Матфеё 17 - Библия - Пэ Балтитко Романи чиб (Романэс) 2019

Исусо́скиро Парудыипэ́н

¹ Пир шов дывэса́ лыя́ Ису́со Пэтрис и Яково́с и Ианос, лэ́скирэ пшалэ́с, и лыджия́ лэн тринджинэн пэ вучи́ бэ́рга.

² И Ёв парудыя сарэ́са анги́л лэ́ндэ. Лэ́скиро муй лыя́ тэ зяинэл, сыр кхам, и Лэ́скирэ урибэна́ ячнэ́ парнэ́ сыр дуд (свэ́то).

³ И, акэ, сыкадынэ лэ́нгэ Мо́йза Илияса, савэ́ ракирдэ́ Лэ́са.

⁴ И Пэ́три заракирдя и пхэндя́ Исусо́скэ: “Раё Дэ́вла! Сыр исын шука́р амэ́нгэ тэ явас ада́й. Ко́ли Ту камэ́са, мэ кэра́ва ада́й трин ша́тры: екх Ту́кэ, екх Мойза́скэ, и екх Илияскэ.”

⁵ Ке́ли ёв ишчо (инкэ́) ракирдя́, акэ, святло о́блоко чхакирдя лэн, и, акэ, зан облокостыр, сави́ ракирдя́: “Кадава́ исын Миро Дро́го Чхаво́, дрэ Савэ́стэ исын Мири́ ра́дыма, Лэс шунэ́н.”

⁶ И ке́ли сыкляибны́тка шундлэ́ дава́, ёнэ пынэ́ пэ пэ́скирэ муя́ и древа́н страха́дынэ.

⁷ И подги́я Ису́со и чиладя́ лэн, пхэни́: “Уштэ́н и на андыршан.”

⁸ И сыр ёнэ ґаздынэ́ пэ́скирэ якха́, и на дыкхнэ́ никонэ́с, апри́ч Исусо́стэ Кокорэстэ.

⁹ И сыр ёнэ джа́нас тэлэ́ бэрга́тыр, Ису́со дыя́ припхэныбэ́н лэ́нгэ: “Ни конэ́скэ на ракирэ́н пал дава́ дыкхибэ́н, пака Чхаво́ Манушэ́скиро отджидёла.”

¹⁰ И Лэ́скирэ сыкляибны́тка пхучнэ́ Лэ́стыр, пхэни́: “Со́скэ тэды лылвари́тка ракирэ́на, со Или́я банго́ тэ явэ́л пэ́рво?”

¹¹ И Ёв отпхэндя́ лэ́нгэ, ракири́: “Или́я, чачэс, явэ́ла англэды́р и кэрэ́ла саро́.

¹² Нэ Мэ ракира́ва тумэ́нгэ, со Или́я ужэ явдя́, и ёнэ на ґалынэ́ лэс, и кэрдэ́ лэ́са дова́, со сыс пир ило́. И адя́кэ Чхаво́ Манушэ́скиро явэ́ла тэ страдынэл лэ́ндыр.”

¹³ Тэды сыкляибны́тка ґалынэ́, со Ёв пхэндя́ лэ́нгэ пал Ианостэ Болдэипнаристэ.

Ису́со Высастякирэ́ла Раклорэ́с Налачхэ́ Духо́са

¹⁴ И ке́ли ёнэ явнэ́ кэ мануша́, екх лэ́ндыр подги́я кэ Ёв, и пыя́ пэ чанга́ анги́л Лэ́стэ,

¹⁵ и пхэндя́: “Раё Дэ́вла! Потангинэ мирэ́ чхавэ́с, ёв бэнгвалёл пэ нэво́ чхон, и фуес лэ́скэ; пал-дова́ со ёв частэс чхурдэлапэ дрэ яг и частэс дро пани́.

¹⁶ И мэ яндём лэс кэ Тырэ́ сыкляибны́тка, нэ ёнэ на могиндлэ́ лэс тэ высастякирэн.”

¹⁷ Ису́со пхэндя́ дро отпхэныбэ́н: “Тумэ́ сан напатяибнаскиро и пхарэ́-манушэ́нгиро ро́до, кицы́ Мэ тэ явав тумэ́нца? Кицы́ Мэ ява́ва тэ вырикирав тумэн? Янэ́н лэс адари́к.”

¹⁸ И Ису́со припхэндя́ зоралэ́с раклорэскэ, и гия́ яври́ лэ́стыр на́лачхо ду́хо (фа́но), и екха́тыр тэрнэ́-бэршэнгиро яця́ састо́.

¹⁹ Тэ́ньци подгинэ́ екх сыкляибны́тка кэ Ису́со и пхэндлэ́: “Со́скэ амэ на могиндям тэ традас яври́ лэс?”

²⁰ И ракирэ́ла Ёв лэ́нгэ: “Пал-дова́ со тумаро́ патяибэ́н исын назорало; палдова́, чачэс, Мэ ракира́ва тумэ́нгэ: ко́ли явэ́ла тумаро́ патяибэ́н сыр гарчычно зя́рка, тэды пхэнэ́на бэргакэ ‘тэ джал одотхы́р адари́к ‘и джа́ла; и тумэ́ могинэ́нас саро́.

²¹ Кадава́ традэлапэ яври́ екхэ мангипнаса и постоса.”

Ису́со Ракирэ́ла пал Пэ́скиро Мэрибэ́н

²² Ке́ли ёнэ джа́нас кхэтанэ́ дрэ Галиле́я, Ису́со пхэндя́ лэ́нгэ: “Чхаво́ Манушэ́скиро явэ́ла здыно дрэ манушэ́нгирэ васта́;

²³ и ёнэ замарэна Лэс; и пэ три́то дывэ́с Ёв отджидёла.” И ёнэ ячнэ́ древа́н смэнтна (скучна).

Ису́со Ракирэ́ла пал Кхангирья́киро Мы́то

²⁴ И ке́ли ёнэ явнэ́ дро Капернаумо, подгинэ́ кэ Пэ́три скэдыибнарья пэ дидрахмы и пхэндлэ́: “Тумаро Сыклякирибна́скиро плэскирэла ваш Кхангири́ мыто?” Ёв ракирэ́ла: “Чачо́.”

²⁵ И ке́ли ёв гия́ дро кхэр, Ису́со анги́л пхэндя́ лэ́скэ, ракири́: “Со ту думинэса, Симоне? Кра́лья пэ пхув, конэ́стыр лэ́на мыто (такса): пэ́скирэ манушэ́ндыр ци чужонэндыр?”

²⁶ Пэ́три ж ракирэ́ла Лэ́скэ: “Чужонэндыр.” Ису́со пхэндя́ лэ́скэ: “Тэды пэ́скирэ мануша́ на плэскирэна.

²⁷ Нэ, соб (кай) лэ́нгэ тэ на кэра́с фуипэ́н пал кадава́ приме́ро (сыкаибэ́н), джа́ пэ мо́рё (дэрья́в), зачхурдэ вэндка, и пэрвонэ́ мачхэстэ, саво́ попэрлапэ, откэр лэ́скиро муй и латхэса одо́й статиро; тырдэ лэс яври́ и дэ лэ́нгэ пал пэ́стэ и пал Ма́ндэ.”