1 KORḚNTƏ 11 - Bibəl ta Sar̄

¹ Ī-ndájə̄mī, tītə̄ ń mə̄kɔ́ m̄-ndájəń Kərist ō ní.

Majə kadə̄ dəyá̰ gə̄ selə́n̄ kūbə̄ dɔdə́ tə́ loo kan̄ naā tə́

² m̄-tɔ̄ȳsí, tɔdɔ̄ tū yá̰a̰ gə̄ tə́ malang ní əga kemsí dɔḿ tə́ ō, yá̰a̰ gə̄ ń m-ɔ́jə́sí kə̄ kété ní sḭḭ̄ úniī gō ō.

³ Banī m̄-gḛy kadə̄ ī-gerī yá̰á̰ ń toō: Kərist i de kə́ dɔ dəngam tə́ ō, dəngam i de kə́ dɔ dəyá̰ tə́ ō, Nə́ɓā i de kə́ dɔ Kərist tə́ ō.

⁴ Adə̄ de kə́ dəngam ń utə̄ dɔn a ndɔ̄yń Nə́ɓā, aláa a ədań najə̄ kə́ Nə́ɓā əndā tan tə́ ní, əla i rɔ̄sɔl̄ dɔ de kə́ dɔn tə́ tə́.

⁵ Ba dəyá̰ ń ɔr̄ najə̄ kə Nə́ɓāá, aláa əda najə̄ kə́ Nə́ɓā əndā tan tə́ ba seĺ kūbə̄ dɔn tə́ aĺ ní, əla i rɔ̄sɔl̄ dɔ de kə́ dɔn tə́ tə́ ō. Tɔdɔ̄ to tītə̄ kə́ ni-dəsā i dɔn kɔ̄ɔ́ beē.

⁶ Ré dəyá̰ seĺ kūbə̄ dɔn tə́ aĺ anī, ādə̄ ni-əja nənga dɔn kɔ̄ɔ́ tā! Ba ré kəja nənga dɔ, aláa dəsā dɔ i yá̰á̰ kə́ to rɔ̄sɔl̄ tām̄ yā de kə́ dəyá̰ tə́ anī, ādə̄ ni seĺ kūbə̄ dɔn tə́ kɔ̄ɔ́!

⁷ Ba yā dəngam ní, majə kadə̄ ni-seĺ kūbə̄ dɔn tə́ alé. Tām̄ ni-teē Nə́ɓā ō, ni i yá̰á̰ kə́ ɔsə gɔn Nə́ɓā ō. Ba dəyá̰ i yá̰á̰ kə́ ɔsə gɔn dəngam.

⁸ Tɔdɔ̄ i dəyá̰ ń ɔrə̄n̄ dəngam rɔ̄n tə́ ní alé, banī i dəngam n ɔrə̄n̄ dəyá̰ rɔ̄n tə́ ní.

⁹ Tá rāān̄ dəngam i tām̄ yā dəyá̰ tə́ alé, banī rāān̄ dəyá̰ i tām̄ yā dəngam tə́.

¹⁰ I tām̄ najə̄ ń noō tə́ n majə kadə̄ dəyá̰ ndi kə yá̰á̰ kə́ ɔjə kadə̄ ni-əla dɔn gíŕ tɔ́gə yā ngaan tə́ dɔn tə́ ní, i najə̄ yā de kə́ dɔ rā̰ tə́ gə̄ tə́.

¹¹ Ɓá tā ba ta kum Kɔ́ɔ̄ɓē tə́ ní, dəyá̰ a ɔr̄ rɔ̄n kɔ̄ɔ́ rɔ̄ dəngam tə́ aĺ ō, dəngam a ɔr̄ rɔ̄n kɔ̄ɔ́ rɔ̄ dəyá̰ tə́ aĺ ō.

¹² Tɔdɔ̄ tītə̄ ń Nə́ɓā teē kə dəyá̰ i rɔ̄ dəngam tə́ ní, i dəyá̰ n ojə dəngam ní ō, ba yá̰a̰ malang ḭḭ i rɔ̄ Nə́ɓā tə́.

