1 PIYER 4 - Bibəl ta Sar̄

De gə̄ kə́ lōōn̄ gír rāā yá̰á̰ kə́ majaĺ tə́

¹ Dan ń rɔ̄ Kərist tōrə̄n ní, majə kadə̄ i gír̄ kə́ kógə̄ḿ beē nəkɔ́ ń toō n sḭḭ̄ āwīneé dɔsí tə́ yā rań ta yá̰á̰ kə́ tōr̄ gə̄ tə́ ní ō. Tɔdɔ̄ deē ń a̰a̰ tápə̄ kem dā̰ rɔ̄n tə́ ní, nin̄-əya̰n̄ naā kə majaĺ kɔ̄ɔ́.

² Adə̄ əla gír ngɔr ń toō tə́ ní, ta ndɔ̄sí ń na̰y kə̄ kété kadə̄ ī-ndiīneé kə kumsí dɔ nang tə́ ní, majə kadə̄ ī-ndiī i kə gō kem ndigə yā Nə́ɓāá, ba i kə gō ɓō yá̰a̰ gə̄ ń a rāā de gə̄ ní to̰ alé.

³ Tɔdɔ̄ kété ní sḭḭ̄ úniī kum mbang kə́ təsó ngá̰ý ī-rāāīneé yá̰a̰ tītə̄ ń de kə́ ndágá gə̄ a rāān̄neé ní. Adə̄ sḭḭ̄ ī-rāāī yá̰á̰ kə́ majaĺ gə̄ ń ɓōn i kemsí tə́ ní ō, sḭḭ̄ i ngé kum ndaa yá̰a̰ gə̄ ō, ngé ka̰ȳ kasə kadə̄ rāāsí gə̄ ō, ngé kəsa wa gə̄ ō, ngé ka̰ȳ kasə ngá̰ý loo rɔ̄nel̄ gə̄ tə́ ō, ngé rāā ɓesə̄ kə́ majaĺ ngá̰ý gə̄ ō.

⁴ Ba ngɔlaā ní ɔr kum de kə́ ndágá gə̄ sesí ngá̰ý, tām̄ sḭḭ̄ ī-rāāī háĺ kə́ majaĺ kə́ tītə̄ ń noō gə̄ sedə́ to̰ alé, adə̄ nin̄-tájə̄n̄sí.

⁵ Banī yá̰a̰ gə̄ ń nin̄-rāān̄ ní, Nə́ɓā ń əndā dɔ rɔ̄n danaá kɔ̄ɔ́ yā rāā sarya kə de gə̄ kə́ ndin̄ kə kumdə́ ō, kə de kə́ koy kɔ̄ɔ́ gə̄ ō ní, nin̄ a ədanən̄ gíŕ ɓáý.

⁶ I tām̄ najə̄ ń noō tə́ n ɔjən̄neé de kə́ koy gə̄ Najə̄ kə́ Majə ō ní. Kété ní gāngə̄n̄ sarya dɔdə́ tə́ i tītə̄ yā gotə de gə̄ malang. Ba ɔjən̄də́ Najə̄ kə́ Majə ní i yā kadə̄ kə ta kūl̄ Ndíl kə́ Táĺ ní, nin̄-asən̄neé ndi kə kumdə́ tītə̄ ń Nə́ɓā ndiń kə kumneé ní.

Ngé kəndā kumdə́ kə gōó gíŕ yá̰a̰ gə̄ ń Nə́ɓā adə̄ tə́ ní

⁷ Ta ngóý yá̰a̰ malang dɔ i ngɔr. I beé ní ādə̄ sḭḭ̄ i de kə́ ngé kum kedə̄ gə̄ ō, ngé kəhɔ rɔ̄də́ dɔ yá̰á̰ tə́ gə̄ ō, yā kadə̄ sḭḭ̄ ásiīneé ndɔ̄ȳ Nə́ɓā.

⁸ Yá̰á̰ ń kadə̄ ī-rāāī kété no yá̰á̰ gə̄ tə́ malang ní, i kadə̄ ī-táriī naā ngá̰ý dɔ dáńsí tə́, tām̄ tár i yá̰á̰ kə́ a rāā kadə̄ deē əndā njan dɔ majaĺ kə́ ngá̰ý gə̄ tə́.

⁹ Əhɔī naā kə̄ rɔ̄sí tə́ kanjə̄ ɓar̄ najə̄ gō tə́.

