Vygiiben 27 - Библия - Пэ Балтитко Романи чиб (Романэс) 2019

Алта́рё Ваш Цэ́ла Схачкирибэна

¹ И кэр алта́рё (жэртвенико) вэшэ́стыр ситимо (акацыя) длэнгипна́са дрэ пандж куня́ (локти) и буґлыпнаса пандж куня́ адя́кэ, соб (кай) ёв тэ явэ́л алта́рё штарэ́-вэнглытко, и вучипна́са трин куня́.

² И кэр шынга́ (ро́ги) пэ лэ́скирэ штар вэ́нглы, адя́кэ, соб (кай) лэ́стыр тэ выджа́н шынга́; и обчхув лэс харкомаса (медяса).

³ Кэр кэ ёв пирья тэ вычхувэн дрэ лэ́ндэ пра́ска (пепло), и лопаткицы, копаныцы тэ скэдэл, и бустя́ (видэлки), лопаткицы ваш вангар; сарэ́ приборы кэр харкома́тыр (медятыр).

⁴ Кэр кэ ёв решотка, кхудякирэ (сеткакирэ) родо́стыр, харкома́тыр, и скэр пэ харкомакири кхуды́, пэ ла́кирэ штар вэ́нглы, штар барэ́ ангрустя́ харкома́тыр;

⁵ и чхув ла пир яго́ро алтарёскиро тэла́л, адя́кэ, соб (кай) кхуды́ (сетка) тэ явэ́л кэ паш алта́рё.

⁶ И кэр баландиня́ ваш алта́рё вэшэ́стыр ситимо, и обчхув лэн харкомаса;

⁷ и чхув андрэ́ баландиня́ лэ́скирэ дрэ брэнчы адя́кэ, соб (кай) баландиня́ тэ явэ́н пир дуй рига́ дро алта́рё, ке́ли тэ лыджас лэс.

⁸ Кэр лэс чхучэса андра́л, пхалендыр, сыр сыс сыкадо ту́кэ пэ бэ́рга, адя́кэ мэк тэ кэрэ́н.

Грэ́да (Дво́ро) дрэ Ша́тра

⁹ И кэр грэ́да (дво́ро): паш-дывэсытконэ́ (южнонэ) рига́тыр кэ юго. Ублады́тка (шырмы) ваш грэ́да трэй тэ явэ́н крэнцона, висоно́стыр, длэнгипна́са дрэ шэл куня́ пир екх риг;

¹⁰ сты́лбы ваш лэ́нгэ биш, и основы ваш лэ́нгэ тэ явэ́н биш харкунэ́ (меди́тка); нанглорэ пэ сты́лбы и спхандыпэна пэ лэ́ндэ рупэ́стыр.

¹¹ Адя́кэ-паць и пир паш-рати́тко (северно) риг-ублады́тка (шырмы) шэл куня́ длэнгипна́са; сты́лбы ваш лэ́нгэ биш, и основы ваш лэ́нгэ (сты́лбы) биш харкунэ́; нанглорэ пэ сты́лбы и спхандыпэна пэ лэ́ндэ рупэ́стыр.

¹² И пир грэдакиро буґлыпэ́н западоскирэ рига́тыр-ублады́тка (шырмы) длэнгипна́са пандждэша́ куня́; сты́лбы ваш лэ́нгэ дэш, и основы кэ ёнэ дэш.

¹³ И дро грэдакиро буґлыпэ́н англатунэ́ рига́тыр кэ васто́ко-ублады́тка (шырмы) тэ явэ́н пандждэша́ куня́.

¹⁴ Кэ екх риг-ублады́тка (шырмы) дрэ дэшупандж куня́, сты́лбы ваш лэ́нгэ трин, основы ваш лэ́нгэ трин;

¹⁵ и кэ яви́р риг-ублады́тка (шырмы) дрэ дэшупандж куня́; сты́лбы ваш лэ́нгэ трин и сты́лбы ваш лэ́нгэ трин.

¹⁶ А ваш грэдакири по́рта шы́рма дрэ биш куня́ голубовонэ́ и пурпуронэ и чэрвлёнонэ вылна́тыр и крэнцонэ висоно́стыр высудэ бутя́тыр спецостыр; сты́лбы ваш ла́кэ тэ явэ́н штар, и основы кэ ёнэ штар.

¹⁷ Сарэ́ сты́лбы пашы́л грэ́да трэй, соб (кай) ёнэ тэ явэ́н кхэтанякирдэ спхандыпнаса рупэ́стыр; нанглорэ лэ́ндэ рупэ́стыр, а основы кэ ёнэ харкома́тыр (медятыр).

¹⁸ Грэдакиро длэнгипэ́н явэ́ла шэл куня́, а буґлыпэ́н пир саро́ длэнгипэ́н-пандждэша́, вучипэ́н пандж куня́; шырмы крэнцонэ висоно́стыр, а основы тэл сты́лбы харкома́тыр.

¹⁹ Сарэ́ приборы дрэ ша́тра ваш кажно дынарибэ́н дрэ ла́тэ, и сарэ́ килэ далэ́, и сарэ́ килэ пир грэ́да-харкома́тыр.

²⁰ И припхэн Израилёскирэ чхавэ́нгэ, соб (кай) ёнэ тэ янэ́н ту́кэ елеё (оливи́тко дзэт) жужо́, вымардо маслинэндыр тэ освэнцынэн, соб (кай) тэ хачол дуд (свэ́то) дро кажно часо;

²¹ дрэ ша́тра скэдыибна́скири, пал полого, саво́ исын анги́л ковчэго досыкаибна́са (откровенияса), явэ́ла тэ захачкирэл Ааро́но и лэ́скирэ чхавэ́, бэльвелятыр кэ ра́нко, анги́л Ра́скирэ-Дэвлэ́скиро муй. Дава́ исын стату́то ве́чно ваш лэ́нгирэ стрэ́чы (поколении) Израилёскирэ чхавэ́ндыр.