1 KORḚNTƏ 10 - Bibəl ta Sar̄

Najə̄ kə́ dɔ ɓesə̄ gə̄ tə́

¹ Ngákó̰ó̰ḿ gə̄, m̄-gḛy kadə̄ ī-ndiī kanjə̄ ger̄ yá̰á̰ ń rāā kaají gə̄ kété ní alé. Nin̄ malang ní ndin̄ gír kil̄ man̄ tə́ ō, gāngə̄n̄ bā bo ō.

² Adə̄ rāān̄də́ batém malang kum kil̄ man̄ tə́ ō, kum bā bo tə́ ō, dan ń nin̄-ɓoon̄ naā kə Moijə ní.

³ Nin̄ malang ní əsan̄ yá̰a̰ yā Nə́ɓā kə́ kógə̄ḿ beē ō,

⁴ a̰ȳn̄ man̄ yā Nə́ɓā kə́ kógə̄ḿ beē ō. Tɔdɔ̄ mbal̄ yā Nə́ɓā ń un gōdə́ ní nin̄-a̰ȳn̄ man̄ kə́ teē tū tə́, ba mbal̄ ní i Kərist.

⁵ Ɓá tā ba ngá̰ý gə̄ dandə́ tə́ ní nel̄ Nə́ɓā sedə́ alé. I tām̄ najə̄ ń noō tə́ n nīńdə́ to kem dəla loo tə́ ní.

⁶ Yá̰a̰ gə̄ ń noō ń rāān̄ yá̰á̰ ní, i yā kadə̄ ré jḭḭ̄ j-a̰a̰ī ɓáa kadə̄ ngur yá̰á̰ kə́ majaĺ rāājí tītə̄ yādə́ alé.

⁷ Ī-lōōī rāā ɓesə̄ tītə̄ ń ngé kə́rēý gə̄ dáńdə́ tə́ rāān̄neé ní. Tɔdɔ̄ ndangən̄ kem makətūbə̄ yā Nə́ɓā tə́ na: Ngán Israel gə̄ na ndin̄ nang tə́ əsan̄ yá̰a̰ ō, a̰ȳn̄ ō, ba gō tə́ ɓáa na ḭḭn̄ dɔɔ́ na ndāmə̄n̄ naā.

⁸ Jə-lōōī sāā naā loo kaya tə́ tītə̄ ń ngé kə́rēý gə̄ dáńdə́ tə́ rāān̄neé, adə̄ de gə̄ dūbú kutə jōó gidə i mətá oyn̄neé ndɔ̄ kógə̄ḿ beē ní.

⁹ Jə-lōōī nāā Kɔ́ɔ̄ɓē, tītə̄ ń ngé kə́rēý gə̄ dáńdə́ tə́ rāān̄neé, adə̄ lī gə̄ tṵ́ṵ̄n̄də́ adə̄ oyn̄ ní.

¹⁰ Ī-lōōī yṵ́r̄ najə̄, tītə̄ ń ngé kə́rēý gə̄ dandə́ tə́ yṵ́rə̄n̄neé, adə̄ nin̄-udən̄ kɔ̄ɔ́ jī nge kəla yā Nə́ɓā kə́ nge tɔ̄l̄ yo tə́ ní.

¹¹ Yá̰a̰ gə̄ ń noō malang teēn̄ dɔdə́ nin̄ tə́ i yā kɔjəń de kə́ rang gə̄ yá̰a̰ kadə̄ gerə̄n̄. Ba ndangən̄də́ kem makətūbūú i yā tāańjí jḭḭ̄ ń j-ugī ta ngóy ndɔ̄ gə̄ tə́ ní.

¹² I beé ní, deē ń gír̄ kadə̄ ni i de kə́ ra dɔɔ́ anī, ādə̄ a̰a̰ rɔ̄n majə na sōgə́ əsō.

