1 KORḚNTƏ 3 - Bibəl ta Sar̄

Ngé rāā kəla gə̄ yā Nə́ɓā

¹ Ngákó̰ó̰ḿ gə̄ tām̄ yāḿ mā tə́ ɓáa, najə̄ ń m-ɔ̄r̄ sesí kété ní, i najə̄ kə́ m-ɔ̄r̄ i kə de gə̄ kə́ Ndíl yā Nə́ɓā i kemdə́ tə́ alé, ba i kə de kə́ dɔ nang tə́ laā gēé, i tītə̄ kə́ m-ɔ̄r̄ i kə ngáń kə́ dūú gə̄ kə́ kem Kərist tə́ ɓáý beē.

² M-ādə̄sí i mba ba i yá̰a̰ kəsa kə́ ngan̄g alé. Tɔdɔ̄ sḭḭ̄ ásiī kəsa yá̰á̰ kə́ ngan̄g aĺ ɓáý. Tá ɓōólaā gə̄gē ní sḭḭ̄ ásiī aĺ ɓáý.

³ Tām̄ sḭḭ̄ ā ī-rāāī yá̰a̰ i gō yā dā̰ rɔ̄ tə́ ɓáý. Dan ń nii ō, kɔ̄l̄ naā ō i dansí tə́ ní, sḭḭ̄ i ngé rāā yá̰a̰ gō yā dā̰ rɔ̄ tə́ gə̄ aĺ a? Ā ī-rāāī i hál de kə́ dɔ nang tə́ laā gə̄ n noō aĺ a?

⁴ Dan ń deē kógə̄ḿ əda na mā i deē yā Pol ō, de kə́ rang əda na mā i deē yā Apolos ō ní, yá̰a̰ rāāsí i kə́ gō yā de kə́ dɔ nang tə́ laā gə̄ n noō aĺ a?

⁵ Ní, Apolos i náā ō, Pol i náā ō? Nin̄ i ngé rāā kəla gə̄ yā Nə́ɓā kə́ ī-taāī kem i kə kūl̄də́ ngóy. Nin̄ kógə̄ḿ kógə̄ḿ ní rāān̄ kəla i kə gō tɔ́gə́ ń Kɔ́ɔ̄ɓē adə̄də́ ní.

⁶ Mā m-ə̄ndā kāgə̄ ō, Apolos i nge rāā man̄ dɔ tə́ ō, banī i Nə́ɓā n i nge rāā tá kadə̄ kāgə̄ tɔgə ní.

⁷ Adə̄ nge kəndā kāgə̄ i yá̰a̰ aĺ ō, nge rāā man̄ dɔ tə́ i yá̰a̰ aĺ ō, ba i Nə́ɓā ń rāā tá kadə̄ kāgə̄ tɔgə ní.

⁸ Nge kənda kāgə̄ ō, nge rāā man̄ dɔ tə́ ō ní, asən̄ naā. Nə́ɓā a adə̄də́ yá̰a̰ kəndā nja yādə́ kadə̄ asə kə gō kəla yādə́.

⁹ Tām̄ jḭḭ̄ i madə̄ kəla naā gə̄ tū kəla yā Nə́ɓā tə́, ba sḭḭ̄ i ndɔr̄ yā Nə́ɓā ō. Sḭḭ̄ i kújə́ kə́ Nə́ɓā əndā ō.

¹⁰ Nə́ɓā rāā seḿ kə gō kem ndaa yānneé adə̄ m-ə̄ndā ngəra kújə i tītə̄ kɔdə̄ nge kəndā kújə́ kə́ ger̄ kəla yān majə beé, ba de kə́ rang rāā kújə dɔ tə́. Banī ādə̄ de gə̄ kógə̄ḿ kógə̄ḿ a̰a̰n̄ majə ké a əndān̄ kújə́ ní i ba̰ý dɔ tə́ wa.

