Ióvo 4 - Библия - Пэ Балтитко Романи чиб (Романэс) 2019

Элифазоскиро Ракирибэ́н

¹ О, Элифазо Феманиностыр, отпхэндя́ и ракирдя́:

² “Ко́ли явэ́на тэ ракирэ́н лав кэ ту, соб (кай) ту тэды тэ на пэрэс дро ду́хо (фа́но)? Нэ кон сатаки могинэ́ла тэ обрикирэл явирэ́с тэ ракирэ́л?

³ Чачо́, со ту сыклякирэсас бутэн, и ту зоралякирдян бизорья́кирэ васта́.

⁴ Тырэ́ лава́ подрикирэнас одолэ́н, кон обштавэлапэ, и ту зоралякирдян кодолэ́н, савэ́ндэ чанга́ бандинэ.

⁵ Нэ акана́ биба́хт пыя́ пэ ту́тэ, и ту пэрэса дро ду́хо (фа́но); ёй чиладя́ тут и ту́кэ акана́ исын пхаро́.

⁶ Ци тыри́ вага (бари паты́в) кэ Дэвэ́л на дэ́ла ту́кэ зорало́ патяибэ́н; ци тырэ́ бидошэнгирэ джиибнастыр нашты́ тэ ужакирэс лачхипэ́н?

⁷ Пририпир пэ́скэ, ци хасия́ вари-кон, кон сыс бибангипнаскиро? И, ци сыс адя́кэ, соб (кай) дэвлытконэ́ манушэ́н тэ чхурдэ́н тэ хасён.

⁸ Со мэ могиндём тэ дыкха́в, сыс дова́, со кон пхаравэла фуй пхувья́, и кон росчхурдэла биба́хт сыр зя́рки дрэ пхув, одолэ́-паць мануша́ и одова́-паць чхинэна тэлэ́.

⁹ Ёнэ хасёна Дэвлэ́скирэ пхурдыпнастыр, Лэ́скирэ-духоскири холы́ похала лэн сарэ́са.

¹⁰ Мэк ёнэ тэ рыкинэн сыр шчэра́ (ле́вы), и тэ рыкинэн ёнэ сыр древа́н мижэх шчэрицы, сароекх тэрнэ́ – шчэрэнчирэ данда́ пхадёна.

¹¹ Пхурано́ шчэр мулёла, пал-дова́ со лэ́скэ на ухтылэ́ла (на́доси) со тэ рискирэ́л дандэнца, а шчэрицакирэ шчэнкэн росчхурдэна.

¹² Акана́ екх лав чораханэ́с явдя́ кэ мэ, и миро кан шундя́, со ёв гундяриндя (шэпчындя) ма́нгэ:

¹³ дрэ на́бут трашанэ зданки, со ману́ш дыкхэ́ла дро суно́ раты́, ке́ли хор соибэн лэ́ла манушэ́с:

¹⁴ дар пыя́ пэ ма́ндэ, и мэ издрава адя́кэ, со сарэ́ мирэ́ кокалы́ тринскирэнапэ;

¹⁵ и о ду́хо прогия́ пашы́л ма́ндэ, и мирэ́ бала́ пэ шэро́ тэрдинэ́.

¹⁶ Ёв уштыя́ и мэ на могиндём тэ роздыкхав, сыр ёв выдыцёла: лэ́скиро ста́но сыс анги́л мирэ́ якха́; и мэ шундем локхи зан (глос), со пхэндя́:

¹⁷ Ци сашты́ тэ явэ́л соб (кай) ману́ш тэ явэ́л чачунэдыр Дэвлэ́стыр? Ци сашты́ тэ явэ́л, соб (кай) ману́ш тэ явэ́л буты́р бибангипнаскиро сыр Дэвэ́л?

¹⁸ Дыкх, Ёв на допатяла Пэ́скирэ (болыбна́скирэ) дынарье́нгэ, и, Ёв гинэ́ла, со Лэ́скирэ Янго́лы исын нагодэ,

¹⁹ и пэ кицы́ буты́р Ёв на допатяла манушэ́нгэ, кон дживэ́ла дрэ кхэра́ блататыр, со кирнёна, кон выгинэ́ прахостыр, кон роспхаравэлапэ сыр моль (мэль)!

²⁰ Ёнэ пхарадёна марибнастыр пэ котэра́ злокостыр (ранкостыр) кэ бэльвэ́ль, ёнэ хасёна пэ-усады (пэ сак), со ние́кх и на подыкхэла пэ дава́.

²¹ Ци на кошэнапэ лэ́нгирэ шатракирэ шэлэ (ци на хасёла лэ́нгиро лачхипэ́н)? Ёнэ мэрэ́на, и на джинэ́на годыпэ́н.