1 KORḚNTƏ 7 - Bibəl ta Sar̄

Najə̄ kə́ dɔ taā naā tə́

¹ Ń toō ɓáa m-ā m-ɔ̄r̄ i najə̄ kə́ dɔ yá̰a̰ gə̄ ń i dəjemī kem makətūbə̄ yāsí tə́ ní tā. Ədaī na majə kadə̄ de kə́ dəngam kə taā dəyá̰ alé.

² Ɓá tā ba yā kadə̄ de gə̄ sāān̄neé naā loo kaya tə́ aĺ ní, majə kadə̄ de kə́ dəngam i kə nə̄yá̰neé ō, de kə́ dəyá̰ i kə ngaaneé ō.

³ Majə kadə̄ de kə́ dəngam rāā yá̰á̰ kə́ loo ngaa dəyá̰ tə́ kə nə̄yá̰neé ō, de kə́ dəyá̰ rāā yá̰á̰ kə́ loo nə̄yá̰ deē tə́ kə ngaaneé ō.

⁴ Dəyá̰ asə rāā yá̰á̰ ń kemən ndigə ní kə rɔ̄neé alé, tɔdɔ̄ rɔ̄n i yā ngaan. I beé tām̄ yā dəngam tə́ ō. Dəngam asə rāā yá̰á̰ ń kemən ndigə ní kə rɔ̄neé alé, tɔdɔ̄ rɔ̄n i yā nə̄yá̰n.

⁵ Ɔ̄gī naā rɔ̄sí alé. Ba ré ōōī i naā tām̄ yā kum mbang kə́ sḛ́ý beē kə́ yā kəndāń rɔ̄sí ta ndɔ̄ȳ Nə́ɓā tə́ tá. Gō tə́ anī ī-tél āwī naā tə́, na sōgə́ dum̄ ta ngur dā̰ rɔ̄ aĺ yāsí teē ta róbə adə̄ Sətan, yā kadə̄ ni-nāāsí kə yá̰á̰ gól̄ yānneé.

⁶ Najə̄ ń m-ɔ̄r̄ sesí toō m-ɔ̄jə̄sí i mbée, banī m-ə̄ndā i gúu dɔsí tə́ alé.

⁷ Yá̰á̰ kə́ nelə̄m̄ ngá̰ý i kadə̄ de gə̄ malang ton̄ tītə̄ḿ mā beé. Banī yá̰a̰ gə̄ ń de gə̄ əngen̄ kógə̄ḿ kógə̄ḿ kə dɔdə́ gēé jī Nə́ɓā tə́ ní to tītə̄ naā alé. Deē kógə̄ḿ ənge i nge ń toō, banī de kə́ rang ənge i nge ń noō.

⁸ Adə̄ mā m-ə́da səɓa gə̄ ō, dəyá̰ kə́ ngaa koy gə̄ ō, na ndidə́ kə kéŕdə́ tītə̄ yāḿ mā beé ní i yá̰á̰ kə́ majə tām̄ yādə́ tə́.

⁹ Ba ré nin̄-asən̄ kəhɔ kemdə́ ngan̄g aĺ anī, ādə̄ taān̄ naā. Tɔdɔ̄ taā naā majə ngá̰ý tɔȳ kadə̄ ngur dā̰ rɔ̄ o̰o̰ deē hor tə́.

¹⁰ Ba ngé gə̄ ń taān̄ naā ní, m-ə̄ndā yá̰á̰ ń toō dɔdə́ tə́ kadə̄ rāān̄, i mā alé ba i Kɔ́ɔ̄ɓē n əndā dɔdə́ tə́ ní. Ādə̄ dəyá̰ mbātə́ ngaan alé.

¹¹ Ré ni-mbātə́n anī, ādə̄ ni-taā dəngam kə́ rang alé, aĺ ɓáa ādə̄ tél əsōn̄ naā tə́ gogə́. Ādə̄ dəngam mbātə́ nə̄yá̰n aĺ ō.