¹⁰ Yá̰a̰ gə̄ ń Nə́ɓā adə̄ ní, sḭḭ̄ i ngé kəndā kumsí gírí majə gə̄. Adə̄ majə kadə̄ sḭḭ̄ kógə̄ḿ kógə̄ḿ ní, úniī yá̰á̰ kə́ sɔɔ̄ dɔsí sḭḭ̄ kɔ́ gə̄ ń Nə́ɓā adə̄sí ní ī-rāāīneé majə kə madə̄sí gēé.

¹¹ Ré deē kógə̄ḿ a ɔr̄ najə̄ anī, majə kadə̄ i yá̰a̰ gə̄ ń Nə́ɓā əda ní n ni-əda de gə̄ ní. Ré deē kógə̄ḿ a rāā kə de gēé anī, majə kadə̄ i kə tɔ́gə́ ń Nə́ɓā adə̄n ní. Yā kadə̄ tū yá̰a̰ gə̄ tə́ malang ɓáa kɔsə gɔn i yā Nə́ɓā kə ta kūl̄ Jeju Kərist, ni ń kɔsə gɔn ō, ndi dɔ de gə̄ tə́ ō, i yān kə dɔ ɓāl̄ gə̄ ɓāl̄ gə̄ ní. Adə̄ i tītə̄ ń noō!

Yá̰á̰ kə́ tōr̄ kə́ rāā deē yā Kərist tām̄ yā Kərist tə́

¹² Kó tár gə̄, yá̰á̰ kə́ tōr̄ ń rāā rɔ̄n i hor kə́ təngā ngá̰ý kə́ to dansí tə́ yā nāāsí ní, ī-lōōī kadə̄ ɔr kumsí tītə̄ kə́ i yá̰á̰ kə́ jákə́ n a rāāsí beē.

¹³ Banī ī-rāāī rɔ̄nel̄, tām̄ yá̰á̰ kə́ tōr̄ ń rāāsí tītə̄ ń rāań Kərist ō ní tə́. Yā kadə̄ ndɔ̄ń tə́ ré kɔsə gɔn yān a ɔjə rɔ̄n kə̄ ndágá anī, rɔ̄sí nelə̄ńsí ngá̰ý ō.

¹⁴ Ré tájə̄n̄sí tām̄ yā rī Kərist tə́ anī, ādī rɔ̄sí nel̄sí. Tɔdɔ̄ Ndíĺ kə́ to kɔsə gɔn ń i Ndíĺ Nə́ɓā ní, i dɔsí tə́.

¹⁵ Ādə̄ deē kógə̄ḿ dansí tə́ a̰a̰ tápə̄ najə̄ tɔ̄l̄ deē tə́ aĺ ō, ɓogə tə́ aĺ ō, yá̰á̰ kə́ majaĺ kə́ ni-rāā tə́ aĺ ō, kəla kə́ ni-əla tan tū najə̄ yā deē tə́ tə́ aĺ ō.

¹⁶ Ba ré deē a̰a̰ tápə̄ i loo deē yā Kərist tə́ anī, ādə̄ rɔ̄ kɔ́ɔ̄ sɔlə̄n alé. Ba ādə̄ ɔsə gɔn Nə́ɓā, tām̄ rī deē yā Kərist ń ɓār̄ dɔn tə́ ní tə́.

¹⁷ Tām̄ kum mbang gān̄g sarya ugə̄ kɔ̄ɔ́, ba i de gə̄ yā Nə́ɓā n a əlan̄ gír dɔdə́ tə́ ní. Ba ré sarya a əla gír i dɔjí jḭḭ̄ tə́ anī, ngé gə̄ ń mbātə́n̄ taā kem Najə̄ kə́ Majə yā Nə́ɓā ní, ta tɔ̄l̄ tadə́ a to i ba̰ý?

¹⁸ Tá tītə̄ ń makətūbə̄ yā Nə́ɓā ədań ní: Ré de kə́ súmūú ba na̰y i sḛ́ý beē kadə̄ ajənən̄ aĺ anī, de kə́ nge ra dɔ ndūn tə́ kə Nə́ɓāá tə́ aĺ ō, nge rāā yá̰á̰ kə́ majaĺ ō ní, ta tɔ̄l̄ tadə́ a to i ba̰ý?

¹⁹ I beé ní, ngé gə̄ ń a̰a̰n̄ tápə̄ tām̄ rāā kə́ nin̄-rāān̄ gō kem ndigə yā Nə́ɓā tə́ ní, majə kadə̄ na̰yn̄ kə̄ loo rāā yá̰á̰ kə́ majə tə́ kə̄ nodə́ tə́ ō, ənīn̄ kemdə́ mámák adə̄n̄ Nə́ɓā nge rāā yá̰a̰ malang ō, nge ra dɔ ndūn kə́ ənī tə́ ō.