Iƹibraniyen 12 - Ṯarifiṯ 2020

Arebbi ḏ Babaṯneɣ u Siḏiṯneɣ Ƹisa ḏ zzaƹim nneɣ

¹ Iḏen ƹlaḥsab niṯni, iƹni ȓechuḏ nni n lʼiman iy xaneɣ itennḍen am yijjen n umuni ḏ ameqqran, labud a nekkar a nekkes kuȓ dqeȓ ḏ kuȓ ȓmuƹṣiyeṯ iy ḏaneɣ iseḥṣaren. A nazzȓeṯ s ṣṣbar ṯazzȓa nni iy ḏaneɣ itrajan ɣar zzaṯ.

² U labud a nxezzar mliḥ ɣar Ƹisa zzaƹim nneɣ ḏ netta iy ḏaneɣ ɣa issiwḍen nican ɣar uneggaru. Ƹisa s ȓefraḥeṯ nni iy tuɣa ṯ itrajan ɣar zzaṯ, iṣbar x ṣṣalib iƹeyyeb aḥeggar n ṣṣalib nni ssenni iqqim x ufusi n ȓƹarc n Arebbi.

³ Fekkareṯ mliḥ ḏi Ƹisa netta mecḥaȓ iṣbar x ccmayeṯ iy ḏas iƹarrḍen bac kenniw war tiḥȓem ca war tefciȓem ca.

⁴ Wami ṯmenɣem ḍed i ȓmuƹṣiyeṯ, war ṯƹirrḍem ca bac aḏ azzȓen iḏammen nwem lla.

⁵ Kenniw ṯettum awaȓ nni zi Lkitab iy kenniw ɣa icejjƹen, issawaȓen akiḏwem am ṯarwa nnes inna-awem:

6 Minzi Siḏi Arebbi itrebba wenni xas iƹizzen, inehha wenni iy xef yarḍa itwaḥsab am mmis.>

⁷ Ṣbareṯ x ttarbiya n Arebbi, itegg akiḏwem am ṯarwa nnes. Min iƹna mmis-a war ṯ itrebbi ca babas?

⁸ Yac marra iwḏan twarebban niɣ? Maƹlik kenniw war kenniw irebbi ca Arebbi, ataf kenniw am ṯarwa n ȓeḥram maci ḏ ṯarwa n lḥalal.

⁹ U ƹaweḏ neccin marra tuɣa ɣarneɣ lwalidin ḏi ddunect-a iy ḏaneɣ itrebban netseḏḥa zzaysen. Iwa neccin meȓa a neddar, ataf a nseḏḥa zi Babaṯneɣ n ujenna ktar niɣ lla?

¹⁰ Cuf, lwalidin trebban-aneɣ ḏeg yijjen n ȓweqṯ, teggen mammec ḏasen itɣiȓ mliḥ. Walakin Arebbi itrebba-yaneɣ x nnfaƹ nneɣ bac a ncarec ḏi ṭṭabiƹa nnes iǧan ƹaḍim.

¹¹ Ḏi ȓweqṯ nnes kuȓ ttarbiyeṯ tɣiȓ-aneɣ ṯeqseḥ maci ḏ ṯaṣebḥant. Walakin menbaƹd aḏ tarew ijjen n ṯfeǧaḥṯ n ȓxir ḏ ijjen n ȓehna i yinni iy t ɣa iȓemḏen.

¹² X manaya sjehḏeṯ ifassen nwem irxun ḏ ifadden nwem ifecȓen.

¹³ Seggḏeṯ ibriḏen nwem nican bac iḍaren nwem izeḥḥafen war tɣimin ca ḏ ineƹḏam aḏ genfan.

Abriḏ n ȓmuminin

¹⁴ Ggeṯ lmejhud bac aḏ tƹicem ḏi ȓehna ak marra iwḏan u bac aḏ tiȓim ṯeṣfam. Bȓa a niȓi neṣfa war ḏinni ḥadd iy ɣa iẓren Mawlana.

¹⁵ Arrem-d ȓbaȓ nwem bac war itɣimi ḥadd war ixeṭṭeȓ ɣar arḍa n Arebbi, niɣ ƹaweḏ war iɣemmi can n uẓwar ḏ amerzag aḏ igg lmacakil aḏ iḍeyyeƹ aṭṭas n yiwḏan.

