1 KORḚNTƏ 5 - Bibəl ta Sar̄

Najə̄ kə́ dɔ sekə́ naā yā ngákó̰o̰ naā gə̄ tə́

¹ De gə̄ malang ədan̄ na háĺ kə́ majaĺ na to dansí tə́, ba yá̰á̰ ní na majaĺ ngá̰ý al̄ naā, adə̄ de gə̄ kə́ nin̄ i Jipə aĺ gə̄ gə̄gē na rāān̄ háĺ kə́ tītə̄ ń noō alé. Tɔdɔ̄ ənīn̄ gotə najə̄ yāsí, ədan̄ na deē kógə̄ḿ dansí tə́ na aw̄ bátə́ sāā nə̄yá̰ bɔbə̄n loo kaya tə́!

² Ba ī-raī dɔ tə́ noō na ɔ́jiī rɔ̄sí ngá̰ý ɓáý to̰! Deē ń rāā yá̰á̰ ń noō ní, majə kadə̄ wōn̄g rāāsí ba ɔ̄r̄niī kɔ̄ɔ́ dansí tə́. Banī sḭḭ̄ ī-rāāī nge ń noō alé.

^3-4 Ba mā tā a ká ré m̄-gətóo sesí gə̄gē anī, ndílə́ḿ i naā tə́ sesí, adə̄ m̄-gān̄g sarya kə rī Kɔ́ɔ̄ɓē Jeju dɔ de kə́ beé tə́ kɔ̄ɔ́ ɓá, tītə̄ kə́ mā i sesí beē. Dan ń ā ī-kánī naā adə̄ ndílə́ḿ i sesí naā tə́ anī, tɔ́gə́ Kɔ́ɔ̄ɓē yājí Jeju a ndi dansí tə́.

⁵ Loo ń noō tə́ majə kadə̄ ə́laī deē ní jī Sətan tə́, kadə̄ dā̰ rɔ̄n nujə ba ndílən ajə ndɔ̄ yā Kɔ́ɔ̄ɓē tə́.

⁶ Yá̰á̰ ń ɔ́jiī rɔ̄sí najə̄n tə́ ní i yá̰á̰ kə́ majə alé. Kaa mápá kə́ sḛ́ý beē rāā adə̄ ndujə̄ mápá kə́ ló̰ȳ agə̄ malang ní ī-gerī aĺ a?

⁷ Kaa mápá kə́ lōō kōkə̄ kɔ̄ɔ́ ń i yá̰á̰ kə́ majaĺ ní, ɔ̄rī kɔ̄ɔ́ dɔ dáńsí tə́ tá kadə̄ ī-télīneé de kə́ unjə̄n̄ njáý njáý gə̄. Loo ń noō tə́ ā ī-toī tītə̄ ndujə̄ mápá kə́ ló̰ȳ kijə kanjə̄ kənī kaa mápa kum tə́ beē. Tɔdɔ̄ sḭḭ̄ i ndujə̄ mápá kə́ ló̰ȳ kijə kanjə̄ kənī kaa kum tə́. Tām̄ Kərist ń i batə̄ Pákə yājí ní tɔ̄l̄nən̄ kɔ̄ɔ́ ɓá.

⁸ I beé ní ādə̄ jə-rāāī nāā Pákə kə kaa mápá kə́ lōō kōkōó alé. Tɔdɔ̄ kaa kə́ lōō kōkə̄ ní i kem ndul ō, ndāńg ō. Banī ādə̄ jə-rāāī nāā Pákə kə mápá kə́ rāā kanjə̄ kənī kaa mápa kum tə́ ń i kem kə́ ndaa táĺ ō, i yá̰á̰ kə́ rɔ̄kum ō ní.

⁹ Makətūbə̄ ń m-ndang m-ādə̄sí kété ní, m-ə́dásí najə̄ kemeé m-ə́da na kə ī-lōōī ɓoo naā kə ngé sāā naā loo kaya tə́ gə̄.

¹⁰ Banī de gə̄ ń m̄-gḛy kadə̄ ī-ɓooī naā sedə́ aĺ ní, i de kə́ dɔ nang tə́ laā gə̄ malang ń nin̄ i ngé sāā naā loo kaya tə́ gə̄ ō, ngé ndə̄ngā yá̰a̰ gə̄ ō, ngé ɓogə gə̄ ō, ngé rāā ɓesə̄ gə̄ ō ní alé. Tɔdɔ̄ ré i beé anī, a asə kadə̄ ā ə́ya̰ī i dɔ nang ń toō kɔ̄ɔ́ ba āwī loo kə́ rang tə́!

¹¹ Najə̄ ń m̄-ndang m-ādə̄sí ní, i kadə̄ ī-lōōī ɓoo naā kə de kə́ ā ī-ɓāŕniī na i ngōkó̰ó̰sí, tá ni i de kə́ nge sāā naā loo kaya tə́, aláa ni i de kə́ nge ndə̄ngā yá̰a̰, aláa i nge rāā ɓesə̄, aláa i nge tetə najə̄, aláa i nge kasə rāā, aláa i nge ɓogə. De kə́ beē ní, yá̰a̰ kəsa gə̄gē ī-lōōī kəsa seneé.

¹² Tɔdɔ̄ gān̄g sarya dɔ de kə́ ndágá gə̄ tə́ i najə̄ yāḿ mā alé. Ngé gə̄ ń kadə̄ ī-gāngī sarya dɔdə́ tə́ ní, i ngé kə́ kemeé gə̄ aĺ a?

¹³ Ngé kə́ ndágá gə̄ i Nə́ɓā n i nge gān̄g sarya dɔdə́ tə́ ní. Ɔ̄rī de kə́ nge kem ndul kɔ̄ɔ́ dɔ dansí tə́.