1 PIYER 5 - Bibəl ta Sar̄

Ka̰a̰ gō yá̰a̰ kul̄ gə̄ yā Nə́ɓā

¹ Ngɔlaā ní m-ā m-ɔ̄r̄ najə̄ i kə kum kɔɔ̄ gə̄ ń ndin̄ dɔ dáńsí tə́ á mā i kum kɔɔ̄ madə̄də́ ō ní. Yá̰á̰ kə́ tōr̄ ń rāā Kərist ní, mā m-á̰a̰ā̰ kə kumḿ ō. Kɔsə gɔn ń ndɔ̄ń tə́ a teēn̄neé kə̄ ndágá ní, mā i tū tə́ ō. Yá̰á̰ ń m̄-dəjesí sḭḭ̄ kum kɔɔ̄ gə̄ ní n toó:

² Ɓūtə̄ yá̰a̰ kul̄ gə̄ yā Nə́ɓā ń ɓɔ̄ɔ̄sí ní, āwī sedə́ ko̰ó̰. Ə̄ndāī kumsí gíŕdə́ tə́ majə. Ba ādī i kə́ kɔsə sesí ta rāā alé, banī ādī i kə kemsí kə́ majaá ō, kə gō ń Nə́ɓā ndigə ní ō. Ī-rāāī kəla yāsí, ba ādī i tām̄ yā kəngeń nar kə́ a reē kə rɔ̄sɔlɔ̄ɔ́ dɔ deē tə́ alé. Banī i tām̄ kəndā kə́ sḭḭ̄ kɔ́ gə̄ ə̄ndāī rɔ̄sí ta tə́.

³ Ngé gə̄ ń ɓɔ̄ɔ̄n̄də́ sesí kadə̄ á̰a̰ī gōdə́ ní, ī-lōōī rāā ngār dɔdə́ tə́, banī ādə̄ sḭḭ̄ i yá̰á̰ ndájə̄ tām̄ yā ɓūtə̄ yá̰a̰ kul̄ gə̄ tə́.

⁴ Dan ń ngār kə́ bo yā ngé kul̄ yá̰a̰ gə̄ a teē hɔy anī, sḭḭ̄ ā ə́ngeī jākā mbang kə́ to kɔsə gɔn ń gíŕ ndə́lēn a gān̄g aĺ bátə́ ní.

⁵ Ba sḭḭ̄ balsáa gə̄, majə kadə̄ ōōī ta kum kɔɔ̄ gə̄. Banī sḭḭ̄ malang ə́laī tél kə rɔ̄ɔ́ kə̄ nang tə́ kūbə̄ tə́ rɔ̄sí tə́ ī-ndiīneé kə naá. Tɔdɔ̄ makətūbə̄ yā Nə́ɓā əda na: Nə́ɓā a mbātə́ najə̄ gō ngé kɔsə rɔ̄də́ kə̄ dɔɔ́ gə̄ tə́, ba a rāā kem majə kə ngé gə̄ ń télən̄ kə rɔ̄də́ kə̄ nang tə́ ní.

⁶ I beé ní, ī-téliī kə rɔ̄sí kə̄ nang tə́ gíŕ jī Nə́ɓā kə́ tɔ́gə jīn i ngá̰ý tə́, yā kadə̄ ré ndɔ̄ ń ni-ɔjə ní ugə̄ anī, ni-ɔsəńsí kə̄ dɔɔ́.

⁷ Yá̰a̰ gə̄ malang ń rāān̄sí adə̄ ī-ndiī kə sōlōó kekəre ní, ɔ̄rī dɔsí gíŕdə́ tə́ ba ī-ɓōkíīdə́ dɔn tə́, tɔdɔ̄ i ni n i nge ka̰a̰ gōsí ní.

⁸ Əhɔī rɔ̄sí dɔ yá̰á̰ tə́ ba ī-lōōī rāā yá̰a̰ kadə̄ mān̄ dɔ majən ō, á̰a̰ī já̰já̰ dɔ rɔ̄sí tə́ ō! Tɔdɔ̄ madə̄ ba̰ā̰sí ń i diabəl ní, a ənī gir̄ gində̄ gidə loo tə́ tītə̄ ɓɔl kə́ a nōō beé, a sāań de kə́ yā kadə̄ n-əhɔ n-rə́yā̰n naā tə́ ba n-əsan.

⁹ Ī-raī ngan̄g dɔ taā kem yāsí tə́ ō, ī-dumī tan ō. Tɔdɔ̄ ī-gerī kadə̄ ngákó̰ó̰sí kə́ dɔ nang tə́ gə̄ ndin̄ i kum tápə̄ kə́ kógə̄ḿ beē nəkɔ́ ń toō tə́ ō.

¹⁰ Ba loo ń ré á̰a̰ī tápə̄ sḛ́ý oy anī, Nə́ɓā ń yá̰a̰ malang kə́ rāā kə kem majaá a ḭḭ i rɔ̄n tə́ ní, ni ń ɓāŕsí kadə̄ sḭḭ̄ i tū kɔsə gɔn yān kə́ a to ngándáńg tə́, kə gō ɓoo naā yāsí kə Kərist ní, nəkɔ́ a rāā kadə̄ ā ī-majiī ɔ̄tī kə taá ō, ni a mbūsə̄ gíŕsí kadə̄ ī-raī ngan̄g ō, a adə̄sí tɔ́gə ō, yá̰á̰ kógə̄ḿ a yéȳsí yek aĺ ō.

¹¹ Tɔ́gə i yān ni kə dɔ ɓāl̄ gə̄ ɓāl̄ gə̄! Adə̄ i tītə̄ ń noō!

Lápə́ya kə́ ta tɔ̄l̄ ta tə́

¹² m̄-ndang makətūbə̄ kə́ sḛ́ý beē ń toō m-ādə̄sí i kə ta kūl̄ Silas ń m̄-rāān i ngōkó̰ó̰jí kə́ nge ra dɔ ndūn tə́ ní. m̄-sāā i kəla go̰ kemsí tə́ ō, m̄-sāā i kədasí na kem majə yā Nə́ɓā ń sḭḭ̄ ə́hɔī gō ní, i rajə kə́ rɔ̄kum, ba kə ī-raī dɔ tə́ kadə̄ ngan̄g ō.

¹³ Ngé kán̄ naā kə́ Babilon tə́ gə̄ ń nin̄ i de gə̄ kə́ Nə́ɓā gə̄rādə́ tītə̄ yāsí ō ní, rāān̄sí lápə́ya. Ngōnə̄ḿ Mark rāāsí lápə́ya ō.

¹⁴ Ī-ɓirī naā dagə ī-rāāīneé naā lápə́ya kə́ ngákó̰o̰ naā gə̄ tə́. Sḭḭ̄ malang ń i de gə̄ yā Kərist ní, ādī kemsí sɔl̄ lɔm.