Юдэ́нгэ 6 - Библия - Пэ Балтитко Романи чиб (Романэс) 2019

Зорало́ Патяибэ́н

¹ Палдава́ мэкаса амэ пэ́рва лава́ пал Христосо́стэ и ява́са тэ пириджас тэ причхувас зор кэ дасаво сыклякирибэ́н, саво́ трэй ваш сталонэ дэвлытконэнгэ; нэ амэ на ява́са нэвэ́стыр тэ сыклякирас пал дасаво джиибэ́н, со янэ́ла манушэ́н кэ мэрибэ́н, а пал патяибэ́н дрэ Дэвлэ́стэ;

² пал болдэипэн, пал вастэнгиро чхуибэ́н упрэ́ пэ манушэ́стэ, пал отджидякирибэн мулэ́ндыр и пал ве́чно сэ́ндо.

³ И амэ кэра́са дава́, ко́ли явэ́ла пэ дава́ Дэвлэ́скири во́ля.

⁴ Дава́ на могинэ́ла (шашты) тэ явэ́л ваш одолэ́нгэ, конэ́скэ сыс роспхэндло чачипэ́н пал Дэвлэ́стэ, и савэ́ уджиндлэ́ Болыбна́скиро тала́но (да́ро), и дорэснэ́ (долынэ) пэ́скири паш явирэ манушэ́нца Свэнтонэ́ Духо́стыр;

⁵ и савэ́ уджиндлэ́ лачхипэ́н Дэвлэ́скирэ лавэ́стыр и векоскири зор, сави́ явэ́ла анги́л, ке́ли Дэвэ́л явэ́ла тэ хулаинэ́л;

⁶ и савэ́ мэкнэ́ тэ патя́н; кадасавэн манушэ́н нашты́ нэвэ́стыр тэ сыклякирас, соб (кай) ёнэ тэ рискирэ́н пэ́скиро джиибэ́н кэ Дэвэ́л, пал-дова́ со ёнэ сы́рбы нэвэ́стыр примарэна кэ трушу́л Дэвлэ́скирэ Чхавэ́с и отдэна Лэс пэ сабэн манушэ́нгэ.

⁷ Дэвэ́л бахтякирэ́ла дасави́ пхув, сави́ лэ́ла пани́ брышындэстыр и савья́тыр гив барьёла ваш одолэ́ манушэ́нгэ, кон кэрэ́ла буты́ пэ ла́тэ;

⁸ а ко́ли екх хру́сто сувье́нца (дылыны чар) и пхусады́тко хру́сто (ґарь) барьёна пэ дая́ пхув, тэды ёй исын налачхи ни кэ со, и Дэвэ́л могинэ́ла тэ прокошэл ла, а яг схачкирэ́ла дая́ чар дро ко́нцо (дро яго́ро).

⁹ Дро́га амарэ́, на дыкхи́ пэ дава́, со амэ ракираса адя́кэ, амэ патя́са дрэ тумэ́ндэ, со тумэ́ сан фэды́р и пашылэды́р кэ дова́, соб (кай) Дэвэ́л тэ зракхэ́л тумэн.

¹⁰ Пал-дова́ со Дэвэ́л нанэ напатяибнаскиро и Ёв на бистрэла тумари́ буты́ и паты́в кэ яви́р мануша́, савэ́ тумэ́ кэрдэ́ ваш Лэ́скиро лав, ке́ли тумэ́ помогинэнас (дэ́нас васта́) и какана́ помогинэна дэвлытконэнгэ.

¹¹ Амэ камаса, соб (кай) кажно ману́ш тумэ́ндыр тэ патял хачкирдэ́ илэ́са кэ ко́нцо (кэ яго́ро),

¹² соб (кай) тумэ́ тэ на явэ́н кирнэ-масэ́нгиро, а тумэ́ тэ кэрэ́н адя́кэ-паць, сыр кодолэ́ мануша́, савэ́ пэ́скирэ патяибна́са и длугонэ ужакирибнаса дорэсэ́на дова́, пал со Дэвэ́л дыя́ лав лэ́нгэ.

Дэвлэ́скири Совла́х исын Чачуны́

¹³ Ке́ли Дэвэ́л дыя́ лав Авраамо́скэ, пал-дова́ со Ёв на могиндя́ ни пэ конэ́стэ вучэды́р Пэ́стыр тэ совлахал, тэды Ёв совлахадя́ Кокоро́ пэ Пэ́стэ,

¹⁴ и пхэндя́: “Мэ, чачэс, бахтякирава Тут и Мэ да́ва бут бут чхавэ́н ту́кэ”;

¹⁵ а Авраа́мо ужакирдя ґара́ (длу́гэс) и дорэсця́ дова́, пал со Дэвэ́л дыя́ лав лэ́скэ.

¹⁶ Мануша́ совлахана пэ вари-конэ́стэ, кон исын барэды́р лэ́ндыр и совла́х исын сы́рбы допхэныбэ́н, со лэ́скэ трэй тэ сполнинэл и тэ чхувэ́л ко́нцо (яго́ро) пэ сарэ́ лэ́нгирэ чингарда́.

¹⁷ Палдава́ Дэвэ́л выкэдыя́ зоралэды́р тэ сыкавэ́л Пэ́скири напаруибны́тко во́ля тэ кэрэ́л кэ ко́нцо (кэ яго́ро) лав, со Ёв дыя́ одолэ́ манушэ́нгэ, савэ́ прилынэ́ Лэ́скиро пхэндло́ лав, и Ёв допхэндя совлахаса.

¹⁸ Дэвэ́л кэрдя́ адя́кэ пир дуй чачипэна́: Дэвэ́л на парувэла пхэндло́ лав и на хохавэла. Амэ́нгэ, савэ́ чхурдыямпэ кэ Ёв тэ ухтыласпэ пал наде́я, со сыс дыны́ амэ́нгэ, явэ́ла зорало́ подыно васт (помошш) тэ зракхаспэ.

¹⁹ Кадая́ наде́я подрикирэ́ла амаро́ ило́ дрэ зор бидаракирэс и исын сы́рбы якрё ваш ди, саво́ рикирэ́ла амэн, и ёй заджа́ла дро най свэнтэдыр штэ́то пал шы́рма, дро Болыбна́скиро Раё,

²⁰ одори́к загия́ Ису́со анги́л амэ́ндэ, и яця́ Англатунэ́ Раша́са пэ сарэ́ ве́ки, пир дасаво-паць титуло, сыр и Мелхисэдэко.