¹² Kə́ tām̄ yā gotə gə̄ tə́ ní, m-ə́dádə́ na i mə̄kɔ́ n m-ɔ̄r̄ najə̄ ba i Kɔ́ɔ̄ɓē alé, m-ə́dádə́ na ré deē kógə̄ḿ kə́ nge taā kem i kə dəyá̰ kə́ taā kem alé, ba dəyá̰ ní ndigə ndi seneé anī, ādə̄ mbātə́n alé.

¹³ I beé tām̄ yā dəyá̰ tə́ ō. Adə̄ ré dəyá̰ kə́rēý kə́ nge taā kem i kə ngaan kə́ taā kem alé, ba ngaan ní ndigə ndi seneé anī, ādə̄ dəyá̰ ní mbātə́n alé.

¹⁴ Tɔdɔ̄ dəngam ń taā kem aĺ ní ɔrə̄n̄ kamə̄n tayā i kə ta kūl̄ nə̄yá̰n ō, dəyá̰ ń taā kem aĺ ní, ɔrə̄n̄ kamə̄n tayā i kə ta kūl̄ ngaan ō. Nə́ngētə́ i beé aĺ anī, ngáńsí gə̄ i ngáń kə yḛr gə̄, banī nin̄ i ngán gə̄ kə́ ɔrə̄n̄ kam̄də́ tayā.

¹⁵ Ba ré nge ń taā kem aĺ ní gḛy mbātə́ madə̄n anī, ādī mbātə́n! Nge ń noō najə̄ gətóo dɔ ngōkó̰ó̰sí kə́ dəngam aké kə́ dəyá̰ ní tə́: Tɔdɔ̄ Nə́ɓā ɓāŕsí i yā kadə̄ ī-ndiī lɔm kə naá.

¹⁶ Tām̄ ḭ̄ dəyá̰, ī-ger̄ i ba̰ý kadə̄ ā ájə ngaaí? Aké ḭ̄ dəngam, ī-ger̄ i ba̰ý kadə̄ ā ájə nə̄yá̰í?

Ī-ndiī kə jī loo ndisí ń Nə́ɓā ɓārə́nńsí ní

¹⁷ Tá ɓáý to̰ ní, ādə̄ deē kógə̄ḿ kógə̄ḿ ndi kə jī loo ndi ń Kɔ́ɔ̄ɓē adə̄n á ni-ndiń kété tá kadə̄ Nə́ɓā ɓārə́n ní. Yá̰á̰ ń m-ə́da de gə̄ kə́ kem Egəlijə gə̄ tə́ malang kadə̄ rāān̄ ní n noó.

¹⁸ Ré deē kógə̄ḿ əjan̄ mɔtən tá kadə̄ Nə́ɓā ɓārə́n ɓáý anī, ādə̄ ni-rāā yá̰á̰ kógə̄ḿ kə́ ɔjə kadə̄ ni i de kə́ kanjə̄ kəja mɔtən alé. Ré de kə́rēý i kə́ əja mɔtən alé dan ń Nə́ɓā ɓāŕnəń tə́ ní anī, ādə̄ ni-əja mɔtən to̰ alé.

¹⁹ Kəja mɔtə i yá̰á̰ kógə̄ḿ aĺ ō, kəja mɔtə aĺ i yá̰á̰ kógə̄ḿ aĺ ō. Yá̰á̰ kə́ bo i rāā yá̰a̰ kə gō míndə́ Nə́ɓāá.

²⁰ Ādə̄ de gə̄ kógə̄ḿ kógə̄ḿ ndin̄ tītə̄ ń ndin̄neé kété ta kadə̄ Nə́ɓā ɓāŕdə́ ní.

²¹ Dan ń Nə́ɓā ɓāríī ní ḭ̄ i ɓəlo a, ī-lōō sōl̄ tāmən tə́. Ká ré ásəń teē ɓəloó gə̄gē anī, ādə̄ i yá̰á̰ kə́ kadə̄ teē majə tām̄ yāí tə́ tá ī-rāā.

