Marko 13 - Библия - Пэ Балтитко Романи чиб (Романэс) 2019

Пал Кхангирья́киро Роспхагирибэ́н

¹ Ке́ли Ису́со выджа́лас Кхангирья́тыр, екх сыкляибнытконэндыр ракирэ́ла Лэ́скэ: “Дыкх, Сыклякирибнарискиро! Савэ бара́! Савэ упрэкэрибэна!”

² “Ту дыкхэ́са сарэ́ далэ́ барэ́ кхэра́?”, – пхэндя́ Лэ́скэ Ису́со. “На ячэ́лапэ ада́й бар пэ бар, саво́ на явэ́лас чхурдыно́ тэлэ́.”

Пхарэ́ Пиридживипэна́ и Традыпэна́

³ Ке́ли Ису́со сыс бэшто́ пэ Оливитконэ-бэрга́киро склоно анги́л Кхангири́, сыкляибны́тка Пэ́три, Яково, Иа́но и Ендри пхучэнас Лэ́стыр екх пэ екх явирэндыр:

⁴ “Пхэн амэ́нгэ, ке́ли дава́ саро́ явэ́ла и сави́ шпэ́ра (знако) явэ́ла анги́л, сыр саро́ дава́ кэрэ́лапэ?”

⁵ Ису́со отпхэндя́ Лэ́нгэ: “Ракхэ́нпэ, соб (кай) нико́н тэ на хохавэ́л тумэн.

⁶ Бут явэ́на кэ тумэ́ Мирэ́ лавэ́са и явэ́на тэ ракирэ́н: ‘Мэ сом’, и бутэн хохавэна.

⁷ Ке́ли тумэ́ шунэна пал марибэ́н и мавлыня (малвы) пал марибэна, на андыршан. Саро́ дава́ трэй тэ явэ́л, нэ дава́ ишчо (инкэ́) на саро́.

⁸ Пал-дова́ со ґаздэ́напэ мануша́ пэ манушэ́ндэ и кралипэ́н пэ кралипэ́н. Дрэ ра́зна штэ́ты явэ́ла тэ тринскирэлпэ пхув и явэ́ла бокх. Саро́ дава́ явэ́ла анги́л сы́рбы дукха́, дрэ савэ́ нэво́ ману́ш бияндёла,

⁹ Дыкхэ́н жа пал пэ́стэ; тумэн явэ́на тэ сэндинэ́н, и явэ́на тэ марэ́н дрэ синагоги. Пал Ма́ндэ тумэн явэ́на тэ тырдэн анги́л рандэ и кралье́ндэ, и тумэ́ явэ́на тэ допхэнэн лэ́нгэ пал Ма́ндэ.

¹⁰ Нэ англэды́р сарэ́стыр трэй тэ пхэнэлпэ лав Евангелиятыр ваш сарэ́ на́цыи.

¹¹ Ке́ли тумэн лыджа́на тэ здэн, на пиридживэн анги́л, со тумэ́нгэ тэ ракирэ́н; ракирэ́н дова́, со тумэ́нгэ явэ́ла дыно́ дрэ дова́-паць мардо́ (шту́нда) тэ ракирэ́н; пал-дова́ со на тумэ́ кокорэ́ явэ́на тэ ракирэ́н, а Свэ́нто Ду́хо (Фа́но).

¹² Пшал явэ́ла тэ бикнэл пэ мэрибэ́н пшалэ́с и дад явэ́ла тэ бикнэл пэ́скирэс биято́с; чхаворэ́ явэ́на тэ бикнэн пэ́скирэ дадэн, соб (кай) тэ мулякирэ́н лэн.

¹³ Сарэ́ явэ́на тэ на дэн паты́в зоралэ́с тумэ́нгэ пал Миро лав; а одова́, саво́ вырикирэ́ла саро́ дава́, явэ́ла зракхно.

Замэкибна́скиро Джунгалыпэ́н (Бры́ткима)

¹⁴ Ке́ли тумэ́ дыкхэ́на голотынякиро/ замэкибнаскиро джунгалыпэ́н (брыткима), одо́й, кай ла́кэ на трэиндя́ тэ явэ́л (мэк тэ ґалёл одова́, кон гинэ́ла), ґа́да, мэк одолэ́, савэ́ исын дрэ Юдэ́я, тэ нашэ́н дрэ бэ́рги;

¹⁵ кон исын пэ кхэри́тко бэ́рга, мэк тэ на зджал тэлэ́, и тэ на джал тэлэ дро кхэр тэ лэл вари-со кхэрэ́скирэ миштыпна́стыр.

¹⁶ Кон исын дрэ фэ́лда, мэк тэ на рисёл палэ тэ лэл пэ́скиро урибэ́н.

¹⁷ Мэнька явэ́ла тэды пэралэ джувленгэ и джувленгэ, савэ́ чаравэна колынэса тыкнорэн дрэ долэ́ дывэса́!

