Юдэ́нгэ 1 - Библия - Пэ Балтитко Романи чиб (Романэс) 2019

Дэвлэ́скиро Лав Пир Лэ́скирэ Чхавэ́стэ

¹ Дэвэ́л на е́кхвар и пир саро́ ґары́м-ґара́ (ва́го) ракирдя́ амарэ́ прададэнгэ пир пророкэ́ндэ,

² а дрэ далэ́ палатунэ́ (последня) дывэса́ Ёв ракирдя́ амэ́нгэ пир Пэ́скирэ Чхавэ́стэ, Савэс чхудя́ хула́са тэ прилэл Лэ́стыр саро́, и пир Савэ́стэ Ёв создыя́ свэ́то (лот):

³ а Чхаво́, Саво́ зяинэла Дадэ́скирэ слава́са, сыкавэ́ла Пэ́са чачипэ́н пал Дэвлэ́стэ, и рикирэ́ла Пэ́скирэ зоралэ́ лавэ́са саро́ свэ́то, и ке́ли Ёв выжужакирдя́ сарэ́ амарэ́ грэ́хи, тэды бэсця́ пир чачи́ риг Дэвлэ́скирэ Барипнастыр дро Болыбна́скиро Раё.

Дэвлэ́скиро Чхаво́ исын Баро́

⁴ Ёв яця́ пэ ада́кицы фэды́р Янголэндыр, пэ кицы́ лав, саво́ Ёв прилыя́ Дадэ́стыр, исын най фэдэды́р лэнгирэндыр.

⁵ Пал-дова́ со никонэ́скэ ишчо (инкэ́) Янголэндыр на пхэндя́ Дэвэ́л: “Ту сан Миро Чхаво́, ададывэ́с мэ яцём Тырэ́ Дадэ́са (Тыро́ Дад).” Ци: “Мэ ява́ва Лэ́скэ Дад, и Ёв явэ́ла Чхаво́ Ма́нгэ”?

⁶ адя́кэ-паць, ке́ли Ёв нэвэ́стыр (нэвэ́с) янэлас Пэ́скирэ Пэрвонэ́ Чхавэ́с, со латхяпэ пэ свэ́то, Дэвэ́л ракирэ́лас: “И мэк сарэ́ Дэвлэ́скирэ Янго́лы тэ клонинэнпэ (тэ кэрэн шэрэ́са) патыва́са Лэ́скэ.”

⁷ Пал Янголэндэ Ёв ракирэ́ла: “Ёв кэрдя́ Пэ́скирэ Янголэн тэ явэ́н сыр балва́л и Пэ́скирэ дэвлытконэ́ дынарье́н (слугэн) тэ явэ́н сыр яг, со хачола”,

⁸ а пал Чхавэ́стэ: “Дэ́вла, Тыро́ троно, исын пэ сарэ́ ве́ки и Ту кралинэса чачипны́ткэс.

⁹ Ту́кэ пир ило́ чачипэ́н и Ту́кэ исын на пир ило́ дова́, со исын проти Зако́но, пал-дова́ со Дэвэ́л, Тыро́ Дэвэ́л дыя́ паты́в и ра́дыма Ту́кэ буты́р, сыр Тырэ́ малэ́нгэ (другэ́нгэ).”

¹⁰ И ишчо (инкэ́) пхэндя́ Ёв пал Чхавэ́стэ: “Ту, Раё Дэ́вла, англэды́р сарэ́стыр создыян пхув, и болыбэ́н, дава́ кэрдэ́ васта́ Тырэ́.

¹¹ Ёнэ хасёна, а Ту явэ́са тэ дживэ́с, ёнэ сарэ́ пхурьёна, сыр упратуно урибэ́н;

¹² и сыр баро́ дыкхло Ту скрэнцынэса лэс и парувэса пэ нэво́, нэ Ту явэ́са адасаво́-паць и Тырэ́ бэршэнгэ на явэ́ла ние́кхвар ко́нцо (яго́ро).”

¹³ Ке́ли конэ́скэ Янголэндыр Дэвэ́л пхэндя́: “Бэш пэ чачо́ васт Ма́ндыр, пака Мэ чхува́ва вэргэ́н тырэ́н тэл ґэра́ тырэ́.”

¹⁴ Ци ёнэ исын на сарэ́ ду́хи, кадалэ́ Янго́лы, савэ́ дынаринэна (служынэна) одолэ́нгэ, кон дорэсэ́ла пэ́скири паш дро зракхибэ́н.