1 KORḚNTƏ 6 - Bibəl ta Sar̄

Sarya yā ngákó̰o̰ naā gə̄

¹ I ba̰ý á najə̄ i dɔ dáńsí tə́ anī, āwīneé i ta de kə́ ndágá gə̄ tə́ tá kadə̄ gāngə̄n̄ sarya dɔ tə́ ba i ta de gə̄ yā Nə́ɓā tə́ aĺ ní?

² De gə̄ yā Nə́ɓā a gāngə̄n̄ sarya dɔ de kə́ dɔ nang tə́ laā gə̄ tə́ ní ī-gerī aĺ a? Ba ré i sḭḭ̄ n ā ī-gāngī sarya dɔ de kə́ dɔ nang tə́ laā gə̄ tə́ anī, ngán najə̄ kə́ dūú gə̄ ní ásiī gān̄g aĺ a?

³ J-a jə-gāngī sarya dɔ de kə́ dɔ rā̰ tə́ gə̄ tə́ ní ī-gerī aĺ a? Ní yá̰a̰ gə̄ kə́ dɔ nang tə́ laā tá j-a jə-gāngī sarya dɔ tə́ aĺ a?

⁴ Adə̄ ré sḭḭ̄ āwī kə ngán najə̄ kə́ beé gə̄ anī, i de gə̄ kə́ ngé kán̄ naā gə̄ rāān̄də́ i yá̰á̰ tə́ aĺ gə̄ n sḭḭ̄ ā ī-tə́ndāīdə́ ngé gān̄g sarya yāsí gə̄ tə́ ní a!

⁵ M-ə́dásí beé i yā kəlań rɔ̄sɔl̄ dɔsí tə́. Deē kógə̄ḿ kə́ nge kum kedə̄ kə́ asə gān̄g sarya yā ngákó̰o̰n gə̄ gətóoń dɔ dáńsí tə́ bátə́,

⁶ adə̄ ngákó̰o̰ naā gə̄ a aw̄n̄ kə najə̄ yādə́ i ta ngé taā kem aĺ gə̄ tə́ tá a!

⁷ Kə́ rɔ̄kum tə́ ɓáa najə̄ ń to dɔ dáńsí tə́ ní, ɔjə kə̄ ndágá kadə̄ sḭḭ̄ i de gə̄ kə́ ə̄sōī kɔ̄ɔ́ ɓá. I tām̄ rí tə́ á ī-tə́gāī tasí dɔ yá̰á̰ kə́ gōtə́ aĺ kə́ deē rāā sesí tə́ aĺ ní? I tām̄ rí tə́ á ə́ya̰ī ādī kə́ran̄sí dɔ yá̰a̰ yāsí tə́ aĺ ní?

⁸ Ba i sḭḭ̄ n i ngé rāā yá̰á̰ kə́ gōtə́ aĺ kə de gēé ō, ngé kə́ra de gə̄ ō ní! Tá de gə̄ ní i ngákó̰ó̰sí gə̄ ɓáý to̰!

⁹ De kə́ súmūú aĺ gə̄ a əngen̄ loo kem Ɓē ko̰o̰ yā Nə́ɓā tə́ aĺ ní ī-gerī aĺ a? Ī-lōōī kadə̄ síndə̄sí! Ngé sāā naā loo kaya tə́ gə̄ ō, ngé rāā ɓesə̄ gə̄ ō, ngé rāā rāȳ gə̄ ō, dəngam gə̄ kə́ ngé ɓīī kə dəngam madə̄də́ gēé ō,

¹⁰ ngé ɓogə gə̄ ō, ngé rāā kum ndaa yá̰a̰ gə̄ ō, ngé rāā ɓəlo kasə gə̄ ō, ngé tétə̄ najə̄ gə̄ ō, ngé kə́rá yá̰a̰ gə̄ ō, a əngen̄ loo kem Ɓē ko̰o̰ yā Nə́ɓā tə́ alé.

