1 Timoteo 1 - Tayta Diospa Wilakuynin

Carta qalaykunan

¹ Noqa Pablumi Jesucristupa apostolnin kaykä. Apostolnin kanäpaqmi salvakuq Tayta Dios y yärakushqansi Señor Jesucristo churamash.

² Timoteo, Jesucristuman yärakushpayki kuyay surïno kaptikimi kay cartata cartakaykämü. Papäninsi Tayta Dios y Señor Jesucristupis kuyapäshushpayki ali kawanaykipaq yanapaykuläshunki.

Lutan yachasikuqkunata michänanpaq yäsishqan

³ Macedonia provinciaman aywarmi Éfeso markacho qamta kachaykamurqä lutan yachasikuqkunata michänaykipaq.

⁴ Say lutan yachasikuqkunaqa yarpaylankunapita yachasirmi unay tiempu imanöpis kashqanta y unay ayllunkuna pï kayashqanta yachasiyan. Saykunata yachasiyaptinmi Tayta Diosman yärakuyänanpa trukan manakaqkunapita rimanakular kawaykäyan.

⁵ Say lutan yachasikuqkunata michänaykipaq nikä wawqi panikuna rimanakuyänanpa trukan kuyanakuyänanpaqmi. Sayno kuyanakuyänanpaqqa mana jusalikuypa alilata rurar kawayäsun y lapan shonqunwan Tayta Diosman yärakuyäsun.

⁶ Say lutan yachasikuqkunaqa kuyanakuyänanpa trukan manakaqkunapita rimanakularmi kawayan.

⁷ Tayta Diospa leyninkunata selläma yachaq kayashqanta nirpis senqan maycho kashqantapis manami musyayansu.

⁸ Musyansimi Tayta Dios munashqanno kawayänanpaq yachasishqaqa leyninkuna ali kashqanta.

⁹ Manami jusaynaq runakunapaqsu leyninkunata Tayta Dios kamariparqan, sinöqa jusalikuqkunapaqmi. Saymi leyninkuna kaykan mana cäsukuqkunapaq, fiyu runakunapaq, jusasapakunapaq, Tayta Diosta manakaqman churaqkunapaq, mamanta y taytanta maqaqkunapaq y runa mayinta wanusiqkunapaq.

¹⁰ Saynöpis kaykan majanta qanrataqkunapaq, olqupura kakuqkunapaq, warmipura kakuqkunapaq, runa mayinta rantikuqkunapaq, lulakuqkunapaq, manakaqta jitapar runa mayinpa contran sharkuqkunapaq y ali yachasikuyta mana cäsukur ima jusatapis jusalikuqkunapaqmi.

¹¹ Sayta nikan alabash Tayta Diospa ali wilakuyninchömi. Wilakuyninta wilakunäpaqmi Tayta Dios kachamash.

Pabluta Tayta Dios kuyapashqan

¹² Señorninsi Jesucristutami agradëcikü wilakuyninta wilakunäpaq yanapämashqanpita. Saynöpis agradëcikü yärakamashpan wilakuyninta wilakur purinäpaq churamashqanpitami.

¹³ Nawpataqa Jesucristuta manakaqman churarmi payman yärakuqkunatapis ashi ashiykur carcilman wichqasirqä. Mana musyaynïpa sayno rurash kaptïmi Tayta Dios kuyapämar perdonamash.

¹⁴ Perdonamashpanmi tantiyasimash Jesucristuman yärakur pïmaytapis kuyapänäpaq.

¹⁵ Jusasapa runakunata salvananpaqmi kay pasaman Jesucristo shamush. Rasun kaqta nikaptïqa pïmaypis criyiyäsun. Noqalätapis lapan runakunapita mas jusayuq kaykaptïmi

¹⁶ kuyapämar salvamash. Sayno salvamarqan Jesucristo perdonakuq kashqanta wakin runakunapis tantiyakur payman yärakuyänanpaq y mana ushakaq kawayta tariyänanpaqmi.

¹⁷ ¡Tayta Diosmi imayyaqpis munayyuq rey, imayyaqpis kawaq y mana rikakaq kaykan! Pay japalanmi Dios kaykan. [Manami pipis payno yachaq kansu.] ¡Imayyaqpis alabash kaykuläsun! ¡Amén!

Jesucristupa wilakuyninta imaypis wilakunanpaq yäsishqan

¹⁸ Kuyay Timoteo, Tayta Diospa jutincho wawqikuna niyäshushlaykitami noqapis qamta yäsï: Ali soldädu mana mansariypa pelyashqanno qampis mana mansariypa Jesucristupa wilakuyninta wilakuy.

¹⁹ Sayno wilakushpayki Jesucristuman yärakur Tayta Dios munashqanno imaypis kaway. Wakin runakunaqa Tayta Dios munashqanno manana kawarmi Jesucristuman yärakuyannasu.

²⁰ Saynölami Alejandruwan Himeneupis qepaman kutikuyash. Paykunatami Satanáspa makinman entregashkä. Saynöpa capazchir tantiyakur lutanta yachaykäsiyashqanta kacharir Jesucristuman yapay yärakuyanmanpis.