Gálatas 2 - Tayta Diospa Wilakuynin

Jerusaléncho apostolkuna Pabluta chaskikuyashqan

¹ Saypita chunka chusku watataraqmi Tituta pushakurkur Bernabéwan Jerusalénman yapay kutirqä.

² Sayman kutirqä Tayta Dios revelacioncho aywanäpaq tantiyasimash kaptinmi. Jerusaléncho kaq apostolkunawan kikiläkuna shuntakarmi mana Israel runakunata imata yachasishqätapis wilarqä. Lutanta yachasishqäta yarpäyaptinqa sayjinanpa nakar wilakushqäpis manakaqlapaqmi kanman karqan.

³ Wilakushqäta tantiyasiptïmi ali kashqanta niyämarqan. Saynöpami mana Israel runa kashqanta musyarpis <> niyarqansu.

⁴ Wilakushqä ali kashqanta niyaptinpis juk ishkay runakuna criyenti tukur Moisés qelqashqan leykunata cumpliyänanpaqmi wawqi panikunata yachasiyarqan. Sayno yachasiyaptinpis Jesucristuta chaskikushna kaykar manami say leykunata cumplinansipaqnasu kaykansi. Paykuna niyashqanta chaskikurqa manami libriraqsu kaykansi, sinöqa say leykunapa munaynincho kar ashmaynölami kaykansi.

⁵ Saymi say lutan yachasikuyta chaskipäyarqäsu. Chaskipäyaptïqa Jesucristupa ali wilakuyninpita witikuyankimanmi karqan.

⁶ Jerusaléncho kaq apostolkunaqa wilakuptï manami michäyämarqansu (Jesucristuwan juntu purish kayaptinpis Tayta Diospaqqa lapansipis iwalmi kansi),

⁷ saypa trukanqa tantiyakuyarqan Israel runakunata wilapänanpaq Pedruta churashqanno mana Israel runakunata wilapänäpaq noqatapis Tayta Dios churamashqantami.

⁸ Israel runakunapa apostolnin kananpaq Pedruta Tayta Dios churashqannömi mana Israel runakunapa apostolnin kanäpaq noqatapis churamash.

⁹ Saymi Santiago, Pedro y Juanpis tantiyayarqan wilakuyninta wilakur purinäpaq Tayta Dios churamashqanta. (Paykunapaqqa iglesiacho columna kayashqantami niyan.) Saypitanami paykuna niyämarqan: <>. Sayno nirkurmi makinta qoyämarqan.

¹⁰ Saynöpis niyämarqan muchuq wawqi panikunata mana qonqaypa yanapäyänäpaqmi. Sayta imaypis ruraykämi.

Pedruta Pablo olqutupashqan

¹¹ Saypita Antioquíaman Pedro chaykamur mana alita ruraptinmi olqutuparqä.

¹² Puntataqa mana Israel wawqi panikunawan shuntakaykurmi mikuq. Santiaguwan puriq runakuna chäyämuptinmi isanqa jamuräyänanta mansakushpan mana Israel wawqi panikunawan shuntakarqannasu.

¹³ Pedruta rikakurmi wakin wawqi panikunapis y Bernabépis mana Israel wawqi panikunawan mikuyänanpaq shuntakäyarqannasu.

¹⁴ Sayno rurashqan mana ali kaptinmi wawqi panikunapa nawpancho Pedruta olqutupar nirqä: <

¹⁵ Noqansi manami mana Israel runasu kansi, saypa trukanqa yurishqansipita pasa Israel runami.

¹⁶ Musyansimi Tayta Dios imano perdonamashqansita. Manami Moisés qelqashqan leykunata cumplishsu perdonamansi, saypa trukanqa Jesucristuman yärakushqami. Saymi Jesucristuman yärakuykansi Tayta Dios perdonamänansipaq. Say leykunaman yärakushqanpitaqa manami pitapis Tayta Dios salvansu>>.

¹⁷ Moisés qelqashqan leykunaman yärakunansipa trukan Jesucristuman yärakushqami wakin runakuna yarpäyan jusalikushqansita. ¿Paykuna yarpäyashqannösuraq Jesucristo jusalikasimansi? ¡Manami!

¹⁸ Saypa trukanqa jusayuq rikakunsi Moisés qelqashqan leykunaman yapay yärakurmi.

¹⁹ Moisés qelqashqan leykunapa munaynincho karmi say leykunapaq wanush japuyna rikakurqä. Kananqa librinami kaykä Tayta Dios munashqanno kawanäpaq.

²⁰ Noqaqa Jesucristuwan cruzcho wanushnömi kaykä. Manami noqanasu kawä, saypa trukanqa Jesucristumi noqacho kawan. Saymi Tayta Diospa Surinman yärakur kawaykä. Paymi kuyamashpansi noqansi rayku wanurqan.

²¹ Manami manakaqmansu Tayta Dios kuyapämashqansita churaykä. Wakin runakuna niyashqanno leyninkunata cäsukushqaraq Tayta Dios salvamaptinsiqa Jesucristo wanushqanpis manakaqlapaqmi kanman karqan.