1 KORḚNTƏ 2 - Bibəl ta Sar̄

Kɔjə najə̄ yā Kərist kə́ əndanən̄ kə máyá̰ tū kāgə̄ kə́ dēsə́ tə́

¹ Ngákó̰ó̰ḿ gə̄, dan ń mā i loosí ní, m-ɔ́jə́sí yá̰á̰ kə́ to loo mundə̄ tə́ yā Nə́ɓā i kə najə̄ kə́ loo ger̄ kumən ngan̄g ngá̰ý, aláa i kə kum kedēé alé.

² Tɔdɔ̄ m̄-sāā ger̄ yá̰á̰ kə́ rang dan ń m̄-ndiń sesí ní alé, ba i Jeju Kərist ngóy, nge ń əndanən̄ kə máyá̰ tū kāgə̄ kə́ dēsə́ tə́ ní.

³ Adə̄ dan ń m̄-ra nosí tə́ ní, tɔ́gə́ḿ gətóo ō, m̄-ɓōĺ ō, m̄-ndebə ō.

⁴ Yá̰á̰ ń m̄-ndóō de gə̄ ō, najə̄ ń m-ɔ́jə de gə̄ ō ní, i kə gō kum kedə̄ yā deé alé, banī i kə tɔ́gə yā Ndíĺ Nə́ɓā kə́ ɔjə kə̄ ndágá kadə̄ najə̄ yāḿ i najə̄ kə́ rɔ̄kum.

⁵ Adə̄ taā kem yāsí ra i dɔ kum kedə̄ yā deē ndul gə̄ tə́ alé, banī i dɔ tɔ́gə yā Nə́ɓā tə́.

Kum kedə̄ yā Nə́ɓā

⁶ Ɓá tā ba yá̰á̰ ń jə-ndóō de gə̄ yā Kərist kə́ kumdə́ ɔɔ̄ kɔ̄ɔ́ gə̄ ní, i kum kedə̄. Ba i kum kedə̄ kə́ dɔ nang tə́ laā aĺ ō, i kum kedə̄ yā ngār gə̄ kə́ dɔ nang tə́ laā gə̄ ń a gətóon̄ kɔ̄ɔ́ ní aĺ ō.

⁷ I kum kedə̄ yā Nə́ɓā kə́ to loo mundə̄ tə́, kə́ ɓɔ̄ɔ̄n̄ dɔ kɔ̄ɔ́, ba Nə́ɓā əndā dɔ danaá tām̄ kɔsə gɔn yājí tə́ kété pá tá kadə̄ ni-əndā dɔ rā̰ ō dɔ nang ō ɓáý ní n jə-ndóō de gə̄ ní.

⁸ Deē kógə̄ḿ kə́ dan ngār gə̄ kə́ dɔ nang tə́ laā kə́ ger̄ kum kedə̄ ngeé ń toō gətóo. Ré nin̄-gerə̄n̄ i mbée anī, Kɔ́ɔ̄ɓē ń kɔsə gɔn i yān ní, a əndanən̄ kə máyá̰ tū kāgə̄ kə́ dēsə́ tə́ alé.

⁹ Banī tītə̄ ń makətūbə̄ yā Nə́ɓā ədań ní, ndangən̄ na: I yá̰á̰ kə́ kum deē a̰ā̰ aĺ ō, mbī deē oō aĺ ō, deē gír̄ dɔ tə́ aĺ ō n Nə́ɓā əndā dɔ danaá tām̄ yā ngé gə̄ ń tárnən̄ tə́ ní.

¹⁰ Tá i jḭḭ̄ n Nə́ɓā teē kumjí dɔ tə́ kə ta kūl̄ Ndíĺ kə́ Táĺ ní. Tɔdɔ̄ Ndíĺ asə kəndā ma̰ȳ yá̰a̰ malang, ká i yá̰á̰ kə́ Nə́ɓā núm̄ kə́ to loo mundə̄ tə́ ɓáý gə̄gē, ni-asə kəndā ma̰ȳ.

¹¹ I náā kə́ dɔ dán de gə̄ tə́ n ger̄ yá̰á̰ kə́ kem deē tə́ ní? I ndíl deē ń i kemən tə́ ní ngóy aĺ a? I beé ō, deē kógə̄ḿ kə́ ger̄ yá̰á̰ kə́ kem Nə́ɓā tə́ gətóo, i Ndíĺ Nə́ɓā ngóy.

¹² Banī jḭḭ̄ j-əngeī i ndíĺ kə́ dɔ nang tə́ laā alé, ba i Ndíĺ kə́ ḭḭ rɔ̄ Nə́ɓā tə́, yā kadə̄ jə-gerīneé yá̰á̰ gə̄ ń Nə́ɓā adə̄jí kə gō kem ndaa yānneé ní.

¹³ Ba j-ɔr̄ najə̄ yá̰a̰ gə̄ ní i kə najə̄ ń ngé kum kedə̄ gə̄ ndóōn̄jí ní alé, banī i kə najə̄ ń Ndíl Nə́ɓā ndóōjí ní. Adə̄ i tītə̄ ń noō n j-ɔjəń ngé kənge Ndíl ngeé ń toō gə̄ najə̄ kə́ rɔ̄kum gə̄ yā Ndíĺ ní.

¹⁴ Deē ń aw̄ kə Ndíl Nə́ɓāá aĺ ní, a asə ndigə najə̄ kə́ rɔ̄kum gə̄ kə́ ḭḭn̄ rɔ̄ Ndíĺ ní tə́ alé: Najə̄ gə̄ ní i najə̄ kə́ to mbóo ta kumən ni tə́. Ni-asə ger̄ kumdə́ alé, tɔdɔ̄ deē a asə kəda najə̄ dɔ yá̰á̰ tə́ i kə ta kūl̄ Ndíl.

¹⁵ De kə́ nge Ndíl Nə́ɓā asə kəda najə̄ dɔ yá̰a̰ gə̄ tə́ malang, banī deē kógə̄ḿ kə́ a asə kəda najə̄ dɔn ni tə́ gətóo.

¹⁶ Tām̄ i kə́ ndang kem makətūbə̄ yā Nə́ɓā tə́ na: I náā n ger̄ gír̄ yā Kɔ́ɔ̄ɓē ní? I náā n i nge kadə̄n kɔjə ní? Banī jḭḭ̄ j-awī kə gír̄ yā Kərist kemjí tə́.