1 JA̰A̰ 5 - Bibəl ta Sar̄

Jə-tetiī de kə́ dɔ nang tə́ laā gə̄ rɔ̄ɔ̄ kɔ̄ɔ́

¹ Náā nəkɔ́ ń taā kem kadə̄ Jeju i Kərist ní, i Nə́ɓā n ojən. Ba náā nəkɔ́ ń táŕ Bɔbə̄ Ngōn̄ ní, tár Ngōnən ō.

² I dan ń jə-táriī Nə́ɓā ō, jə-rāāī yá̰a̰ i kə gō míndəneé ō ní n jə-gerī kadə̄ jə-táriī ngáń Nə́ɓā ní.

³ Tɔdɔ̄ yá̰á̰ ń i tár Nə́ɓā ní n toó: I rāā yá̰a̰ kə gō míndəneé, ba gō míndən i yá̰á̰ kə́ ɔȳ gə̄ alé.

⁴ Tɔdɔ̄ de gə̄ malang ń Nə́ɓā ojədə́ ní, tetən̄ de kə́ dɔ nang tə́ laā gə̄ rɔ̄ɔ̄ kɔ̄ɔ́. Ba yá̰á̰ ń jə-tetiīneé de kə́ dɔ nang tə́ laā gə̄ rɔ̄ɔ̄ ní, i taā kə́ jə-taāī kem.

⁵ I náā n tetə de kə́ dɔ nang tə́ laā gə̄ rɔ̄ɔ̄ ní? I deē ń taā kem kadə̄ Jeju i Ngōn̄ Nə́ɓā ní aĺ a?

Najə̄ yā de kə́ kum tə́ kə́ dɔ Jeju Kərist tə́

⁶ I Jeju Kərist n reē kə ta kūl̄ man̄ ō, mósə ō ní. Reē i kə ta kūl̄ man̄ ngóy alé, banī i kə ta kūl̄ man̄ ō mósə ō. Tá i Ndíĺ kə́ Táĺ n i nge kəda najə̄ kə́ kum tə́ dɔn tə́ ní, tɔdɔ̄ Ndíĺ kə́ Táĺ i najə̄ kə́ rɔ̄kum.

⁷ Tɔdɔ̄ ngé kəda najə̄ kə́ kum tə́ gə̄ i mətá:

⁸ I Ndíl ō, man̄ ō, mósə ō. Nin̄ mətá mbak ní, najə̄ kɔr̄də́ i gō naā tə́.

⁹ Ré jə-ndigiī najə̄ kə́ kum tə́ yā de gə̄ anī, yā Nə́ɓā i kə́ bo tɔȳ yādə́. Najə̄ kə́ kum tə́ ń ni-əda dɔ Ngōnən tə́ ní n noó.

¹⁰ Deē ń taā kem Ngōn̄ Nə́ɓā anī, najə̄ kə́ kum tə́ ngeé ń toō i kemən tə́. Ba deē ń taā kem Nə́ɓā aĺ ní, rāā Nə́ɓā i nge sor̄ tə́. Tɔdɔ̄ ni-taā kem najə̄ kə́ kum tə́ ń Nə́ɓā əda dɔ Ngōnən tə́ ní alé.

¹¹ Najə̄ kə́ kum tə́ ní n toó: Nə́ɓā adə̄jí ndi kə kumuú kə́ ngándáńg, ba ndi kə kumuú ngeé ń toō ní i kem Ngōnən tə́.

¹² Deē ń i kə Ngōn̄ Nə́ɓāá ní, ni i de kə́ ndi kə kumneé. Deē ń i kə Ngōn̄ Nə́ɓāá aĺ ní, ni i de kə́ ndi kə kumneé alé.

Ndi kə kumuú kə́ ngándáńg

¹³ m̄-ndang najə̄ gə̄ ń toō makətūbūú m-ādə̄sí sḭḭ̄ ń ī-taāī kem ngōn̄ Nə́ɓā ní, kadə̄ ī-gerīneé na sḭḭ̄ ə́ngeī ndi kə kumuú kə́ ngándáńg kɔ̄ɔ́.

¹⁴ Jə-ndiī kanjə̄ sōl̄ yá̰á̰ kógə̄ḿ ta kum Nə́ɓā tə́. Tɔdɔ̄ ré jə-dəjeniī yá̰á̰ kə́rēý kə gō kem ndigə yānneé anī, ni-oōjí.

¹⁵ Dan ń jə-gerī kadə̄ ni-oōjí loo ń jə-dəjeniī yá̰á̰ kə́rēý ní, jə-gerī kadə̄ j-əngeī yá̰á̰ ń jə-dəjeniī ní.

¹⁶ Ré de kə́rēý a̰a̰ ngōkó̰o̰n loo rāā majaĺ kə́ a əla deē ta yo tə́ aĺ tə́ anī, ādə̄ ni-ndɔ̄ȳ Nə́ɓā tām̄ yān tə́, na Nə́ɓā a rāā kadə̄ a ndi kə kumneé. Majaĺ kógə̄ḿ kə́ a əla deē ta yo tə́ i noó. Ba i nge ń noō n m-ə́da najə̄ yā ndɔ̄ȳ tām̄ yā nge rāān tə́ ní alé.

¹⁷ Yá̰á̰ kə́ gō tə́ aĺ gə̄ malang i majaĺ, ba i majaĺ malang n a əla deē ta yo tə́ ní alé.

¹⁸ Jə-gerī kadə̄ deē ń Nə́ɓā ojən ní, a rāā majaĺ alé, tɔdɔ̄ Nə́ɓā a ngɔ̄mə̄n. I yá̰á̰ ń noō n Sətan ń i de kə́ majaĺ ní ɔdəń rɔ̄n aĺ ní.

¹⁹ Jə-gerī kadə̄ jḭḭ̄ i de gə̄ yā Nə́ɓā, banī de kə́ dɔ nang tə́ gə̄ malang ní nin̄ i gíŕ tɔ́gə yā De kə́ Majaĺ tə́.

²⁰ Jə-gerī kadə̄ Ngōn̄ Nə́ɓā reē ō, ni-adə̄jí kur̄ dɔ kə́ kadə jə-gerīneé De kə́ Rɔ̄kum ō. Banī jḭḭ̄ i kem De kə́ Rɔ̄kum tə́ i kə ta kūl̄ Ngōnən Jeju Kərist. Ni i De kə́ Rɔ̄kum ō, ni i Nə́ɓā ō, ni i ndi kə kumuú kə́ ngándáńg ō.

²¹ Ngánə́ḿ kə́ dūú gə̄, ī-ngɔ̄mī rɔ̄sí najə̄ yā ɓesə̄ gə̄ tə́.