Юдэ́нгэ 10 - Библия - Пэ Балтитко Романи чиб (Романэс) 2019

¹ Юдэ́нгиро Зако́но исын сы́рбы зэр (тенё) пал дова́ чачипэ́н, саво́ явэ́ла анги́л, дава́ нанэ кокори патри́н (о́бразо). Палдова́ со Зако́но кокоро́ на кэрэ́ла манушэ́н бидошакирэнца, савэ́ явэ́на тэ мангэ́нпэ Дэвлэ́скэ, ке́ли ёнэ со бэрш янэ́на дасавэ́-паць свэ́нта дыибэна́ пэ алта́рё.

² И мануша́ пириячэнас тэ янэ́н свэ́нта дыибэна́ (жэртвы), ко́ли ёнэ, ке́ли мангэ́напэ Дэвлэ́скэ сыр трэй пир Зако́но, явэ́нас выжужакирдэ грэхостыр екх мо́ло и пэ саро́ джиибэ́н, и грэ́хо на ячэласпэ дрэ лэ́нгири годы́.”

³ Нэ амэ со бэрш рипираса пал грэ́хи, ке́ли янаса свэ́нта дыибэна́ пэ алта́рё.

⁴ Пал-дова́ со нашты́, соб (кай) целянтэнгиро и бузнэнгиро (козлэнгиро) рат тэ отмэкэ́л грэ́хо манушэ́стыр.

⁵ Палдава́, ке́ли Христо́со явдя́ пэ свэ́то, Ёв пхэндя́ Дэвлэ́скэ: “Ту́кэ исын на пир ило́ ни да́ры, ни свэ́нта дыибэна́; нэ Ту приготовиндян маса́ (лоч) ваш Ма́нгэ.

⁶ А цэлонэ́-хачкирибнаскирэ яныбэна́ и свэ́нта дыибэна́ пал грэ́хо нанэ ту́кэ дрэ ра́дыма.

⁷ Тэды Мэ пхэндём: “Гада, Мэ джа́ва, сыр исын чхиндло́ анги́л дрэ лылвари́ пал ма́ндэ; соб (кай) тэ сполнинав, Дэ́вла, во́ля Тыри́.”

⁸ Англэды́р Христо́со пхэндя́: “Ту на мангдян ни да́ро, ни свэ́нто дыибэ́н, ни цэлонэ́-хачкирибнаскирэ яныбэна́, ни да́ры пал грэ́хи, савэ́ янэ́на пир Зако́но.”

⁹ Тэ́ньци Ёв пхэндя́: Ѓа́да, Мэ явдём, соб (кай) тэ сполнинав Тыри́ во́ля.” Ёв чхувэ́ла криг англатуно́ мангипэ́н (па́тери) Дэвлэ́скэ, соб (кай) тэ чхувэ́л и подрикирэ́л яви́р;

¹⁰ и пир Дэвлэ́скири во́ля амэ сам свэнцындлэ Исусо́скирэ Христосо́скирэ мэнькэндыр дрэ маса́, савэ́ сыс яндлэ́ сыр да́ро е́кхвар, пал сарэ́ндэ.

¹¹ И кажно (сва́ко) раша́й дывэ́с дро дывэ́с кэрэ́ла Дэвлэ́скири буты́ и янэ́ла бут мо́лы одолэ́-паць свэ́нта дыибэна́, савэ́ ние́кхвар на могинэ́на тэ злэн грэ́хи,

¹² а Ёв, Христо́со, отдыя́ Пэс е́кхвар дро свэ́нто дыибэ́н пал грэ́хи и бэсця́ пэ саро́ часо пир чачи́ (право) риг Дэвлэ́стыр,

¹³ кай какана́ Ёв ужакирэ́ла, ке́ли Лэ́скирэ вэ́рги явэ́на чхудэ́ тэл Лэ́скирэ ґэра́.

¹⁴ Пал-дова́ со Ёв екхэ свэнтонэ́ яныбнаса кэрдя́ бидошакирэнца пэ саро́ часо одолэ́н, савэ́ исын выжужакирдэ грэхэ́ндыр.

¹⁵ И Свэ́нто Ду́хо (Фа́но) допхэнэ́ла амэ́нгэ: пало́ (после) дова́, сыр Дэвэ́л пхэндя́:

¹⁶ “Ѓа́да, исын дава́ завето, саво́ Мэ кэра́ва лэ́нца пало́ одолэ́ дывэса́, – ракирэ́ла Рай Дэвэ́л: – Мэ пиридава Мирэ́ Зако́ны дрэ лэ́нгирэ илэ́ и Мэ чхина́ва лэн пэ лэ́нгири годы́”;

¹⁷ и лэ́нгирэ грэ́хи и дова́, со ёнэ кэрдэ́ проти Зако́но, Мэ на пририпирава ни екх мо́ло.

¹⁸ А ке́ли грэ́хо исын отмэкно, тэды на трэй буты́р нисо́ тэ янэ́н сыр свэ́нто дыибэ́н пал лэ́ндэ.

Палдава́ Ява́са Пашылэды́р кэ Дэвэ́л

¹⁹ Палдава́, пшала́лэ, амэ могинаса муршканэ́с тэ заджас пэ Свэ́нто Штэ́то, пал-дова́ со Ису́со прочхудя Пэ́скиро рат;

²⁰ Ёв дыя́ зор амэ́нгэ тэ проджас пир шы́рма нэвонэ́ и джидэ́ дромэ́са, саво́ исын пир Лэ́скири лоч (плоть);

²¹ Ёв исын амаро́ Баро́ Раша́й пэ Дэвлэ́скиро Кхэр, саво́ исын дро Болыбна́скиро Раё;

²² палдава́ явэ́н пашылэды́р кэ Дэвэ́л чачунэ́ илэ́са, пхэрдэ́ патяибна́са, соб (кай) тэ явэ́н амарэ́ илэ выжужакирдэ грэхэ́ндыр и тэ на чуинас фуес, со амэ сам бангэ́; тэ явэ́н амарэ́ маса́ обмордэ жужэ́ пане́са.

