1 KORḚNTƏ 9 - Bibəl ta Sar̄

Ngōmbang kəla Pol

¹ Mā i kɔ́ɔ̄ rɔ̄ḿ aĺ a? Mā i ngōmbang kəla aĺ a? Jeju ń i Kɔ́ɔ̄ɓē yājí ní m-á̰a̰n aĺ a? Kəla yāḿ ń m̄-rāā tām̄ yā Kɔ́ɔ̄ɓē tə́ ní i sḭḭ̄ aĺ a?

² Ká ré ta kum de kə́ rang tə́ ní mā i ngōmbang kəla aĺ gə̄gē anī, ta kumsí sḭḭ̄ tə́ ní mā i ngōmbang kəla. Tɔdɔ̄ i sḭḭ̄ n i tə́re jīḿ kə́ ɔjə kadə̄ mā i ngōmbang kəla ní, tām̄ ī-ɓooī naā kə Kɔ́ɔ̄ɓēé.

³ Najə̄ ń m̄-tél m-ə́dá ngé kəndā najə̄ dɔḿ tə́ gə̄ m-únəń najə̄ dɔḿ tə́ kɔ̄ɔ́ ní n noó.

⁴ Nə́ɓā adə̄jí ta róbə kəsa yá̰a̰ ō, ka̰ȳ yá̰a̰ ō aĺ a?

⁵ Ni-adə̄jí ta róbə kun dəyá̰ kə́ taā kem Kərist kadə̄ aw̄ sejí tītə̄ ń ngámbang kəla kə́rēý gə̄ ō, ngákó̰ó̰ Kɔ́ɔ̄ɓē gə̄ ō, Kepas ō rāān̄neé ní aĺ a?

⁶ I mā ō, Barnabas ō ngóy n Nə́ɓā ɔgə̄jí kəya̰ gír kəla kə́ jījí tə́ kɔ̄ɔ́ ní a?

⁷ I náā n rāā kəla áskar anī əgā rɔ̄n kə nar yān nəkɔ́ ní? I náā n əndā kāgə̄ nduú anī əsa kanə̄n aĺ ní? Aké i náā n ul̄ man̄g gə̄ kanjə̄ ka̰ȳ mbadə́ ní?

⁸ Nge ń noō i jī bēl̄ loo rāā yá̰a̰ yā de gə̄ ngóy a? Ndū najə̄ əda nge ń noō ō aĺ a?

⁹ Tɔdɔ̄ i kə́ ndang kem makətūbə̄ ndū najə̄ yā Moijə tə́ na: Ré man̄g a səɓā kōō anī ə́la bendə tan tə́ alé. Nə́ɓā sōl̄ i mbée tām̄ yā man̄g gə̄ tə́ a?

¹⁰ Ba mandang ní ni-ɔr̄ najə̄ ń toō i tām̄ yājí jḭḭ̄ tə́ aĺ a? Rɔ̄kum ndangən̄ najə̄ ń toō i tām̄ yājí jḭḭ̄ tə́. Tɔdɔ̄ i gáŕ kadə̄ nge ndɔr̄ əndā kemən dɔ kənge yá̰á̰ kə́ ndɔrɔ́ tə́ ō, nge səɓā kōō əndā kemən dɔ kənge njár̄ kōō tə́ ō.

¹¹ Jə-dubə̄ najə̄ yā Nə́ɓā kemsí tə́ ní ré jə-taā yá̰á̰ kə́ dɔ nang tə́ jīsí tə́ anī, jə-rāā i yá̰á̰ kə́ al̄ ngandə̄ a?

¹² Ré de kə́ rang gə̄ asən̄ taā yá̰a̰ jīsí tə́ anī, jḭḭ j-asə taā jīsí tə́ tɔȳ yādə́ aĺ a? Banī yá̰á̰ ń j-asə rāā ní jə-rāā alé, ba jə-tə́gā tají dan yá̰a̰ gə̄ tə́ malang, na sōgə́ jə-rāā yá̰á̰ kə́rēý kə́ utə̄ ta róbə Najə̄ kə́ Majə yā Kərist.

¹³ Ngé rāā kəla kem kújə yā Kɔ́ɔ̄ɓē tə́ gə̄ a əsan̄ i yá̰á̰ kə́ kem kújə yā Kɔ́ɔ̄ɓē tə́ ō, ngé rāā kəla loo tun̄ yá̰á̰ tə́ gə̄ a əngen̄ kumən yādə́ dan yá̰á̰ gə̄ ń ndējə̄n̄ Nə́ɓā dɔ loo tun̄ yá̰á̰ tə́ ní ō ní ī-gerī aĺ a?

¹⁴ Tāa ngé kɔjə Najə̄ kə́ Majə gə̄ ní, Kɔ́ɔ̄ɓē əda kadə̄ əngen̄ yá̰a̰ kəsa yādə́ i kə ta kūl̄ Najə̄ kə́ Majaá ō.

¹⁵ Yá̰a̰ gə̄ ń noō ń m-ásə taā ní m̄-taā alé. Tá m̄-ndang makətūbə̄ ń toō i yā dəjeń aĺ ō. Koyḿ i só tə́ tɔȳ kadə̄ deē taā yá̰a̰ kɔsə gɔn rɔ̄ yāḿ jīḿ tə́!

