1 KORḚNTƏ 16 - Bibəl ta Sar̄

Yá̰á̰ kə́ kɔsə dɔ naā tə́ yā rāań kem majə

¹ Najə̄ kə́ dɔ yá̰á̰ kə́ kɔsə dɔ naā tə́ tām̄ yā de gə̄ yā Nə́ɓā tə́ ń m-ɔ́jə́ de gə̄ kə́ kem Egəlijə gə̄ kə́ Galasi tə́ ní, sḭḭ̄ ā ī-rāāī yāsí i tītə̄ yādə́ ō.

² Kə dɔ ndɔ̄ dəmásə gə̄ malang ní, sḭḭ̄ kógə̄ḿ kógə̄ḿ malang, ā ɔ̄rī nar kadə̄ asə kə gō kənge ń ə́ngeī ní yā ngɔ̄m̄ ɓēé, yā kadə̄ ré m-ūgə̄ tá ī-kánī nar alé.

³ Ba loo ń ré m-ūgə̄ anī, ngé gə̄ ń sḭḭ̄ ā ī-gə̄rāīdə́ ní, m-ā m-ādə̄də́ makətūbə̄ kadə̄ aw̄n̄neé kə kadə̄ karī yāsí gēé Jerusalem.

⁴ Ba ré i só tə́ kadə̄ mə̄kɔ́ m-āw̄ anī, nin̄ a aw̄n̄ seḿ.

Mbā ń Pol ɔjə kaw̄ ní

⁵ Ré m-ə́nda dɔ nang kə́ Masedəwan m̄-gān̄g anī m-ā m-āw̄ loosí. Tɔdɔ̄ m-ā m̄-teē i gō nang ń noō tə́.

⁶ Ba majanī, m-ā m̄-ndi sesí dan oy tām̄. Majanī m-ā m̄-ndi sesí ɓaraá bátə́ kadə̄ ɓāl̄ ndɔ̄ɔń, yā kadə̄ ī-rāāīneé seḿ kadə̄ m-únəń ta njə̄rā mbā yāḿ kum kə̄ kété.

⁷ Ń toō m̄-gḛy i ka̰a̰sí kə njaḿ dɔɔ́ to̰ alé. Ré Kɔ́ɔ̄ɓē ndigə anī, m-ā m̄-ndi sesí dan təsó sḛ́ý.

⁸ Ɓá tā ba m-ā m̄-ndi Epejə tə́ laā bátə́ nāā Pa̰təkotə tə́.

⁹ Tɔdɔ̄ ta róbə i kə́ teē bo ngá̰ý tām̄ yā kəla yāḿ tə́, ba ngé ba̰ā̰ḿ gə̄ i ngá̰ý.

¹⁰ Ré Timote ugə̄ rɔ̄sí tə́ anī, ī-lōōī rāā kadə̄ ni-ndi kə ɓōló dansí tə́, tɔdɔ̄ ni a rāā i kəla yā Kɔ́ɔ̄ɓē tītə̄ yāḿ ō.

¹¹ I beé ní, ādī deē kógə̄ḿ kídə̄n alé. Ba ī-rāāī seneé ādə̄ ni-tél reē ugə̄ń gogə́ rɔ̄ḿ tə́ kə kem kə́ sɔl̄ lɔmɔɔ́, tɔdɔ̄ m-ā m̄-ngóōn naā tə́ kə ngákó̰ó̰jí gēé.

¹² Ba yā ngōkó̰ó̰jí Apolos tā anī, m-ɔ́sə seneé ngá̰ý ta kaw̄ loosí naā tə́ kə ngákó̰ó̰jí gēé, banī ni-gḛy kaw̄ ngɔr ń toō tə́ aĺ ɓáý. Ré ənge ta róbə́ tá a aw̄ ɓáý.

Ta ngóy kɔjə gə̄ yā Pol ō, lápə́ya yān ō

¹³ Ī-ndiī dɔ rɔ̄sí tə́ ō, ī-raī ngan̄g dɔ taā kem tə́ ō, əhɔī rɔ̄sí tɔgə ō, ādī tɔ́gə́sí to ō.

¹⁴ Ī-rāāī yá̰a̰ malang kə tárá.

¹⁵ Ī-gerī Esətepanas nin̄ kə de kə́ kem kújə yān tə́ gə̄: Ī-gerī kadə̄ dɔ nang kə́ Akayi tə́ ní, i nin̄ n taān̄ kem kété ō, əndān̄ rɔ̄də́ ta kəla yā de gə̄ yā Nə́ɓā tə́ ō ní.

¹⁶ I beé ní, ōōī ta de kə́ tītə̄ ń noō gə̄ ō, náā nəkɔ́ ń rāā kəla sedə́ ō, a̰a̰ tápə̄ sedə́ ō ní, ōōī ta kɔ́ɔ̄ ō.

¹⁷ Rɔ̄ḿ nelə̄m̄ ngá̰ý najə̄ yā Esətepanas tə́ ō, Portunatus tə́ ō, Akaikus tə́ ō. Nin̄-adə̄mə̄n̄ yá̰á̰ ń m̄-nal̄ sɔɔ̄ń gətóo kə́ sḭḭ̄ ī-gətóoī rɔ̄ḿ tə́ ní.

¹⁸ Nin̄-rāān̄ adə̄ kemḿ tetə kə̄ nang tə́, tītə̄ ń rāān̄neé adə̄ kemsí sḭḭ̄ tetə kə̄ nang tə́ ō ní. Majə kadə̄ i-gerī ndigə de kə́ beē gə̄.

¹⁹ De gə̄ kə́ kem Egəlijə gə̄ kə́ dɔ nang kə́ Aji tə́ rāān̄sí lápə́ya. Akilas ō, Pərisil ō, naā tə́ kə de gə̄ kə́ kem Egəlijə tə́ ń a kánə̄n̄ naā kem kújə yādə́ nin̄ tə́ ní, rāān̄sí lápə́ya kə gō ɓoojí naā kə Kɔ́ɔ̄ɓēé.

²⁰ Ngákó̰ó̰sí gə̄ malang rāān̄sí lápə́ya, ī-ɓirī naā dagə ī-rāāīneé naā lápə́ya kə́ loo ngákó̰o̰ naā gə̄ tə́.

²¹ I mā Pol n m̄-ndang lápə́ya gə̄ ń toō kə jīḿ mə̄kɔ́ m-ādə̄sí ní.

²² Ré de kə́rēý táŕ Kɔ́ɔ̄ɓē Jeju Kərist aĺ anī, ādə̄ ndɔ̄ĺ i dɔn tə́. Marana ta.

²³ Ādə̄ Kɔ́ɔ̄ɓē Jeju rāā kem majə sesí.

²⁴ m̄-táŕsí malang kə gō ɓoo naā yājí kə́ kə Jeju Kərist.