¹³ Yá̰a̰ nāā gə̄ malang ń nāān̄neésí ní, i yá̰a̰ nāā gə̄ kə́ asən̄ gō tɔ́gə deē tə́. Nə́ɓā i de kə́ nge ra dɔ ndūn tə́, adə̄ ni a əya̰ kadə̄ nāā tɔȳ tɔ́gə́sí alé. Ni a adə̄sí tɔ́gə́ kə́ kadə̄ ī-tə́gāīneé tasí ta yá̰a̰ nāā tə́ ō, a rāā ta róbə kə́ kadə̄ ī-teēīneé kɔ̄ɔ́ ta tə́ ō.

¹⁴ Adə̄ kó tár yāḿ gə̄, ī-lōōī rāā ɓesə̄.

¹⁵ M-ɔ̄r̄ najə̄ sesí i tītə̄ kə́ m-ɔ̄r̄ i kə de kə́ ger̄ yá̰a̰ gēé beē. Yá̰á̰ ń m-ə́dá ní sḭḭ̄ kɔ́ gə̄ ə̄ndāī ma̰ȳ.

¹⁶ Ī-gírī dɔ kópə tɔ́r̄ ta ń jə-ndadə̄ j-adī Nə́ɓā tāmən tə́ ní tə́: Dan ń j-a̰yī yá̰á̰ kə́ kemeé ní, ɓoojí naā tə́ kə mósə Kərist aĺ a? Tá mápá ń jə-gángī naā tə́ ní: Dan ń j-əsaī ní ɓoojí naā tə́ kə rɔ̄ Kərist aĺ a?

¹⁷ Tītə̄ ń mápa i kógə̄ḿ beē ní, jḭḭ̄ ń i ngá̰ý ní, jḭḭ̄ i rɔ̄ kə́ kógə̄ḿ beē ō, tām̄ jḭḭ̄ malang j-əsaī i mápá kə́ kógə̄ḿ beē.

¹⁸ Á̰a̰ī ngán Israel gə̄: Ngé gə̄ ń əsan̄ dā̰ gə̄ ń tɔ̄lə̄n̄ ba tunə̄n̄ ní, Nə́ɓā ń ɔrə̄n̄ kam̄ loo tun̄ yá̰a̰ kə rīneé ní, nin̄-ɓoon̄ naā seneé.

¹⁹ Kum yá̰á̰ ń m̄-sāā kəda ní na i rí? m̄-sāā i kəda na dā̰ ń tɔ̄l̄ adə̄n̄ ɓesə̄ ní i yá̰á̰ kə́rēý a? Aké m̄-sāā i kəda na ɓesə̄ i yá̰á̰ kə́rēý a?

²⁰ Yá̰á̰ ń m̄-sāā kəda ní n noō alé! M-ə́da na yá̰á̰ ń de kə́ ndágá gə̄ tunə̄n̄ ní, tun̄ adə̄n̄ i ndíĺ kə́ majaĺ gə̄ ba i Nə́ɓā alé. m̄-gḛy kadə̄ ī-ɓooī naā kə ndíĺ kə́ majaĺ gə̄ alé.

²¹ Sḭḭ̄ ásiī ka̰ȳ yá̰á̰ kə́ kem kópə yā Kɔ́ɔ̄ɓē tə́ ō, yá̰á̰ kə́ kem kópə yā ndíĺ kə́ majaĺ gə̄ tə́ ō dɔ naā tə́ alé. Sḭḭ̄ ásiī kəsa yá̰a̰ ta kār̄ yā Kɔ́ɔ̄ɓē tə́ ō, ta kār̄ yā ndíĺ kə́ majaĺ gə̄ tə́ ō dɔ naā tə́ alé.

²² Aké jə-gḛyī i kadə̄ wōn̄g rāā Kɔ́ɔ̄ɓē a? Jḭḭ̄ jə-ngangī ngá̰ý jə-tɔȳniī a?