²² Tɔdɔ̄ ɓəlo ń Kɔ́ɔ̄ɓē ɓārə́n ní, i de kə́ Kɔ́ɔ̄ɓē gān̄g dɔn kɔ̄ɔ́. Tītə̄ ń toō ɓáý to̰ ní, deē ń i kɔ́ɔ̄ rɔ̄n tá kadə̄ Kərist ɓārə́n ní, ni-tél i ɓəlo yā Kərist.

²³ Nə́ɓā adə̄ yá̰á̰ gíŕsí tə́ gāngəń dɔsí kɔ̄ɔ́, adə̄ ī-lōōī tél ɓəlo yā de gə̄.

²⁴ Ngákó̰ó̰ḿ gə̄, ādə̄ de gə̄ kógə̄ḿ kógə̄ḿ malang ndin̄ ta kum Nə́ɓā tə́ kə jī loo ndidə́ ń nin̄-ndin̄neé kété tá kadə̄ Nə́ɓā ɓāŕdə́ ní.

Najə̄ yā səɓa gə̄

²⁵ Najə̄ yā dəngam aláa dəyá̰ kə́ ḭḭ kə̄ nang tə́ ba taā deē aĺ ɓáý ní, yá̰á̰ kə́ Kɔ́ɔ̄ɓē ədam̄ kadə̄ m-ə́dásí dɔ tə́ ní gətóo, ba m-ɔ́jə́sí i gír̄ kə́ kemḿ tə́, kə́ loo de kə́ Kɔ́ɔ̄ɓē rāā kem majə seneé tə́ adə̄ ásiī taā kemən tə́.

²⁶ Sɔɔ̄ń yá̰á̰ kə́ to sōl̄ gə̄ ń jə-ndiī danaá ngɔlaā ní, yá̰á̰ ń mā m̄-gír̄ ní n toó: Majə kadə̄ de gə̄ ndin̄ kanjə̄ taā naā. Rɔ̄kum, majə kadə̄ nin̄-ndin̄ tītə̄ ń noō.

²⁷ Ré ī-taā dəyá̰ anī, ī-lōō gír̄ dɔ kəya̰n tə́. Ré ī-taā dəyá̰ aĺ anī, ī-lōō sāā taā dəyá̰.

²⁸ Ba ré ī-taā dəyá̰ anī ī-rāā i yá̰á̰ kə́ majaĺ aĺ ō, ré ngōn̄ kə́ dəyá̰ taā ngaa anī, ni-rāā i yá̰á̰ kə́ majaĺ aĺ ō. Banī ngé gə̄ ń taān̄ naā ní, yá̰á̰ kə́ tōr̄ gə̄ a rāān̄də́ kə dɔ ndɔ̄ gə̄, ba mā tā a m̄-gḛy kadə̄ yá̰á̰ kə́ tōr̄ gə̄ rāān̄sí alé.

²⁹ Ngákó̰ó̰ḿ gə̄, najə̄ ń m̄-sāā kədasí ní n toó: Na̰y ndɔ̄ i ngá̰ý alé. Adə̄ majə kadə̄ ngɔlaā ní ngé dəyá̰ gə̄ ndin̄ tītə̄ kə́ taān̄ dəyá̰ aĺ beé ō,

³⁰ ngé nōō gə̄ ndin̄ tītə̄ kə́ nōōn̄ aĺ beé ō, ngé rāā rɔ̄nel̄ gə̄ ndin̄ tītə̄ kə́ rāān̄ rɔ̄nel̄ aĺ beé ō, ngé mang yá̰a̰ gə̄ ndin̄ tītə̄ kə́ mangən̄ yá̰á̰ aĺ beé ō,

³¹ ngé gə̄ ń əngen̄ yá̰a̰ kə ta kūl̄ yá̰á̰ kə́ dɔ nang tə́ laā ní, ndin̄ tītə̄ kə́ əngen̄ yá̰a̰ kə ta kūl̄ yá̰á̰ kə́ dɔ nang tə́ laā aĺ beé ō. Tɔdɔ̄ yá̰á̰ kə́ dɔ nang tə́ laā a mān̄ kɔ̄ɔ́.

