Isúso 5 - Библия - Пэ Балтитко Романи чиб (Романэс) 2019

Яви́р Обчхиныбэн кэ Гилгало

¹ Ке́ли сарэ́ Аморее́нгирэ кра́лья, савэ́ дживдэ́ пир дая́ риг Иорданоскири кэ мо́рё (дэрья́в), и сарэ́ Ханааноскирэ кра́лья, савэ́ сыс пашы́л мо́рё (дэрья́в), шундлэ́, со Рай Дэвэ́л, Дэвэ́л вышутькирдя пани́ Иорданоскиро анги́л Израилёскирэ чхавэ́ндэ, пака ёнэ пириджанас: то тэды яця́ би зорьякиро лэ́нгиро ило́, и на яця́ буты́р дрэ лэ́ндэ ду́хо проти Израилёскирэ чхавэ́ндэ.

² Дро дова́-паць часо Рай Дэвэ́л пхэндя́ Исусо́скэ: “Кэр пэ́скэ востра чхурья и обчхин Израилёскирэ чхавэ́н дро яви́р мо́ло”.

³ И кэрдя́ пэ́скэ Ису́со востра чхурья, и обчхиндя Израилёскирэ чхавэ́н пэ штэ́то, саво́ сыс кхардо “обчхиныбнаскири бэ́рга”.

⁴ Ѓа́да, со́скэ обчхиндя Ису́со Израилёскирэ чхавэ́н: сарэ́ мануша́, савэ́ выгинэ́ Египто́стыр, мурша́, сарэ́, кон сыс лачхо́ кэ марибэ́н помынэ пэ чхучи́ пхув пэ дром пир выгиибэн Египто́стыр;

⁵ сарэ́, савэ́ выгинэ́ мануша́, сыс обчхиндлэ́; нэ сарэ́ мануша́, савэ́ бия́ндынэ пэ чхучи́ пхув пэ дром, пало́ дава́, сыр выгинэ́ Египто́стыр, на сыс обчхиндлэ́.

⁶ Пал-дова́ со Израилёскирэ чхавэ́ штардэша́ бэрш псирдэ́ пир чхучи́ пхув, пака мынэ́ сарэ́ мануша́, савэ́ сыс лачхэ́ кэ марибэ́н, савэ́ выгинэ́ Египто́стыр, савэ́ на шундлэ́ Раскири-Дэвлэ́скири зан, и савэ́нгэ Рай Дэвэ́л совлахадя́, со ёнэ на дыкхэ́на пхув, сави́ Рай Дэвэ́л совлахаса дыя́ лав лэ́нгирэ дадэ́нгэ, тэ дэл лэ́нгэ пхув, кай тхадэ́ла тхуд и авги́н.

⁷ А заме́ст лэ́ндэ ґаздыя́ лэ́нгирэ чхавэ́н, савэ́н обчхиндя Ису́со, пал-дова́ со ёнэ сыс наобчхиндлэ; пал-дова́ со лэн пир дром на обчхинэнас.

⁸ Ке́ли сарэ́ мануша́ сыс обчхиндлэ́, ячэнаспэ ёнэ пэ пэ́скиро штэ́то дрэ ста́но, пака высастёнас.

⁹ И пхэндя́ Рай Дэвэ́л Исусо́скэ (Ёхошуаскэ): “Акана́ Мэ злыём тумэ́ндыр ладж Египто́скири. Со́скэ и кхарэ́лапэ дова́ штэ́то: Галга́ло, адя́кэ-паць кэ дава́ дывэ́с”.

¹⁰ И сыс тэрдэ́ Израилёскирэ чхавэ́ стано́са дро Галга́ло, и кэрдэ́ Патради́ пэ дэшуштарто чхонэ́скиро дывэ́с бэльвэле́ пэ Ерихоноскирэ лошчыны.

¹¹ И пэ яви́р дывэ́с Патради́ лынэ́ тэ хан, со выбария пэ дая́ пхув, опресноки и шукэ́ зя́рки (зёрны) дрэ дова́-паць дывэ́с.

¹² А манна пирияця́ тэ пэрэ́л пэ яви́р дывэ́с пало́ дова́, сыр ёнэ лынэ́ тэ хан, со барьёла пэ пхув, и на сыс буты́р манна Израилёскирэ чхавэ́ндэ, нэ ёнэ ханэ́ дрэ дов-паць бэрш дова́, со барьёла пэ Ханаано́скири пхув.

¹³ О Ису́со, сыс на́дур Ерихоностыр, дыкхця́ упрэ́ и дыкхэ́ла, и, ґа́да, сыс тэрдо́ анги́л лэ́стэ ману́ш, и дрэ лэ́скиро васт сыс вытырдыны курта́ла. Ису́со подги́я кэ ёв и пхэндя́ лэ́скэ: “Ци амаро́ ту, ци вэргэ́ндыр амарэндыр?”

¹⁴ Ёв пхэндя́: “Над; мэ сом шэрало́ пэ Ра́скирэ-Дэвлэ́скирэ халадыбэ́н (воинства), акана́ явдём дарик”. Ису́со пыя́ пэ́скирэ мо́са пэ пхув, и поклониндяпэ, и пхэндя́ лэ́скэ: “Со хула́й миро пхэнэ́ла пэ́скирэ писхари́скэ?”

¹⁵ Шэрало́ пэ Ра́скирэ-Дэвлэ́скиро халадыбэ́н пхэндя́ Исусо́скэ: “Лэ тырэ́ ґэритка тырэ́ ґэрэндыр, пал-дова́ со штэ́то, пэ саво́ ту сан тэрдо́, исын свэ́нто”. Ису́со адя́кэ и кэрдя́.