Ióvo 3 - Библия - Пэ Балтитко Романи чиб (Романэс) 2019

Ио́во Жалинэлапэ Дэвлэ́скэ

¹ Пало́ дава́ Ио́во псирадя пэ́скиро муй и прокостя (кэрдя́ арманя) дывэ́с, дро саво́ ёв бия́ндыя.

² И отпхэндя́ Ио́во лавэ́нца:

³ “Мэк тэ хасёл дывэ́с, дро саво́ мэ бияндыём, и рат, со ракирэ́на тэды: ‘О муршоро латхэлапэ.’

⁴ Дова́ дывэ́с – мэк ёв тэ явэ́л цямло; мэк Дэвэ́л тэ на рипирэл пал дова́ дывэ́с, ци мэк дуд тэ на зяинэл пэ дова́ дывэ́с.

⁵ Мэк калыпэ́н и мэрибнаскири зэр (тень) тэ учхакирэл дова́ дывэ́с, мэк о́блоки тэ ячэ́нпэ ўса́ды (сак) пэ лэ́стэ, мэк дывэсэнгиро калыпэ́н тэ страхакирэл дова́ дывэ́с.

⁶ И пэ кодоя рат, соб (кай) цёмныма тэ заухтылэл ла, мэк тэ на чхувэ́н андрэ́ кодоя рат кхэтанэ́ бэршэскирэ дывэсэнца; мэк ёй тэ на заджа́л дро чхонэнгиро гиныбэ́н.

⁷ Мэк тэ явэ́л чхучи́ (пусто) кодоя рат, мэк радымакири го́дла тэ на явэ́л ние́кхвар дро кодоя рат.

⁸ Мэк одолэ́, кон прокошэла (кэрэ́ла арманя) дывэ́с, тэ прокошэн (тэ кэрэ́н арманя) пэ доя́ рат, савэ́ исын скэдынэ́ тэ ґаздэ́н Левиафанос;

⁹ мэк тэ мурдён тасярлакирэ (ранкоскирэ) чэргэня́; мэк кодоя рат тэ ужакирэл дуд (свэ́то), нэ лэс нанэ, и мэк ёй тэ на дыкхэ́л ранкоскирэ цымблы (ресницы):

¹⁰ пал-дова́, сыр ёй на запхандя пэ клыдын вудара́ мирэ́-да́кирэ лочовя́тыр, со лыджинэ́ ман, сыр и на гарадя пхарипэ́н мирэ́ якхэ́ндыр.

¹¹ Со́скэ мэ на мыем дрэ да́кирэ маса́, – сыр мэ выджавас да́кирэ лочовя́тыр и тэ на пхарадёвав?

¹² Со́скэ, мири́ дай лыя́ ман пэ чанга́? И ваш со трэиндя́ ма́нгэ тэ жуискирав дакири цюци?

¹³ Ваш дова́, соб (кай) мэ тэ пасёвав штылэ́с пэ́скэ, мэ явавас суто́ пэ́скэ: мэ откхинёвавас пэ́скэ,

¹⁴ кхэтанэ́ кральенца и годы́-дыибнаскирэнца, кон сыс пэ пхув, савэ́ ґаздынэ́ фелатиня пэ́скэ пэ наобдживдлэ штэ́ты,

¹⁵ ци тхагарьенца, конэ́стэ сыс сувнака́й, савэ́ пхэрдякирдэ пэ́скирэ кхэра́ рупэ́са:

¹⁶ ци со́скэ мэ на яцём сы́рбы вычхурдыпнытко чхаворо́ ци сы́рбы тыкномас, саво́ ние́кхвар на дыкхця́ дуд (свэ́то).

¹⁷ Одо́й бибахталэ́ пириячэна тэ кэрэ́н дош, и одо́й кхинякирдэ откхинёна (отпхурдэна).

¹⁸ Одо́й штарибнаскирэ мануша́ откхинёна кхэтанэ́, ёнэ на явэ́на тэ шунэ́н зан, кон притасавэлас лэн.

¹⁹ Тыкнэ́ и древа́н барэ́ исын одо́й, и писха́рья исын вольна пэ́скирэ рандыр.

²⁰ Ваш со исын манушэ́скэ дуд (свэ́то), савэ́стэ исын бари би́да, и джиибэ́н одолэ́нгэ, конэ́скэ исын кирко пэ ди,

²¹ и одолэ́нгэ, кон тырдэлапэ, соб (кай) тэ мэрэ́н, нэ мэрибэ́н на явэ́ла, и одолэ́нгэ, кон родэ́ла мэрибэ́н зоралэды́р сыр родэ́на гарадэ́ барвалыпэна,

²² и савэ́ зоралэ́с радынэнаспэ и явэ́нас ра́да, ко́ли ёнэ латхэнас ко́нцо (маґила)? –

²³ ци конэ́скиро дром исын гарадо́, и конэ́с Дэвэ́л учхакирдя́ явре́стыр, сыр тыноса.

²⁴ Пал-одова́ мэ да́ва гондя анги́л, сыр тэ хав, и мирэ́ годля, сыр мэ да́ва гондя (уздыхинава), чхувэнапэ сыр паня́.

²⁵ Пал-одова́ со доя́-паць дар, – со́стыр мэ дарандыём, и пыя́ пэ ма́ндэ и дова́-паць, – со́стыр мэ трашадыём, – дова́ явдя́ кэ мэ.

²⁶ Мэ сом дрэ дар, мэ на сом штыл, мэ на откхиныём, и бари би́да явдя́.”