Юдэ́нгэ 12 - Библия - Пэ Балтитко Романи чиб (Романэс) 2019

Дэвэ́л исын Амаро́ Дад

¹ Пал-дова́ со трусця́л амэ́ндэ адя́кэ-паць исын ада́кицы бут якхи́тка/якхалэ́ (свидетели), явэ́н чхурдаса пэ́стыр любо ґа́мо пхарипнаса и грэ́хо, саво́ припхандэлапэ кэ амэ сыр фэлы́ (сетка) и ява́са со исын зор тэ вырикирас, ява́са тэ причхувас зор тэ джас пир амаро́ джиибнытко дром, саво́ исын анги́л амэ́ндэ;

² и ява́са тэ дыкхас пэ Исусо́стэ, Савэ́стыр исын амаро́ патяибэ́н, и Саво́ кэрэ́ла амэн бидошакирэнца, Саво́ заме́ст ра́дыма, сави́ явэ́лас ваш Лэ́скэ, и Саво́ вырикирибнаса пиридживдя трушулыбэн кэ мэрибэ́н, на дыкхи́ пэ ладж, и бэсця́ пир чачо́ (право) васт Дэвлэ́стыр.

³ Обдуминэн хор пал Исусо́стэ, Саво́ пирилыджия вэргитко бипатывакиро сабэн грэхитконэндыр, дава́ саро́ дэ́ла васт тумэ́нгэ тэ на хасякирэ́н зор дро ду́хо (фа́но) и тэ на здэн зорья́са.

⁴ Тумэ́ ишчо (инкэ́) на мардэ́пэ кэ рат, ке́ли тумэ́ са́нас тэрдэ́ проти грэ́хо.

⁵ И тумэ́ бистырдэ лава́, савэ́ Дэвэ́л ракирдя́ тэ подрикирэ́л тумэн, сыр Пэ́скирэ чхавэ́н: “Чхавоа миро, на лэ пэ ило локхэс, ке́ли Дэвэ́л сыклякирэ́ла тут, и на здэпэ духо́са, ке́ли Ёв пхэнэ́ла зорья́са банг ту́кэ;

⁶ Дэвэ́л сыклякирэ́ла одолэ́ манушэ́с, конэ́с Ёв выкэдэ́ла, и марэла кажнонэ́ манушэ́с, савэ́с Ёв прилэ́ла, сыр Пэ́скирэ чхавэ́с.”

⁷ Явэ́н вырикирдэ, ке́ли Дэвэ́л сыклякирэ́ла тумэн, дава́ сыкавэ́ла, со Дэвэ́л дыкхэ́ла пэ тумэ́ндэ, сыр пэ Пэ́скирэ чхаворэндэ. Ци исын вари-кай адасаво́ чхаво́, савэ́с лэ́скиро дад на сыклякирэ́ла?

⁸ Ко́ли тумэн на сыклякирэ́на, сыр трэй ваш сарэ́ чхаворэнгэ, тэды тумэ́ сан кхэлбы, а на чачунэ́ Дэвлэ́скирэ чхавэ́.

⁹ И ишчо (инкэ́): ке́ли амэ́ндэ сыс дада́ пир амаро́ рат, савэ́ сыклякирдэ́ амэн, и палдава́ амэ кутякирдям лэн, тэды ци пэ бут буты́р амэ́нгэ трэй тэ кандас амарэ́ Дадэ́с пэ ду́хо (фа́но), соб (кай) тэ джива́с?

¹⁰ Амарэ́ дада́ сыклякирдэ́ амэн на́бут дывэса́, нэ Дэвэ́л сыклякирэ́ла ваш амаро́ миштыпэ́н, соб (кай) амэ́нгэ тэ явэ́л паш кхэтанэ́ Лэ́са дрэ Лэ́скири свэнтыма.

¹¹ Кажно сыклякирибэ́н дро акаканатуно часо исын ваш амэ́нгэ на дрэ ра́дыма, а дро пиридживибэн, нэ пало́ (после) дова́, кон высыклыя далэ́ сыклякирибна́стыр, дорэсэ́ла палэ рама́нё (миро) чачипна́скирэ джиибнастыр.

Упхэныбэна́ и Приракхибэна́

¹² Рикирэ́н маму́й (прямэс) пэ́скирэ васта́ и тэрдён сыр трэй пэ пэ́скирэ ґэра́, савэ́ кхинынэ.

¹³ Псирэ́н тумарэ́ ґэрэ́нца пир маму́й (пряма) дроморэ, соб (кай) одолэ́ манушэ́скэ, саво́ исын лангало, тэ на змарэлпэ ґэрэндыр, а соб (кай) ёв тэ джал маму́й (прямэс).

¹⁴ Причхувэ́н зор, соб (кай) тумэ́нгэ тэ явэ́н дро рама́нё (миро) сарэ́нца и дрэ свэнтыма, би савэскиро нико́н на дыкхэ́ла Рас-Дэвлэ́с.