Ī-rāāī yá̰a̰ malang tām̄ yā kɔsəń gɔn Nə́ɓā

²³ Ngé kə́rēý gə̄ ədan̄ na Nə́ɓā na adə̄jí ta róbə rāā yá̰a̰ malang. Rɔ̄kum, Nə́ɓā adə̄jí ta róbə rāā yá̰a̰ malang ɓá tā, ba i yá̰a̰ malang n i yá̰á̰ kə́ majə ní alé. Nə́ɓā adə̄jí ta róbə rāā yá̰a̰ malang ɓá tā, ba i yá̰a̰ malang n a rāā kə deé kadə̄ tɔgəń kum kə̄ kété ní alé.

²⁴ Ādə̄ deē sāā yá̰á̰ kə́ tām̄ yā majə yān nəkɔ́ tə́ alé, banī i yá̰á̰ kə́ tām̄ yā majə yā madə̄n gə̄ tə́ tá.

²⁵ Əsaī yá̰a̰ malang ń a igən̄neé loo gātə̄ dā̰ gə̄ tə́ ní, kanjə̄ dəje gír, na sōgə́ kemsí rāāsí.

²⁶ Tɔdɔ̄ ndangən̄ kem makətūbə̄ yā Nə́ɓā tə́ na: Dɔ nang ō, yá̰a̰ malang kə́ tū tə́ ō, i yā Kɔ́ɔ̄ɓē.

²⁷ Adə̄ ré de kə́ nge taā kem aĺ kógə̄ḿ mēr̄sí kəsa yá̰a̰ ba ī-ndigiī kaw̄ anī, ə́saī yá̰a̰ malang ń a adə̄n̄sí ní, kanjə̄ dəje gír, na sōgə́ kemsí rāāsí.

²⁸ Ba ré de kə́rēý ədasí na dā̰ ń toō i dā̰ kə́ tun̄ adə̄n̄ ɓesə̄ gə̄ anī, ə́saī alé tām̄ yā deē ń ədasí najə̄ tə́ ní ō, najə̄ yā kem rāā tə́ ō.

²⁹ M-ɔ̄r̄ i najə̄ kem rāā yāsí sḭḭ̄ kɔ́ gə̄ alé, ba i najə̄ kem rāā yā deē ní. Banī de kə́rēý a dəje najə̄ a əda na: Mā ń i kɔ́ɔ̄ rɔ̄ḿ ní ké kem rāā yā de kə́ rang a ɔgə̄m̄ rāā yá̰a̰ i tām̄ yā rí tə́ wa.

³⁰ Ré m̄-ndadə̄ m-ādə̄ Nə́ɓā tá m-ə́sá yá̰a̰ anī, i tām̄ rí tə́ á a ədan̄ najə̄ kə́ majaĺ dɔḿ tə́ tām̄ yā yá̰á̰ ń m̄-ndadə̄ Nə́ɓā dɔ tə́ ní wa?

³¹ I beé ní, ká ré ə́saīneé i yá̰a̰, aké ā̰yīneé i yá̰a̰, aké ī-rāāīneé i rí gə̄gē anī, ī-rāāī yá̰a̰ malang yā kadə̄ ɔ́siīneé gɔn Nə́ɓā.

³² Ī-lōōī rāā yá̰á̰ kógə̄ḿ kə́ kadə̄ Jipə gə̄, aláa Gərek gə̄, aláa Egəlijə yā Nə́ɓā a̰a̰n̄ anī əsōn̄.

³³ I beé n mə̄kɔ́ m-ə́hɔ rɔ̄ḿ tɔgə m̄-rāań yá̰a̰ malang kadə̄ nel̄ de gə̄ malang ní. Tɔdɔ̄ m̄-sāā yá̰á̰ kə́ tām̄ yā majə yā de kə́ ngá̰ý gə̄ tə́, kadə̄ nin̄-ajən̄neé.