¹¹ Yā ngəra kújə́ ɓáa deē kógə̄ḿ kə́ asə kəndā kə́ rang gətóo, i nge ń i kə́ kəndā ɓáá ní ngóy, adə̄ i Jeju Kərist.

¹² Ká ré deē əndā kújə dɔ ngəra kújə́ ní tə́ i kə lɔ́r, aké i kə gində̄ arjā̰a̰, aké i kə mbal̄ gə̄ kə́ gātə̄də́ i ngá̰ý gə̄, aké i kə kāgāá, aké i kə muú, aké i kə kádə́ yá̰á̰ gə̄gē anī,

¹³ a teēn̄ kə kəla rāā de gə̄ kógə̄ḿ kógə̄ḿ kadə̄ to kə̄ dɔ ndágá kadə̄ de gə̄ a̰a̰n̄. Ndɔ̄ sarya a rāā kadə̄ a gerə̄n̄ kəla ní, tɔdɔ̄ ndɔ̄ ní a ɔjə rɔ̄n kə̄ ndágá i kə horoó ō, hor a ɔjə kəla yā de gə̄ kógə̄ḿ kógə̄ḿ ō.

¹⁴ Deē ń kəla yān a ra ngān̄g ní, kɔ́ɔ̄ a ənge yá̰a̰ kəndā nja yān.

¹⁵ Ba deē ń hor a o̰o̰ kəla yān kɔ̄ɔ́ ní, a ɔgə̄nən̄ yá̰a̰ kəndā nja yān. Nəkɔ́ a ajə, ba i tītə̄ de kə́ teē i kum hor tə́ beē.

¹⁶ Sḭḭ̄ i kújə yā Nə́ɓā, adə̄ Ndíĺ Nə́ɓā ndi kemsí tə́ ní ī-gerī aĺ a?

¹⁷ Ré de kə́rēý nujə kújə yā Nə́ɓā anī, Nə́ɓā a nujə seneé kɔ̄ɔ́ ō. Tɔdɔ̄ kújə yā Nə́ɓā i kə́ táĺ, ba kújə́ ní i sḭḭ̄.

¹⁸ Ādə̄ deē kógə̄ḿ gól̄ rɔ̄n nəkɔ́ alé. Ré de kə́rēý dɔ dansí tə́ gír̄ kadə̄ ni i de kə́ nge kum kedə̄ tītə̄ de kə́ dɔ nang tə́ laā gə̄ anī, ādə̄ ni-tél de kə́ mbóo yā télən̄ de kə́ nge kum kedə̄.

¹⁹ Tɔdɔ̄ kum kedə̄ yā de kə́ dɔ nang tə́ laā gə̄ i yá̰á̰ kə́ to mbóo ta kum Nə́ɓā tə́. Tām̄ ndangən̄ kem makətūbə̄ yā Nə́ɓā tə́ na: Nə́ɓā əhɔ ngé kum kedə̄ gə̄ kə ngam yādə́ nin̄ kɔ́ gɔ̄ɔ́.

²⁰ Tá ndangən̄ ɓáý to̰ na: Kɔ́ɔ̄ɓē ger̄ gír̄ yā ngé kum kedə̄ gə̄, ni-ger̄ kadə̄ i yá̰á̰ kə́ kanjə̄ kumən.

²¹ I beé ní, ādə̄ deē kógə̄ḿ ɔr ta rɔ̄n tām̄ yā de gə̄ tə́ alé. Tɔdɔ̄ yá̰a̰ malang i yāsí:

²² Ká i Pol, aké i Apolos, aké i Kepas, aké i yá̰á̰ kə́ dɔ nang tə́, aké i ndi kə kumuú, aké i koy, aké i yá̰á̰ kə́ ngɔlaā ń toō, aké i yá̰á̰ ń a reē ɓáý ní, yá̰a̰ malang i yāsí,

²³ ba sḭḭ̄ i yā Kərist ō, Kərist i yā Nə́ɓā ō.