¹⁶ Arrem-d ȓbaȓ nwem bac war itegg can yijjen zzaywem lfasad, niɣ can yijjen war ɣares itiȓi bu Arebbi am Ƹasu nni iruḥ netta izzenz ȓḥaqq nnes zi lbaraka n babas x yijjen n ṭṭebsi n lmakla.

¹⁷ Aqa ṯessnem menbaƹd iƹqeb-d Ƹasu-ya irezzu aḏ iwareṯ lbaraka nni yugi-yas babas. War yufi mammec tid ɣa yarr waxxa itettar-as-t s imeṭṭawen.

¹⁸ Cuf, kenniw war ṯqarrbem ca ɣar yijjen n uḏrar iy ɣa tḥaḏam s ufus ḏayes ṯimessi ṯḥeddeq ḏayes ṯaǧest ḏayes ṯubarcant ḏayes arriḥ aṭṭas.

¹⁹ Iteffeɣ-d zzayes ijjen n ṣṣut n zzammar ḏ yijjen n ṯmijja ṯessawaȓ awaȓen isaggwaḏen i yinni ḏas itsȓan, tettaren-teṯ war ḏasen ṯeqqar bu ca n wawaȓen nneɣni.

²⁰ Minzi tuɣa niṯni war zemmaren ca aḏ ṣbaren i min ḏasen ṯweṣṣa ṯmijja nni, ṯenna-asen qa lḥayawan nni iy ɣa iḥaḏan aḏrar-a ataf u labud aḏ itwarjem s uzru.

²¹ Min twaȓan ḏinni isaggwaḏ aṭṭas, ḥetta uȓa ḏ nnabi Musa inna aqayi terjijiɣ s ṯiggwḏi.

²² Walakin kenniw ṯqarrbem-d ɣar Uḏrar n Ṣiyun iƹni ṯandint n Arebbi iddaren ḏ Lquds n ujenna, ḏayes aȓaf n uȓufaṯ n lmalaʼikaṯ.

²³ Ṯqarrbem-d ɣar yinni itmunen ḏi ȓefraḥeṯ iƹni ɣar jmaƹeṯ n yinni ixḍar Arebbi iy d ixeȓqen ḏ imezwura isemawen nsen twazemmen ḏeg ujenna. Ṯqarrbem-d ɣar Arebbi wenni iǧan ḏ ȓqaḍi x marra iwḏan. Ṯqarrbem-d ɣar arruḥaṯ n ṣṣaliḥin yarri-ṯen Arebbi bȓa ȓƹib.

²⁴ Ṯqarrbem-d ɣar Ƹisa wenni itcafaƹen ḏayneɣ s yijjen n ȓƹaheḏ ḏ jḏiḏ. Ṯqarrbem-d kenniw ɣar iḏammen nnes itwaruccen iy qqaren ijjen n wawaȓ ḥsen zeg wenni n nnabi Habil.

²⁵ Arrem-d ȓbaȓ nwem war tjihiȓem ca awaȓ n wenni issawaȓen, mayemmi? Liʼanna Ayṯ-Israʼil war feȓṯen ca wami jehȓen awaȓ n wenni tuɣa ṯen iweṣṣan ḏi ṯmurṯ. U neccin ƹaḏ ktar, meȓa nugi a ntaƹ i wenni ḏaneɣ iweṣṣan zeg ujenna ataf ƹemmarṣ a nefȓeṯ.

²⁶ Ḏi ȓweqṯ nni iƹḏun ṣṣut n Arebbi isenhezz ṯamurṯ, walakin ȓexxu iwƹeḏ inna qa ƹaḏ aḏ d tas ijjen n ȓweqṯ nec aḏ senhezzeɣ ṯamurṯ uȓa ḏ ijennaṯen.

²⁷ Awaȓ nni nnes iƹni <ƹaḏ aḏ d tas ijjen n ȓweqṯ> ataf netta issawaȓ x ca n ṯmesȓayin itenhezzan aḏ twakksent iƹni ḏ ṯimesȓayin nni iy d itwaxeȓqen bac ṯimesȓayin nni iy war itenhezzin ca ataf aḏ qqiment.

²⁸ X manaya a ncekkar Arebbi ȓaḥeqqac neqbeȓ ijjen n ȓmulk war itenhezzin ca. Ammu aḏas nqeddem i Arebbi ijjen n lƹibada s ȓuweqqar ḏ ṯiggwḏi axas yarḍa netta,

²⁹ minzi Arebbi nneɣ netta ḏ ijjen n ṯmessi isḥarraqen.