ tə́ rɔ̄ɔń gír man̄g gə̄ ō ní, ré deē kēgə̄ njáŕ sə́lē arjā̰a̰ naā tə́ gír loo mətá anī, kə́ jōó gə̄ i gātə̄ kɔl ta yá̰a̰ gə̄ ń noō.

²² Adə̄ ndɔ̄ rɔ̄ɔ̄ tə́ ní ɓūtə̄ ngé rɔ̄ɔ̄ gə̄ yā Saul nin̄ kə Jonatan i kə kaskaraá aĺ ō, nəngaá aĺ ō. Ba əngen̄ i tām̄ yā Saul nin̄ kə ngōnən Jonatan tə́ ngóy.

²³ Ɓūtə̄ ngé rɔ̄ɔ̄ gə̄ kógə̄ḿ yā Pilistin gə̄ aw̄ ndin̄ ta róbə́ kə́ dūú kə́ Mikəmas tə́ ń teē mbo̰ō̰ mbal̄ gə̄ tə́ ní.