¹³ Sḭḭ̄ kɔ́ gə̄ ī-gāngī najə̄ ń toō: Kadə̄ de kə́ dəyá̰ ndɔ̄ȳ Nə́ɓā kanjə̄ seĺ kūbə̄ dɔn tə́ ní, i yá̰á̰ kə́ əhɔ naā majə a?

¹⁴ Yá̰á̰ ń Nə́ɓā nəkɔ́ rāā ní ndóōsí kadə̄ nənga dɔ kə́ ngāl̄ ngá̰ý i yá̰á̰ kə́ to rɔ̄sɔl̄ tām̄ yā de kə́ dəngam tə́ aĺ a?

¹⁵ Ba ré nənga dɔ dəyá̰ ngāl̄ anī, nənga dɔn kə́ ngāl̄ ní ɔsə gɔnən, tɔdɔ̄ Nə́ɓā adə̄n nənga dɔ i kum gotə kūbə̄ kə́ seĺ dɔn tə́ tə́.

¹⁶ Ba ré deē kógə̄ḿ gḛy nējə̄ najə̄ kə́ dɔ tə́ anī, jḭḭ ō, de gə̄ kə́ kem Egəlijə gə̄ yā Nə́ɓā tə́ ō, j-aw̄ kə jī bēl̄ loo rāā yá̰á̰ kə́ tītə̄ ń noō alé.

Kəsa yā Kɔ́ɔ̄ɓē

¹⁷ Najə̄ ń toō gír yān gān̄g kɔ̄ɔ́, ba nge kə́ rang ń j-a j-awī kə̄ dɔ tə́ toō ní mā m̄-tɔ̄ȳsí loon tə́ alé. Tɔdɔ̄ kán̄ naā yāsí i kán̄ naā kə́ a rāā kadə̄ ī-tɔgiī kum kə̄ kété alé, banī a rāā i majaĺ sesí.

¹⁸ Yá̰á̰ kə́ ta kəga dɔ ní, ədamə̄n̄ na dan ń ré ī-kánī naā anī, kēgə̄ naā na to dɔ dáńsí tə́. Ba m̄-ger̄ majə kadə̄ i najə̄ kə́ sor̄ malang alé.

¹⁹ Tɔdɔ̄ i gáŕ kadə̄ gán̄g naā to dɔ dáńsí tə́, yā kadə̄ gerə̄n̄neé ngé mbātə́ gán̄g naā gə̄.

²⁰ Dan ń ī-kánī naā ní, i kəsa yā Kɔ́ɔ̄ɓē n sḭḭ̄ ā ə́saī ní alé.

²¹ Tɔdɔ̄ kum mbang kəsa yá̰á̰ tə́ anī, náā nəkɔ́ a əsa yá̰a̰ yān i kə nja tewle gēé. Adə̄ de kə́rēý gə̄ ndin̄ i kə ɓōó ō, de kə́rēý gə̄ kasə rāādə́ kɔ̄ɔ́ ō.

²² Ə́ngeī i kújə kə́ yā kadə̄ ə́saī yá̰a̰ ō ā̰yī yá̰a̰ ō kemeé aĺ i mbéé a? Aké ī-kídī i Egəlijə yā Nə́ɓā ō, ī-sāāī i kəla rɔ̄sɔl̄ dɔ ngé gə̄ ń yá̰a̰ yādə́ gətóó tə́ ō ní a? Kə m-ə́dásí na i rí? Kə m̄-tɔ̄ȳsí najə̄n tə́ a? ḿm, mā m-ā m̄-tɔ̄ȳsí tām̄ yā nge ń noō tə́ alé.

