Ióvo 10 - Библия - Пэ Балтитко Романи чиб (Романэс) 2019

Ио́во Камэ́ла тэ Мангэл Дэвлэ́с

¹ Миро ди кхиныя мирэ́ джиибнастыр: мэ да́ва во́ля пэ́скэ тэ тангинавпэ (тэ жалинавпэ), мэ ява́ва тэ ракира́в мирэ́ дескирэ киркипнастыр.

² Мэ пхэна́ва Дэвлэ́скэ: “На сэндякир зоралэ́с ман. Сыка́в ма́нгэ, пал со Ту лыджа́са чинга́рд (сора) ма́нца.”

³ Саво́ ж лачхипэ́н исын Ту́кэ, со Ту тасавэса, со Ту дыкхэ́са вычипнастыр пэ дава́, со Тырэ́ васта́ создынэ? И Ту зяинэса манушэ́нгирэ скэдынятыр?

⁴ Ци исын Ту́тэ якха́, сыр амэ́ндэ? Ци дыкхэ́са Ту, сыр ману́ш?

⁵ Ци исын Ту́тэ, дасавэ́-паць дывэса́, сыр манушэ́стэ, кон мэрэ́ла?

⁶ Со Ту родэса дош дрэ ма́ндэ, и со Ту выпхучэса пал грэ́хо дрэ ма́ндэ?

⁷ Кон – сыр на Ту, джинэ́са, со мэ на сом фуй, и нанэ ние́кх тэ зракхэ́л ман Тырэ́ вастэ́стыр?

⁸ Тырэ́ васта́ кхудэ́ кхэтанэ́ ман и создынэ ман – саво́ мэ сом; и акана́ Ту хасякирэса ман!

⁹ Ри́пир, со Ту создыян ман сыр глэя (глина), и Ту ж пирикирэса ман палэ дро пра́хо.

¹⁰ Ци на Ту вычхудян ман сыр тхуд? И ци на Ту вытолчиндян ман сыр ґэнсто кирал?

¹¹ Ту учхакирдян ман цыпаса и масэнца, и Ту пирикхудян ман кокалэнца и жылэнца;

¹² Ту дариндян (подыян) ма́нгэ джиибэ́н и Тыри́ ла́ска, и дова́, со Ту пэкэсапэ пал ма́ндэ, ракхцян миро ду́хо (фа́но).

¹³ И саро́ дава́ Ту гарадян дро пэ́скиро ило́, мэ джино́м: дава́ исыс Ту́тэ пэ годы́.

¹⁴ Ко́ли мэ кэра́ва грэ́хи, тэ́ньчи Ту зарикирэса лэн дрэ годы́. И Ту на отчхакирэса ман мирэ́ чорипна́стыр.

¹⁵ Ко́ли мэ сом фуй ману́ш, тэды би́да пэ ма́ндэ! Ровнэс сыр и ко́ли чачипэ́н исын пал ма́ндэ, мэ нашты́ тэ ґаздав миро шэро́. Мэ сом, дрэ бипатыв, ма́ндэ исын пхэрдо́ бибахтя.

¹⁶ Мири́ биба́хт барьёла: Ту традэсапэ пал ма́ндэ сы́рбы древа́н мижэх шчэр (ле́во); и нэвэ́стыр Ту сыкавэса пэ́скиро зоралыпэ́н кэ дар пэ ма́ндэ.

¹⁷ Ту бичхавэса ўса нэвонэ́ якхитконэн пэ ма́ндэ, и Ту барьякирэса пэ́скири холы́ пэ ма́ндэ, Ту ўса парувэса Пэ́скиро марибэ́н пэ ма́ндэ.

¹⁸ И ваш со Ту домэкхцян, соб (кай) мэ тэ выджав да́кирэ лочатыр? Ма́нгэ явэ́лас ко́нцо (яго́ро) и ние́кх якх тэ на дыкхэ́лас ман.

¹⁹ Мэ явавас сы́рбы мэ и на со́мас ние́кхвар, ман пирилыджанас лочовя́тыр кэ мулыкано (кэ ґробо).

²⁰ Ци на́бут (куты́) дывэса́, со ячнэ́пэ ваш ма́нгэ? Пирияч, Дэ́вла! Ячкир ман екхджинэс, соб (кай) ма́нгэ на́бут тэ отджидёвав.

²¹ Анги́л дова́, сыр мэ джа́ва и ние́кхвар на рисёва́ва палэ, – кэ цьмакиро тхэм (страна) и тэл мэрибнаскири зэр (тень);

²² кэ тугитко тхэм калыпнаса, саво́ исын сыр калыпэ́н кокоро́, со кай нанэ гиибэн, кай дуд исын сыр ґэнсто калыпэ́н.”