³² m̄-gḛy kadə̄ ī-ndiī kanjə̄ sōl̄ yá̰á̰ kógə̄ḿ. Deē ń taā dəyá̰ aĺ ní a gír̄ i dɔ yá̰a̰ yā Kɔ́ɔ̄ɓē tə́, ni a sāā i kadə̄ nel̄ Kɔ́ɔ̄ɓē seneé.

³³ Banī ngaa dəyá̰ a gír̄ i dɔ yá̰á̰ kə́ dɔ nang tə́ tə́, tɔdɔ̄ ni a sāā i kadə̄ nel̄ nə̄yá̰n seneé,

³⁴ adə̄ gír̄ yān tɔ̄ɔ̄ jōó. Dəyá̰ kə́ ngaan gətóo, aláa ngōn̄ kə́ mandə kə́ ger̄ dəngam aĺ ɓáý ní, a gír̄ i dɔ yá̰a̰ gə̄ yā Kɔ́ɔ̄ɓē tə́, tɔdɔ̄ ni-gḛy kadə̄ ni i yā Kɔ́ɔ̄ɓē tū kəla rāān gə̄ tə́ malang ō, tū gír̄ yān gə̄ tə́ malang ō. Ba dəyá̰ kə́ kə ngaaneé a gír̄ i dɔ yá̰a̰ gə̄ kə́ dɔ nang tə́ tə́, ni a sāā i kadə̄ nel̄ ngaan seneé.

³⁵ M-ə́dásí najə̄ ń noō i tām̄ yā majə yāsí sḭḭ̄ kɔ gə̄ tə́, ba m-ə̄ndā i gúu dɔsí tə́ alé. m̄-sāā i kadə̄ ī-ndiī majə mān̄ kə́ kété, kə ta kūl̄ kəndā rɔ̄sí kə taá malang ta kəla yā Kɔ́ɔ̄ɓē tə́.

³⁶ Ré deē kógə̄ḿ a̰ā̰ kadə̄ ré n-taā dəyá̰ nong yān aĺ anī i yá̰á̰ kə́ majaĺ ō, ré ɓō dəyá̰ nong yān ní rāān ngá̰ý ō anī, adə̄ taān̄ naā na nge ń noō i majaĺ alé.

³⁷ Ba ré ni-əhɔ kemən ngan̄g ō, ɓō dəyá̰ nong yān ní ɔsə seneé alé adə̄ o̰o̰ ɓē dɔ rɔ̄n tə́ ō anī, ādə̄ ni gír̄ yān kə́ ta kəga dɔ ń i kɔdə rɔ̄ dəyá̰ nong yān aĺ tə́ ní alé na i yá̰á̰ kə́ majə.

³⁸ Adə̄ deē ń taā dəyá̰ nong yān ní rāā i yá̰á̰ kə́ majə ō, deē ń taā dəyá̰ nong yān aĺ ní, rāā i yá̰á̰ kə́ majə tɔȳ ō.

³⁹ Ndū najə̄ do̰ō̰ dəyá̰ naā tə́ kə ngaaneé i kə dɔ ndɔ̄ gə̄ malang ń ngaan ndiń kə kumneé ní. Ba ré ngaan oy kɔ̄ɔ́ anī ni i kɔ́ɔ̄ rɔ̄n, adə̄ ni a taā dəngam kə́ kemən ndigə, ba kadə̄ dəngam ní i deē yā Kərist tá.

⁴⁰ Ɓá tā ba m-á̰a̰ kadə̄ ré ni-ndi beé kanjə̄ taā dəngam anī, a ndi majə tɔ̄ȳ kə́ kété. Mā ń m-ə́da najə̄ ń toō ní, m̄-taā kem kadə̄ Ndíl yā Nə́ɓā i seḿ ō.