Матфеё 14 - Библия - Пэ Балтитко Романи чиб (Романэс) 2019

Ианоскирэ-Болдэипнари́скиро (Креститилёскиро) Мэрибэ́н

¹ Дро долэ́ дывэса́ шундя́ дая́ зан (звесь) пал Исусо́стэ Иродо, саво́ сыс хула́й пэ шта́рто паш Юдэ́нгирэ Кралипнастыр,

² и пхэндя́ пэ́скирэ дынарье́нгэ: “Дава́ исын Иа́но Болдэипнари; ёв отджидыя́ мулэ́ндыр, и палдава́ лэ́стэ бари зор тэ кэрэ́л ди́вы.”

³ Пал-дова́ со Иродо лыя́ Иоанос, пхандя лэс зандирьенца и чхудя́ лэс дро штарибэ́н пал Иродиадатэ, пэ́скирэ пшалэ́скирэ Филипоскирэ ромня́тэ,

⁴ пал-дова́ со Иа́но ракирдя́ лэ́скэ: “Ту́кэ нашты́ тэ лэс ла.”

⁵ И ёв думиндя (дыя годы пэскэ) тэ мулякирэ́л лэс, нэ дарандыя манушэ́ндыр, пал-дова́ со ёнэ гиндлэ́ лэс пал пророкостэ.

⁶ Нэ ке́ли сыс Иродоскиро бияныпнытко дывэ́с, Иродиадакири чхай кхэлдя анги́л гостендэ и кхэлыбэн древа́н сыс пир ило́ Иродоскэ;

⁷ со ёв дыя́ лав совлахаса тэ дэл ла́кэ саро́, соб (кай) ёй тэ на помангэл.

⁸ Ёй жа, сыр ла дай сыклякирдя́, пхэндя́: “Дэ ма́нгэ пэ чаро́ шэро́ Ианоскиро Болдэипнарискиро.”

⁹ И кра́ли пыя́ дро ду́хо (фа́но), нэ пал совла́х и манушэ́ндэ, савэ́ сыс бэштэ́ лэ́са, припхэндя́ тэ дэл ла́кэ,

¹⁰ и ёв бичхадя́ тэ отчингирэн шэро́ Ианоскэ дро штарибэ́н,

¹¹ и яндлэ́ лэ́скиро шэро́ пэ чаро́ и дынэ́ раклякэ, и ёй яндя́ пэ́скирэ да́кэ.

¹² И явнэ́ лэ́скирэ сыкляибны́тка и лынэ́ тру́по и гарадэ́ лэс; и гинэ́ и пхэндлэ́ зан (звесь) Исусо́скэ.

Ису́со Чалякирэ́ла Пандж Тысёнцы Манушэ́н

¹³ И сыр Ису́со шундя́ дая́ зан, то дурия одотхы́р пэ ба́рка екхджино́ пэ чхучо́ штэ́то; и ке́ли мануша́ шундлэ́ пал дава́, ёнэ гинэ́ пал Лэ́стэ пэзал форье́ндыр.

¹⁴ И сыр Ёв гия́ анги́л, дыкхця́ бут манушэ́н; и Ёв потангиндя лэн и высастякирдя́ насвалэн.

¹⁵ Ке́ли явдя́ бэльвэ́ль, ёнэ гинэ́ пашылэды́р кэ Ёв; и Лэ́скирэ сыкляибны́тка пхэндлэ́: “Чхучо́ (пусто) дава́ исын штэ́то и ужэ бут мардэ́, мэк манушэ́н, мэк тэ джа́н ёнэ дрэ гава́ тэ кинэн пэ́скэ хабэ́н.”

¹⁶ Нэ Ису́со пхэндя́ лэ́нгэ: “Лэ́нгэ на трэй тэ джа́н: дэн тумэ́ тэ хан лэ́нгэ.”

¹⁷ Нэ ёнэ пхэндлэ́ Лэ́скэ: “Ада́й амэ́ндэ исын екх пандж марэ́ и дуй мачхэ́.”

¹⁸ И Ёв пхэндя́ лэ́нгэ: “Янэ́н лэн Ма́нгэ.”

