2 Паралипоменоно 10 - Библия - Пэ Балтитко Романи чиб (Романэс) 2019

¹ И гия́ Ровоа́мо дро Сихе́мо, пал-дова́ со дро Сихе́мо явнэ́ кхэтанэ́ сарэ́ Израильтя́ни, соб (кай) тэ чхувэ́н лэс крали́са.

² Ке́ли шундя́ пал дава́ Еровоа́мо, Наватоскиро чхаво́, – ёв сыс дрэ Еги́пто, карик настя́ крали́стыр Соломоностыр, – то тэды рисия́ Еровоа́мо Египто́стыр;

³ и бичхадэ́, и кхардэ́ лэс; и явдя́ Еровоа́мо и саро́ Израилё, и ракирдэ́ Ровоамоскэ адя́кэ:

⁴ “Тыро́ дад чхудя́ пэ амэ́ндэ пхари́ буты́: нэ ту кэр локхэды́р пхари́ тырэ́ дадэ́скири буты́ и пхари́ буты́, сави́ ёв чхудя́ пэ амэ́ндэ, и амэ ява́са ту́кэ тэ дынарина́с.”

⁵ И пхэндя́ лэ́нгэ Ровоа́мо: “Пирда́л трин дывэса́ явэ́на нэвэ́стыр (нэвэ́с) кэ мэ.” И розгинэпэ мануша́.

⁶ И радиндяпэ кра́ли Ровоа́мо пхурыдырэнца, савэ́ сыс тэрдэ́ анги́л Соломоно́скиро муй, лэ́скирэ дадэ́скиро, ке́ли ёв дживдя́, и ракирдя́: “Сыр тумэ́ дэ́на годы́ ма́нгэ тэ отпхэнав адалэ́ манушэ́нгэ?”

⁷ Ёнэ пхэндлэ́ лэ́скэ: “Ко́ли ту явэ́са лачхо́ кэ адалэ́ мануша́, и кэрэ́са пир ило́ лэ́нгэ, и явэ́са тэ ракирэ́с лэ́нца шука́р, тэды ёнэ явэ́на ту́кэ дынарье́нца пэ сарэ́ дывэса́.”

⁸ Нэ ёв ячкирдя́ пхурыдырэнгиро годыпэ́н, саво́ ёнэ дэ́нас лэ́скэ, и лыя́ тэ радинэлпэ тэрнэ́ манушэ́нца, савэ́ выбаринэ кхэтанэ́ лэ́са, савэ́ сыс тэрдэ́ анги́л муй лэ́скиро;

⁹ и пхэндя́ лэ́нгэ: “Со тумэ́ пхэнэ́на годэс ма́нгэ тэ отпхэнав адалэ́ манушэ́нгэ, савэ́ ракирэ́на ма́нгэ адя́кэ: ‘Кэр локхэды́р пхарипэ́н, саво́ чхудя́ пэ амэ́ндэ тыро́ дад?’”

¹⁰ И ракирдэ́ лэ́скэ тэрнэ́ мануша́, савэ́ выбаринэ кхэтанэ́ лэ́са, и пхэндлэ́: “Адя́кэ пхэн манушэ́нгэ, савэ́ ракирэ́на ту́кэ: ‘Дад тыро́ чхудя́ пэ амэ́ндэ баро́ пхарипэ́н, а ту кэр локхэды́р амэ́нгэ’, – адя́кэ пхэн лэ́нгэ: ‘Миро тыкно́ ангу́шт грубэдыр трушулэндыр мирэ́ дадэскирэндыр.

¹¹ Миро дад чхудя́ пэ тумэ́ндэ баро́ пхарипэ́н, а мэ кэра́ва буты́р тумаро́ ярмо; миро дад дукхавэлас тумэн чхупне́нца, а мэ ява́ва тэ мара́в тумэн скорпионэнца.’”

¹² И явдя́ Еровоа́мо и сарэ́ мануша́ кэ Ровоа́мо пэ три́то дывэ́с, сыр припхэндя́ кра́ли, пхэни́: “Явэ́н кэ мэ нэвэ́стыр (нэвэ́с) пирда́л трин дывэса́.”

¹³ Тэды кра́ли отпхэндя́ лэ́нгэ пхарэ́с, пал-дова́ со ячкирдя́ кра́ли, Ровоа́мо, пхурыдырэнгири годы́ и ракирдя́ лэ́нгэ, пир тэрнэ́-манушэ́нгиро годыпэ́н, адя́кэ:

¹⁴ “Дад миро чхудя́ пэ тумэ́ндэ пхаро́ ґа́мо, а мэ кэра́ва буты́р лэс; миро дад дукхадя тумэн чхупне́нца, а мэ ява́ва тэ мара́в тумэн скорпионэнца.”

¹⁵ И на кандыя́ (на шундя́) кра́ли манушэ́н, пал-дова́ со адя́кэ кэрдо́ сыс Ра́стыр-Дэвлэ́стыр, соб (кай) тэ сполнинэл Рай Дэвэ́л Пэ́скиро лав, саво́ Ёв ракирдя́ пирда́л Ахиёстэ Силомляниностэ Иеровоамоскэ (Еровоамоскэ), Наватоскирэ чхавэ́скэ.

¹⁶ Ке́ли саро́ Израилё дыкхця́, со на шунэ́ла лэс кра́ли, тэды отпхэндлэ́ мануша́ крали́скэ, ракири́: “Сави́ амэ́нгэ паш дрэ Давидо́стэ? Нанэ амэ́нгэ мэкно́ миштыпэ́н дрэ Есеёскирэ чхавэ́стэ; джа́н пир ша́тры пэ́скирэ, Израилё! Акана́ джин пэ́скиро кхэр, Дави́до.” И розгинэпэ сарэ́ Израильтя́ни пир пэ́скирэ ша́тры.

¹⁷ Екх фэ́ни пэ Израилёскирэ чхавэ́ндэ, савэ́ дживдэ́ кэ Юда́скирэ фо́рья, яця́пэ крали́са Ровоа́мо.

¹⁸ И бичхадя́ кра́ли Ровоа́мо Адонирамос, барыдырэ́с тэ кэдэн манушэ́ндыр дыибэ́н (дань), и зачхурдынэ лэс Израилёскирэ чхавэ́ барэ́нца, и ёв мыя́. Кра́ли Ровоа́мо сы́гэс бэстя́ пэ марибны́тко вурдэ́н, соб (кай) тэ нашэ́л дро Ерусалимо.

¹⁹ Адя́кэ отгинэ́ Израильтя́ни Давидо́скирэ кхэрэ́стыр кэ дава́ дывэ́с.