²³ Ява́са тэ рикираспэ зоралэ́с пал наде́я, сави́ амэ приджиндям би кунипна́скиро, пал-дова́ со Дэвэ́л, Кон дыя́ лав, исын патяибны́тко;

²⁴ явэ́н тэ дыкхас екх пэ екхэ́стэ, соб (кай) тэ сыкавэ́н паты́в екх екхэ́скэ и тэ кэрэ́н лачхипэ́н екх екхэ́скэ;

²⁵ и на ява́са тэ мэкас тэ скэдаспэ дрэ кхангири́, сыр дава́ присыклынэ яви́р мануша́, а ява́са тэ сыклякирас екх екхэ́с бутэды́р, ко́ли тумэ́ дыкхэ́на, со Ра́скирэ-Дэвлэ́скиро Дывэ́с явэ́ла сыг.

²⁶ Пал-дова́ со, ко́ли амэ уджиндям чачипэ́н, нэ усае́кх кэра́са грэ́хо кокорэ́ пэ́стыр, тэды нанэ буты́р нисаво́ свэ́нто дыибэ́н тэ злэл далэ́ грэ́хи,

²⁷ нэ амэ́нгэ ячэ́лапэ барэ́ дара́са тэ ужакирас сэ́ндо и яг, сави́ хачкирэ́ла сарэ́ Дэвлэ́скирэ вэргэ́н.

²⁸ Ко́ли кажно ману́ш, кон на дэ́ла паты́в Мойза́скирэ Законо́скэ, мэрэ́ла битангипнаскиро пир лава́ дуе́ ци тринэ́ якхитконэнгиро (свидетеленгиро):

²⁹ то, сыр тумэ́ думинэ́на, ци пэ бут пхарэдыр явэ́ла ка́ра пэ одолэ́ манушэ́стэ, саво́ сы́рбы штакирэла ґэрэ́нца Дэвлэ́скирэ Чхавэ́с и на гинэ́ла пал свэ́нто завето́скиро рат, савэ́са ёнэ кокоро́ сыс свэнцындло, и ракирэ́ла налачхэ́ лава́ пэ Ду́хо (Фа́но), Савэ́стыр амэ лыям бахталыпэ́н?

³⁰ Амэ джина́са Одолэ́с, Кон пхэндя́: “Мэ отха́ва палэ́ (Мэ отомстинава), и Мэ ява́ва тэ чхував би́да” – ракирэ́ла Рай Дэвэ́л.” И нэвэ́стыр: “Рай Дэвэ́л явэ́ла тэ сэндякирэ́л Пэ́скирэ манушэ́н.”

³¹ Дава́ исын дарано тэ пэрэ́н дрэ джидэ́ Дэвлэ́скирэ васта́.

³² Пририпирэн тумарэ́ пэ́рва дывэса́, ке́ли тумэ́ уджиндлэ́ и патяндынэ́ дрэ Христосо́стэ, тумэ́ са́нас зоралэ́ пир ду́хо (фа́но) дрэ пхарэ́ мэ́ньки;

³³ екхэ рига́тыр, мануша́ холямэс сандлэпэ тумэ́ндыр анги́л манушэ́ндэ, кэрдэ́ би́да тумэ́нгэ; явирэ рига́тыр, тумэ́ кокорэ́ са́нас кхэтанэ́ явирэ манушэ́нца, савэ́ адя́кэ-паць дживэ́нас и мэнчынэнаспэ.

³⁴ Тумэ́ пиридживэнас кхэтанэ́ манушэ́нца, савэ́ сыс бэштэ́ дро штарибэ́н, и ке́ли лынэ́ зорья́са тумаро́ миштыпэ́н, тумэ́ дава́ прилынэ́ радыма́са, пал-дова́ со тумэ́ джинэ́на, со тумэ́ндэ исын дро Болыбна́скиро Раё фэдэды́р миштыпэ́н, саво́ ячэ́лапэ ве́чнэс.

³⁵ На мэкэ́н тумаро́ патяибэ́н, пал со тумэ́ дорэсэ́на баро́ отдыибэ́н Дэвлэ́стыр.

³⁶ Тумэ́нгэ трэй тэ вырикирэн, соб (кай) тэ кэрэ́н саро́ пир Дэвлэ́скири во́ля и тэ дорэсэн дова́, пал со Ёв дыя́ лав тумэ́нгэ.

³⁷ Пал-дова́ со сарэ́са на́бут яця́пэ тэ ужакирас, и Одова́, Кон джа́ла, на зарикирэлапэ.

³⁸ Мирэ́ чачунэ́ мануша́ явэ́на тэ дживэ́н пир пэ́скиро патяибэ́н, нэ ко́ли вари-кон дэ́лапэ палэ́, тэды одова́ ману́ш нанэ лачхо́ Мирэ́ илэскэ.

³⁹ Нэ амэ на сам одолэ́ манушэ́ндыр, савэ́ дэнапэ палэ пэ́скирэ патяибнастыр и джа́на кэ хасибэ́н; нэ амэ патя́са, со Дэвэ́л зракхэ́ла амэн.