¹⁶ Tɔdɔ̄ kɔjə de gə̄ Najə̄ kə́ Majə i yá̰a̰ kɔjə rɔ̄ yāḿ alé, tām̄ i yá̰á̰ kə́ m-ásə ndi kanjə̄n alé. Ré m-ɔjə de gə̄ Najə̄ kə́ Majə aĺ anī, yāḿ a majaĺ ngá̰ý!

¹⁷ Ré m-ɔ́jə de gə̄ i kə gō kem ndigə yāḿ mə̄kɔ́ anī, m-ásə kənge yá̰a̰ kəndā nja yāḿ. Ba dan ń i gáŕ kadə̄ m-ɔ́jə́ ní, i kəla kə́ əndān̄ i dɔḿ tə́.

¹⁸ Ní, yá̰a̰ kəndā nja yāḿ i rí? Yá̰a̰ kəndā nja yāḿ i kadə̄ m-ɔ́jə de gə̄ Najə̄ kə́ Majə ní karī, kanjə̄ taā yá̰á̰ ń m-ásə taā gírí ní.

¹⁹ Mā i kɔ́ɔ̄ rɔ̄ḿ, adə̄ mā i ɓəlo yā deē kógə̄ḿ alé, banī m̄-tél ɓəlo yā de gə̄ malang yā kəngeń de gə̄ ngá̰ý.

²⁰ Ré mā i dan Jipə gə̄ tə́ anī, m̄-rāā yá̰a̰ tītə̄ Jipə gə̄. Ré mā i dan de gə̄ kə́ ndū najə̄ i dɔdə́ tə́ anī, mā ń ndū najə̄ gətóo dɔḿ tə́ ní, m̄-rāā yá̰a̰ tītə̄ de kə́ ndū najə̄ i dɔn tə́, kadə̄ m-ə́ngeń de gə̄ ń ndū najə̄ i dɔdə́ tə́ ní.

²¹ Ré mā i dan de kə́ kanjə̄ ndū najə̄ gə̄ tə́ anī, mā ń i de kə́ kanjə̄ ndū najə̄ yā Nə́ɓā alé, tɔdɔ̄ ndū najə̄ yāḿ i Kərist ní, m̄-ndi tītə̄ kə́ mā i kanjə̄ ndū najə̄ dɔḿ tə́, kadə̄ m-ə́ngeń ngé gə̄ ń ndin̄ kanjə̄ ndū najə̄ ní.

²² Dan de kə́ tɔ́gə́də́ gətóo gə̄ tə́ anī, m̄-ndi tītə̄də́ yā kəngeńdə́. Adə̄ m̄-rāā rɔ̄ḿ yá̰a̰ malang tām̄ yādə́ tə́ malang, yā kadə̄ m-ájəń de kə́rēý gə̄ dandə́ tə́.

²³ Ba m̄-rāā yá̰á̰ ń noō malang i tām̄ yā Najə̄ kə́ Majə tə́, yā kadə̄ m-ə́ngeń yá̰á̰ ń Najə̄ kə́ Majə a adə̄ de gə̄ ní ō.

²⁴ Ngé nējə̄ naā ngɔ̄də̄ gə̄ a̰ȳn̄ ngɔ̄də̄ malangdə́ gə̄ ɓá tā, banī i de kə́ kal kógə̄ḿ beē ngóy n a ənge yá̰á̰ ń nējə̄n̄ naā ngɔ̄də̄ dɔ tə́ ní ī-gerī aĺ a? I beé ní ī-ngɔ̄dī kə gō róbəneé tá kadə̄ əngeīneé yá̰á̰ ní.

²⁵ Ngé kənī gambəla gə̄ malang ní, dan ń nin̄ a nāān̄ rɔ̄də́ ɓáý ní, nin̄ kɔ́ gə̄ əlan̄ dɔdə́ gír ndū najə̄ kə́ ngan̄g ngan̄g gə̄ tə́. Nin̄-rāān̄ rɔ̄də́ yá̰á̰ kə́ tōr̄ i yā kəngeń jākā mbang kə́ a nujə kɔ̄ɔ́ ba a to ngándáńg alé. Banī jḭḭ̄ jə-rāāī i yā kəngeń jākā mbang kə́ a to ngándáńg.

²⁶ Adə̄ mā m̄-ngɔ̄də̄ i beé: M-ā̰ȳ ngɔ̄də̄ i tītə̄ de kə́ ger̄ loo kə́ yā ka̰ȳ ngɔ̄də̄ kum kə̄ tū tə́ aĺ alé. Mā m̄-ɓir̄ jīḿ m-ə́ndań yá̰a̰ i beé: M-ə́nda i ɓōdə̄ loo karī alé.

²⁷ m̄-rāā rɔ̄ḿ yá̰á̰ kə́ ngan̄g, m-ə́la dɔ rɔ̄ḿ gíŕ tɔ́gə́ḿ tə́, na sōgə́ m-ɔ́jə de kə́ rang gə̄ najə̄ oy anī Nə́ɓā mbātə́m̄ kɔ̄ɔ́.