¹⁵ Дыкхэ́н миштэ́с, соб (кай) нико́н тумэ́ндыр тэ на хасякирэ́л Дэвлэ́скиро бахтякирибэ́н, соб (кай) тэ на явэ́л машки́р тумэ́ндэ кирко́ рукх (корнё), саво́ могинэ́ла тэ янэл фуипэ́н, и соб (кай) лэ́са тэ на явэ́н магирдэ́ бут яви́р мануша́;

¹⁶ соб (кай) машки́р тумэ́ндэ тэ на явэ́л ману́ш, саво́ дживэ́ла джувле́нца би сэвлакиро, ци бидэвлыткари, сыр Иса́во, саво́ пал екх чаро́ хабнаса бикиндя пэ́скири льго́та, сави́ исын пэрвонэ́ биятостэ.

¹⁷ И тумэ́ ж джинэ́на, со пало́ (после) дова́ ёв мыслиндя, соб (кай) дад тэ бахтякирэ́л лэс, нэ кодова́ на приґалыя лэс, пал-дова́ со ёв на могиндя́ тэ рискирэ́л палэ дова́, со кэрдя́.

¹⁸ Тумэ́ на явнэ́ пашылэды́р кэ бэ́рга Синаё, сави́ сашты́ (можна) тэ чилавэн вастэ́са, и сави́ хачола барэ́ яга́са, и на кэ калыпэ́н (тьма), на кэ ми́гла (мрако), на кэ холями балва́л,

¹⁹ тумэ́ на явнэ́ пэ рого́скиро (трубакиро) башаибэн, и пэ зан, сави́ ракирэ́ла дасавэ́ лава́, со мануша́, савэ́ шунэ́на лэн, мангэна пал дова́, соб (кай) лэ́нгэ буты́р далэ́ лава́ тэ на шунэ́н;

²⁰ пал-дова́ со ёнэ на могиндлэ́ тэ шунэ́н дова́, со лэ́нгэ сыс пхэндло́: “Ко́ли и саво́ рискирибна́скиро мурда́л (зверё) дочилавэлапэ кэ дая́ бэ́рга, ёв явэ́ла замардо (мулякирдо) барэ́нца”;

²¹ пэ саро́ дава́ сыс адя́кэ дарано тэ дыкхэ́с, со Мо́йза пхэндя́: “Мэ древа́н издрава дара́тыр;

²² а тумэ́ явнэ́ кэ бэ́рга Сио́но, кэ Болыбна́скиро Ерусалимо, кэ джидэ́-Дэвлэ́скиро фо́ро, кай исын Янго́лы, Савэ скэдынэ́пэ кхэтанэ́,

²³ тумэ́ явнэ́ пашылэды́р кэ Кхангири́, кай скэдынэ́пэ радыма́са чхаворэ́, савэ́ пэ́рва бияндёна, конэскирэ лава́ исын зачхиндлэ́ дро Болыбна́скиро Раё, и кэ Дэвэ́л, Саво́ исын Сэнда́ри пэ сарэ́ндэ и кэ манушэ́нгирэ ду́хи, со ячнэ́ бидошакирэнца;

²⁴ и кэ Ису́со, Саво́ пиридыя амэ́нгэ Нэво́ Завето Дэвлэ́са и кэ дро́го рат, со сыс прочхудо, саво́ исын зоралэды́р Авелёскирэ ратэстыр.

²⁵ Дыкхэ́н, на отрисён криг Одолэ́стыр, Саво́ ракирэ́ла тумэ́нгэ. Ко́ли одолэ́ мануша́, савэ́ отрисинэ криг тэ шунэ́н Лэс, Саво́ ракирдя́ лэ́нгэ Болыбна́стыр пэ пхув, на мениндлэ ка́ра, тэды буты́р сарэ́стыр и амэ на менинаса ла, савэ́нгэ Ёв ракирэ́ла Болыбна́стыр:

²⁶ Конэ́скири зан затринскирдя́ сари́ пхув, и Кон дыя́ лав какана́: “Мэ ишчо (инкэ́) мо́ло триинскирава на екх пхув, нэ и болыбэ́н.

²⁷ Нэ лав “ишчо (инкэ́) мо́ло” сыкавэ́ла пэ дова́, со Дэвэ́л кэрдя́, и со могинэ́ла тэ хасёл, соб (кай) тэ ячэ́лпэ дова́, со ние́кхвар на тринскирлапэ.

²⁸ Пал-дова́ со амэ приласа кралипэ́н, саво́ ние́кхвар на триинскирэлапэ, ява́са тэ ракхас бахталыпэ́н, савэ́са амэ могинаса тэ кэра́с буты́ ваш Дэвлэ́скэ дара́са анги́л Лэ́стэ и ворохо́са (барэ́ дара́са).

²⁹ Пал-дова́ со амаро́ Дэвэ́л исын яг, сави́ саро́ хачкирэ́ла.