1 KORḚNTƏ 8 - Bibəl ta Sar̄

Najə̄ kə́ dɔ dā̰ gə̄ ń tɔ̄lə̄n̄ ba tun̄ adə̄n̄ ɓesə̄ gə̄ tə́ ní

¹ Ń toō ɓáa ādə̄ j-əndāī ma̰ȳ najə̄ yā dā̰ gə̄ ń tɔ̄lə̄n̄ ba tun̄ adə̄n̄ ɓesə̄ gə̄ ní. Sḭḭ̄ ə́daī na jḭḭ̄ malang na i ngé ger̄ yá̰a̰ gə̄. Nge ń noō i najə̄ kə́ rɔ̄kum. Ba ger̄ yá̰a̰ i yá̰á̰ kə́ a rāā kadə̄ deē a ɔjə rɔ̄n, banī tár i yá̰á̰ kə́ a rāā kə deé kadə̄ aw̄ kum kə̄ kété.

² Ré de kə́rēý gír̄ kemən tə́ kadə̄ ni na i de kə́ ger̄ yá̰a̰ anī, ni-ger̄ yá̰a̰ tītə̄ ń sɔɔ̄ kadə̄ gerə̄ń ní aĺ ɓáý.

³ Ba ré deē táŕ Nə́ɓā anī, Nə́ɓā ger̄ kɔ́ɔ̄.

⁴ Najə̄ ń ī-dəjeī ní n toó, ī-dəjeī na ké ásiī kəsa dā̰ gə̄ ń tɔ̄lə̄n̄ ba tun̄ adə̄n̄ ɓesə̄ gə̄ ní wa. Jə-gerī kadə̄ ɓesə̄ i yá̰á̰ kə́ ɔsə kum gotə yá̰á̰ kə́ to rɔ̄kum dɔ nang tə́ laā aĺ ō, jə-gerī kadə̄ Nə́ɓā i kógə̄ḿ beē ngóy ō.

⁵ Ká ré de gə̄ ədan̄ na nə́ɓā gə̄ na ndin̄ dɔ rā̰ tə́ noō, aláa na ndin̄ dɔ nang tə́ laā gə̄gē anī, nə́ɓā gə̄ i ngá̰ý rɔ̄kum ō, kɔ́ɔ̄ ɓē gə̄ i ngá̰ý rɔ̄kum ō.

⁶ Banī tām̄ yājí tə́ ɓáa Nə́ɓā i kógə̄ḿ beē. Ni i Bɔbə̄jí ń yá̰a̰ malang teē i rɔ̄n tə́ ō, j-a j-awī i kə̄ rɔ̄n tə́ ō ní. Kɔ́ɔ̄ɓē i kógə̄ḿ beē ngóy, i Jeju Kərist ń yá̰a̰ gə̄ malang teēn̄ i kə kūl̄neé ō, jə-ndiī i kə kūl̄neé ō ní.

⁷ Banī i de gə̄ malang n gerə̄n najə̄ kə́ rɔ̄kum ń toō ní alé. Ngé kə́rēý gə̄ ní ɓesə̄ ɔr̄ kemdə́ tə́ alé. Adə̄ ɓōólaā gə̄gē ní nin̄-əsan̄ dā̰ gə̄ ń de gə̄ tun̄ adə̄n̄ ɓesə̄ gə̄ ní i tītə̄ kə́ i nin̄ n tun̄ adə̄n̄ ɓesə̄ gə̄ ní beē. Yá̰á̰ ń kemdə́ ɔjədə́ ní kumən unjə̄ alé, adə̄ kemdə́ ní téĺ yá̰á̰ kə́ majaĺ tákə̄.

⁸ I yá̰a̰ kəsa n a aw̄ sejí rɔ̄ Nə́ɓā tə́ ngɔr ní alé. Ré j-əsaī yá̰a̰ aĺ anī, j-a jə-tḭ̄ḭ̄ ta yá̰á̰ kógə̄ḿ aĺ ō, ré j-əsaī yá̰a̰ anī j-a j-əngeī yá̰á̰ kógə̄ḿ aĺ ō.

⁹ Ɓá tā ba á̰a̰ī majə na sōgə́ rāā yá̰á̰ kə́ kɔ́ɔ̄ rɔ̄ tə́ yāsí tél bə̄dē kə́ kadə̄ əga nja ngé kə́ tɔ́gə́də́ gətóo gə̄ kadə̄ əsōn̄ kum majaĺ tə́.

¹⁰ Tɔdɔ̄ ré de kə́ tɔ́gən gətóo a̰a̰ī ḭ̄ de kə́ ger̄ yá̰a̰ loo kəsa yá̰á̰ tə́ kem kújə ɓesə̄ tə́ anī, ni a ənge tɔ́gə kə ta kūlīí yā kəsań dā̰ kə́ tun̄ kadə̄ ɓesə̄ gə̄ aĺ a?

¹¹ Adə̄ nge tɔ́gə gətóó ń i ngōkó̰ó̰í kə́ Kərist oy tām̄ yān tə́ ní, a udə kɔ̄ɔ́ sɔɔ̄ń ger̄ yá̰a̰ yāí.

¹² Dan ń ā ī-rāāī majaĺ kə́ beē kə ngákó̰ó̰sí kə́ tɔ́gə́də́ gətóo gə̄ ō, ā ādīdə́ do ngarān̄g kemdə́ tə́ ō ní, i Kərist n ī-rāāī yá̰á̰ kə́ majaĺ seneé ní.

¹³ I tām̄ najə̄ ń toō tə́ n ré yá̰a̰ kəsa i yá̰á̰ kə́ a rāā kadə̄ ngōkó̰ó̰ḿ əsō kum majaĺ tə́ anī, m-ā m-ə́sa dā̰ to̰ aĺ bátə́ kə̄ noḿ tə́ ní, na sōgə́ m̄-rāā adə̄ ngōkó̰ó̰ḿ əsō.