²³ Tɔdɔ̄ yá̰á̰ ń Kɔ́ɔ̄ɓē ɔjəm̄ mā á mā m-ɔ́jə́sí kə̄ kété ní n toó: Ndɔ̄ɔ́ ndɔ̄ ń a əlan̄neé Kɔ́ɔ̄ɓē Jeju jī de gə̄ tə́ ní, ni-un mápa,

²⁴ ba dan ń ndadə̄ Nə́ɓā dɔ tə́ oy anī, tētə̄ naā tə́ ba əda na: Nge ń toō i rɔ̄ḿ ń m-ādə̄ tām̄ yāsí tə́ ní. Ī-rāāī yá̰á̰ ń toō kadə̄ əgań kemsí dɔḿ tə́.

²⁵ Dan ń əsan̄ yá̰á̰ gír gān̄g ní a, ni-rāā tītə̄ ń noō kə kópó ō, ba gō tə́ anī əda na: Kópə́ ń toō i madə̄ naā kə́ kijə kə́ Nə́ɓā əhɔ kə de gēé kə ta kūl̄ mósə́ḿ māá. Ī-rāāī yá̰á̰ ń toō yā gírəń dɔḿ tə́ kə dɔ ka̰ȳsí yá̰á̰ kə́ kem kópə ń toō tə́ gə̄ malang.

²⁶ Tɔdɔ̄ kə dɔ kəsasí mápá ń toō malang ō, kə dɔ ka̰ȳsí yá̰á̰ kə́ kem kópə ń toō tə́ gə̄ malang ō ní, ɔ́jiī i koy Kɔ́ɔ̄ɓē bátə́ kadə̄ ni-reēń.

²⁷ I tām̄ najə̄ ń toō tə́ n ré deē kógə̄ḿ əsa mápa yā Kɔ́ɔ̄ɓē, aláa a̰ȳ yá̰á̰ kə́ kem kópə yān tə́ kə háĺ kə́ majə kadə̄ əsań aĺ ō, a̰ȳń aĺ ō anī, sarya a əsō dɔn tə́ najə̄ yā rɔ̄ Kɔ́ɔ̄ɓē tə́ ō, mósən tə́ ō ní.

²⁸ I beé ní, ādə̄ deē əndā ma̰ȳ rɔ̄n nəkɔ́ pá tá əsa mápá ní ō, ā̰ȳ yá̰á̰ kə́ kem kópə́ ní tə́ ō.

²⁹ Tɔdɔ̄ ré deē əsa mápá ní ō, a̰ȳ yá̰á̰ kə́ kem kópə ní tə́ ō, kanjə̄ gír̄ kadə̄ i rɔ̄ Kɔ́ɔ̄ɓē anī, yá̰á̰ ń ni-əsa ō a̰ȳ ō ní, i sarya kə̄ dɔn nəkɔ́ tə́.

³⁰ I tām̄ najə̄ ń noō tə́ n ngé mo̰y gə̄ i ngá̰ý dansí tə́ ō, de kə́ nujə gə̄ i ngá̰ý ō, ngá̰ý gə̄ oyn̄ kɔ̄ɔ́ ō ní.

³¹ Ré j-əlaī gír i kə kəndā ma̰ȳ rɔ̄jí jḭḭ̄ kɔ́ gɔ̄ɔ́ anī, j-a j-əsōī kum sarya yā Nə́ɓā tə́ alé.

³² Banī Kɔ́ɔ̄ɓē gān̄g sarya dɔjí tə́ ō, əndají ō, i yā kadə̄ sarya əhɔńjí naā tə́ kə de kə́ dɔ nang tə́ gēé alé.

³³ I beé ní ngákó̰ó̰ḿ gə̄, loo ń ré ī-kánī naā tām̄ yā kəsa yā Kɔ́ɔ̄ɓē tə́ ní a, ī-ngóōī naā.

³⁴ Ré de kə́rēý ɓō rāān anī ādə̄ ni-əsa yá̰a̰ ɓēé, na sōgə́ sarya əsō dɔsí tə́ najə̄ yā kán̄ naā yāsí tə́. Ré m-ūgə̄ anī m-ā m-ə̄ndā gotə najə̄ kə́ rang gə̄ ní naā tə́.