Эфесянэнгэ 1 - Библия - Пэ Балтитко Романи чиб (Романэс) 2019

¹ Павли́стыр, Исусо́скирэ Христосо́скирэ Апостолостыр, савэ́с Кокоро́ Дэвэ́л выкэдыя́, Свэнтонэ́ манушэ́нгэ, савэ́ дживэ́на кэ Эфе́со, и патя́на дрэ Исусо́стэ Христосо́стэ:

² Мэк тэ явэ́л бахталыпэ́н и рама́нё (миро) тумэ́нгэ Дэвлэ́стыр Дадэ́стыр амарэстыр, и Ра́стыр-Дэвлэ́стыр, Исусо́стыр Христосостыр.

³ Мэк тэ явэ́л бахтякирдо́ Дэвэ́л и Дад амарэ́ Дэвлэ́скиро Исусо́скиро Христосо́скиро, Саво́ бахтякирдя́ амэн дро екхипэ́н Христоса кажнонэ́ Духо́скирэ бахтякирибна́са дро Болыбна́скиро свэ́то

⁴ Ёв выкэдыя́ амэн дрэ Лэ́стэ англэды́р, сыр создыя́ свэ́то, соб (кай) амэ тэ явас свэ́нта пир екхипэ́н Христосо́са и бидошакирэ анги́л Лэ́стэ пир паты́в кэ яви́р мануша́;

⁵ Ёв выкэдыя́ амэн пир Исусо́стэ Христосо́стэ, соб (кай) амэ тэ явас Лэ́скирэ чхавэ́ пир Пэ́скиро выкэдыибэн и во́ля,

⁶ соб (кай) тэ славинас Лэ́скиро шука́р бахталыпэ́н, саво́ Ёв дыя́ амэ́нгэ пир Пэ́скирэ Дрогонэ́ Чхавэ́стэ:

⁷ дрэ Савэ́стэ и пир Савэскиро Рат амэ сам выкиндлэ (выракхнэ), амарэ́ грэ́хи исын отмэкнэ пир Лэ́скиро барвало́ бахталыпэ́н;

⁸ Саво́ Ёв би тангипнаскиро дыя́ амэ́нгэ сарэ́ годя́са и джиныбнаса,

⁹ пир Пэ́скиро цэлё/рэс (чачипэ́н) Дэвэ́л отчхакирдя́ амэ́нгэ Лэ́скирэ-воля́киро чораханыбэн, саво́ Ёв ґарэдыр задуминдя тэ кэрэ́л пир Христосо́стэ,

¹⁰ ваш дова́, ке́ли явэ́ла пхэрдо́ часо, соб (кай) тэ кхэтанякирэл саро́, со исын пэ болыбэ́н и пэ пхув, пир Христосо́стэ,

¹¹ пир екхипэ́н Лэ́са и амэ яця́м Дэвлэ́скирэ манушэ́нца пир Лэ́скири мысля, ке́ли Ёв выкэдыя́ амэн и Саво́ кэрэ́ла саро́ дро свэ́то пир Пэ́скири во́ля самонэ англыпна́стыр,

¹² соб (кай) амэ, савэ́ пэ́рва дорэсцям (долыям) лачхо́ ужакирибэ́н Христосостыр, тэ шарас Дэвлэ́скири сла́ва;

¹³ дрэ Лэ́стэ и тумэ́ адя́кэ-паць шундлэ́ чачуно́ лав, бахталы́ зан (звесь) пал тумаро́ зракхибэ́н, сыр тумэ́ упатя́ндынэ дрэ Лэ́стэ. Тумэ́ндэ исын якхи́тко (печать), саво́ сыс Свэнтонэ́ Духо́стыр, Савэс тумэ́ ґара́ ужакирдэ,

¹⁴ Саво́ дэ́ла лав сыр сымады́ (залого) пал амаро́ англатуно́ джиибэ́н и Дэвлэ́скирэ-манушэ́нгиро выракхибэн ваш Дэвлэ́скири сла́ва.

Павли́скиро Мангипэ́н

¹⁵ Палдава́ и мэ адя́кэ-паць, ке́ли амэ шундём пал тумаро́ патяибэ́н дрэ Исусо́стэ и пал ла́ска кэ сарэ́ свэ́нта,

¹⁶ ние́кхвар мэ на пириячава тэ парикира́в Дэвлэ́скэ пал тумэ́ндэ, и мэ рипирава тумэн, ке́ли мэ мангавапэ Дэвлэ́скэ пал тумэ́ндэ,

¹⁷ соб (кай) Дэвэ́л амарэ́ Ра́скирэ-Дэвлэ́скиро, Исусо́скиро Христосо́скиро, славу́тно Дад, тэ дэл тумэ́нгэ пир Ду́хо (Фа́но) годы́ и тэ сыкавэ́л, соб (кай) тумэ́ фэды́р тэ уджинэ́н Лэс,

¹⁸ и соб (кай) Дэвэ́л тэ ковлякирэл тумарэ́ илэ и тэ отчхакирэл тумэ́нгэ якха́, соб (кай) тумэ́ тэ уджинэ́н дова́ лачхо́ ужакирибэ́н, кэ саво́ Ёв тумэн кхардя́, и саво́ барвало́ исын мэкно́ миштыпэ́н пир дыно́ лав, Лэ́скирэ славакиро, ваш свэнтонэнгэ,

¹⁹ и саво́ бимеракиро исын Лэ́скиро барипэ́н зоралыпнаскиро ваш амэ́нгэ, саво́ Ёв дэ́ла сарэ́ свэнтонэнгэ, савэ́ патя́на дро Лэ́скирэ-зоралыпнаскиро кэрибэн,

²⁰ Саво́ Ёв сыкадя́ дрэ Христосо́стэ, ке́ли Ёв отджидякирдя́ Лэс мулэ́ндыр и чхудя́ пир чачуны́ риг Пэ́стыр дро Болыбна́скиро Раё,

²¹ вучэды́р барэ́ рандыр, сарэ́ зорьендыр и кажнонэ́ зорья́тыр дро дава́ свэ́то и кажнонэ́ лавэ́стыр, со исын на екх дро дава́ ве́ко, нэ и дро ве́ко, саво́ анги́л явэ́ла;

²² и Дэвэ́л чхудя́ саро́ тэлэ́ тэл Исусо́скирэ ґэра́, и чхудя́ Лэ́скэ зор тэ явэ́л Шэрэ́ Хула́са пэ саро́, Шэралэса ваш Кхангири́.

²³ Сави́ исын Лэ́скирэ маса́, Лэ́скиро пхэрдыпэн, Саво́ пхэрдякирэла Пэ́са саро́.