¹¹ Ba de kə́rēý gə̄ dɔ dáńsí tə́ nin̄ i de kə́ beé gə̄ kété. Banī tə́gon̄ majaĺ yāsí gə̄ kɔ̄ɔ́, ɔrə̄n̄ kam̄sí tayā kadə̄ ī-ndiī i tām̄ yā Nə́ɓā tə́ ō, rāān̄sí adə̄ ī-téliī de kə́ súmūú gə̄ ta kum Nə́ɓā tə́ i kə rī Kɔ́ɔ̄ɓē Jeju Kərist ō, i kə ta kūl̄ Ndíĺ Nə́ɓā yājí ō.

Ɔ́siī gɔn Nə́ɓā kə dā̰ rɔ̄sí

¹² De kə́rēý gə̄ dɔ dáńsí tə́ ədan̄ na yá̰á̰ kə́ ɔgə̄də́ rāā yá̰a̰ malang na gətóo. Ɓá tā ba yá̰a̰ malang i kə́ majə tām̄ yāsí tə́ alé. Mā m-ásə kəda na yá̰á̰ kə́ ɔgə̄m̄ rāā yá̰a̰ malang na gətóo, banī mā m̄-ndigə tél ɓəlo yā yá̰á̰ kógə̄ḿ alé.

¹³ Sḭḭ̄ ə́daī ɓáý to̰ na yá̰a̰ kəsa i tām̄ yā kem deē tə́ ō, kem deē i tām̄ yā yá̰a̰ kəsa tə́ ō. I rɔ̄kum, ba Nə́ɓā a nujə kemií ō, yá̰a̰ kəsa ní ō. Ba rɔ̄jí i yā kadə̄ jə-sāāīneé naā loo kaya tə́ alé. Rɔ̄jí i tām̄ yā Kɔ́ɔ̄ɓē tə́ ō, Kɔ́ɔ̄ɓē i tām̄ yā rɔ̄jí tə́ ō.

¹⁴ Ba Nə́ɓā ń ndól̄ Kɔ́ɔ̄ɓē ń oy ní, ré j-oyiī anī ni a ndól̄jí kə tɔ́gəneé ō.

¹⁵ Rɔ̄sí i ngōn̄ rɔ̄ Kərist kógə̄ḿ ní ī-gerī aĺ a? Kadə̄ kə m-ún ngōn̄ rɔ̄ Kərist kə m̄-rāā ngōn̄ rɔ̄ kə́ yā rāāń kaya dəyá̰ kógə̄ḿ tə́ a? M-ā m̄-rāā nge ń noō aĺ bátə́!

¹⁶ Deē ń ɓoon̄ naā kə kaya dəyá̰ ní, ni-tél i rɔ̄ kə́ kógə̄ḿ beē seneé ní ī-gerī aĺ a? Tɔdɔ̄ ndangən̄ kem makətūbūú na: Nin̄ jōó a télən̄ de kə́ kógə̄ḿ beē.

¹⁷ Ba deē ń ɓoon̄ naā kə Kɔ́ɔ̄ɓēé ní, ndíĺdə́ i kógə̄ḿ beē kə Kɔ́ɔ̄ɓēé.

¹⁸ Yá̰á̰ ń i sāā naā loo kaya tə́ ní ā̰ȳniī kɔ̄ɔ́! Majaĺ kə́ rang gə̄ malang ń deē rāā ní, i gidə rɔ̄ deē tə́ ndágá. Banī deē ń sāā naā loo kaya tə́ ní, rāā majaĺ i kə dā̰ rɔ̄n nəkɔ́.

¹⁹ Ndíĺ kə́ Táĺ ń Nə́ɓā adə̄sí á ndi kemsí tə́ ní, rɔ̄sí i kújə ndin ní ī-gerī aĺ a? Rɔ̄sí i yá̰á̰ yāsí alé.

²⁰ Nə́ɓā mangsí, ni-adə̄ yá̰a̰ gíŕsí tə́ kɔ̄ɔ́. I beé ní, ɔ́siī gɔn Nə́ɓā kə rɔ̄sí.