¹⁸ Мангэ́нпэ Дэвлэ́скэ, соб (кай) дава́ тэ на явэ́л ивантакиро/ивэндэскиро (зимакиро).

¹⁹ Тэды явэ́ла дасави́ пхари́ би́да, сави́ на сыс свэто́скирэ англыпна́стыр, саво́ Дэвэ́л кэрдя́, кэ ададывэ́с, и со буты́р на явэ́ла ние́кхвар.

²⁰ И ко́ли Дэвэ́л тэ на тыкнякирэлас далэ́ дывэса́, тэды нико́н на выдживэлас. А ваш манушэ́нгэ, савэ́н Ёв Кокоро́ выкэдыя́, Ёв тыкнякирдя далэ́ дывэса́.

²¹ Тэ́ньци ко́ли вари-кон пхэнэ́ла тумэ́нгэ: ‘Ѓа́да, исын Христо́со!’ Ци ‘Ёв исын одо́й’, – на патя́н,

²² явэ́на хоханэ́ Христосы, хоханэ́ проро́ки; ёнэ сыкавэ́на барэ́ ґэртыка (знаме́нии) и кэрэ́на ди́вы, соб (кай) тэ хохавэн аж кодолэ́н манушэ́н, савэ́н Дэвэ́л выкэдыя́, ко́ли явэ́ла сашты́.

²³ Ракхэ́нпэ. Мэ тумэ́нгэ саро́ анги́л пхэндём.

Чхавэ́скирэ-Манушэ́скиро Явибэ́н

²⁴ А дро долэ́ дывэса́, сыр проджа́ла (накхэла) дая́ пхари́ би́да, кхам мурдёла, и чхон на явэ́ла тэ свэнцынэл пэ́скирэ свэтоса (лосаса),

²⁵ и чэргэня́ пэрэ́на болыбна́стыр, и болыбна́скирэ зорья явэ́на тринскирдэ.

²⁶ Тэды мануша́ дыкхэ́на Манушэ́скирэ Чхавэ́с, Саво́ явэ́ла тэ джал дрэ о́блоки барэ́ зорья́са и дрэ сла́ва.

²⁷ И тэды бичхавэ́ла Ёв Пэ́скирэ Янголэн и скэдэ́ла кхэтанэ́, конэ́с Ёв выкэдыя́ штарэ́ ригэ́ндыр, пхувья́кирэ ягоро́стыр (краёстыр) кэ Болыбна́скиро яго́ро.

²⁸ Сыклён приме́ро (сыкаибэ́н) инжыритконэ каштэ́стыр: ке́ли лэ́скирэ рандя́ ячэ́на ковлэ́ и мэкэ́на патря (листы), то тумэ́ джинэ́н, со сыг явэ́ла лынай (нилай)

²⁹ адя́кэ и тумэ́, сыр дыкхэ́на, со дава́ саро́ адя́кэ кэрлапэ, джинэ́н, со Ёв исын на́дур, пашы́л вудара́.

³⁰ Чачэс, Мэ ракира́ва тумэ́нгэ: на проджа́ла дава́ манушы́тко ро́до, пака саро́ дава́ кэрэ́лапэ кэ ко́нцо/кэ яго́ро (сполнинэлапэ).

³¹ Болыбэ́н и пхув проджа́на, а лава́ Мирэ́ на проджа́на.

Дывэ́с ци Мардо́ Наджиндлэ́

³² Нико́н на джинэ́ла ни дывэ́с, ни мардо́ (шту́нда), ке́ли дава́ саро́ явэ́ла, ни болыбна́скирэ Янго́лы, ни Чхаво́ – а екх Дад джинэ́ла.

³³ Дыкхэ́н, и ракхэ́нпэ и мангэ́нпэ Дэвлэ́скэ: пал-дова́ со тумэ́ на джинэ́на, ке́ли дасаво часо явэ́ла.

³⁴ Дава́ сашты́ (можна) тэ примеринэс манушэ́са, саво́ гия́ дро даратуно дром. Ёв ячкирэ́ла пэ́скиро кхэр, соб (кай) тэ придыкхэн писха́рья. Кажнонэ́скэ писхари́скэ ёв дэ́ла задыибэн, а одолэ́скэ, саво́ сыс тэрдо́ пашы́л по́рта, припхэндя́ тэ дыкхэ́л ракхунэс (пильнэс).

³⁵ Адя́кэ и тумэ́: “Дыкхэ́н, на совэн!” Пал-дова́ со тумэ́ на джинэ́на, ке́ли рисёла кхэрэ́скиро хула́й: могинэ́ла дрэ паш рат, ци сыр пробагала башно, ци пэ зло́ко;

³⁶ соб (кай), ке́ли ёв явэ́ла, тэ на заухтылэл тумэн, со тумэ́ сан сутэ́.

³⁷ И дова́, со Мэ ракира́ва тумэ́нгэ, ракира́ва сарэ́нгэ: ракхэ́нпэ!”