¹⁹ и Ёв припхэндя́ манушэ́нгэ тэ бэшэ́н пэ чар, лыя́ кадалэ́ пандж марэ́ и дуй мачхэ́, ґаздыя́ якха́ пэ болыбэ́н, бахтякирдя́ хабэ́н парикирибнаса Дэвлэ́скэ, пхагирдя́, и дыя́ маро́ сыкляибнытконэ́нгэ, кодолэ́ ж манушэ́нгэ.

²⁰ И сарэ́ ханэ́ и чалынэ, и скэдынэ́ котэра́, со ячнэ́пэ, дэшуду́й пхэрдэ́ корзи́ны (кхудэ́)

²¹ И ханэ́ пандж тысёнцы мурша́, апри́ч джувлендэ и чхаворэндэ.

Ису́со Псирэ́ла пир Пани́

²² И екха́тыр Ису́со зачхудя сыкляибнытконэ́н тэ бэшэ́н дрэ ба́рка тэ плывинэн (тэ дэн плима) анги́л Лэ́стэ пэ дова́ брэ́го, анги́л сыр Ёв отмэкэ́ла манушэ́н.

²³ И ке́ли Ёв отмэкця́ манушэ́н, екха́тыр Ёв гия́ упрэ́ пэ бэ́рга тэ мангэ́лпэ Дэвлэ́скэ. И сыс одо́й екхджино́, сыр явдя́ бэльвэ́ль.

²⁴ Нэ ба́рка ужэ сыс машки́р мо́рё (дэрья́в), и валны (вэлны) чхурдэнас ла, пал-дова́ со балва́л сыс пэ лэ́ндэ.

²⁵ Машкир три́то и шо́вто мардо́ (шту́нда) ратя́киро, пэ шта́рто стрэ́га Ёв явдя́ кэ ёнэ, псири пир мо́рё (дэрья́в).

²⁶ Нэ сыкляибны́тка, сыр дыкхнэ́, со Ёв джа́ла пир пани́, страха́дынэ, ракири́: “Дава́ исын зданки (дыкхибэна).” И дынэ́ го́дла дара́тыр.

²⁷ И екха́тыр Ису́со лыя́ тэ ракирэ́л лэ́нца и пхэндя́: “Рикирэнпэ муршканэ́с, дава́ Мэ сом, на андыршан.”

²⁸ И Пэ́три Лэ́скэ отпхэндя́: “Раё Дэ́вла! Ко́ли дава́ Ту сан, дэ припхэныбэ́н ма́нгэ тэ джав кэ Ту пир пани́”

²⁹ Ёв пхэндля: “Джа́!” И гии баркатыр, Пэ́три гия́ пир пани́ и подги́я кэ Ису́со.

³⁰ Нэ сыр ёв дыкхця́ балва́л, страхадыя, и лыя́ тэ тасадёл, задыя го́дла: “Раё Дэ́вла! Зра́кх ман!”

³¹ И екха́тыр Ису́со вытырдыя васт, ухтылдя пал лэ́стэ, и ракирэ́ла лэ́скэ: “Ту́тэ нанэ баро́ патяибэ́н, со́скэ ту лыян тэ кунинэспэ?”

³² И сыр ёнэ бэшнэ́ дрэ ба́рка, балва́л штылыя.

³³ И кодолэ́, савэ́ сыс Лэ́са дрэ ба́рка, поклониндлэпэ Лэ́скэ и пхэндлэ́: “Чачэс, Ту сан Дэвлэ́скиро Чхаво́.”

Ису́со Высастякирэ́ла Насвалэ́с дро Генисаре́то

³⁴ И сыр ёнэ пириплывиндлэ (дыя плима пирдал), явнэ́ пэ Генисаретоскири пхув.

³⁵ И ке́ли мануша́ долэ́ штэто́стыр ґалынэ́ Лэс, тэды бичхадэ́ пир сарэ́ пашатунэ́ штэ́ты манушэ́н, соб (кай) тэ янэ́н сарэ́н насвалэн кэ Ёв,

³⁶ и мангнэ́ Лэс, соб (кай) лэ́нгэ фэ́ни (то́ка) тэ чилавэн Лэ́скирэ урибнаскирэ яго́ры (краи́), и кодолэ́, савэ́ чилавэнас, ячэнас састэ.