Lucas 15 - Maung a Balita Biblia

Say Abalang a Karniro

¹ Aminsan, inmasingger ya ondengel ed kinen Jesus iray amin a sumisingil na buis tan saray makasalanan.

² Balet ngoro-ngoro ray Pariseo tan saray iskriba tan inkuanda, Sayan too aawaten to ray makasalanan tan mimikan nid sikara!

³ Kanyan sinalita nen Jesus yan alimbawa,

⁴ No bilbilang ta sakey ed sikayoy walay sanlasus a karniro et abalang so sakey, antoy gawaen to? Taynan tod alog ira may siamaplo tan siam a karniro, insan to anapen imay abalang a karniro, anggad ag to pakalmo.

⁵ No nalmo to la, sakbaten to diad pakaliliket to.

⁶ Kasabi tod abung, imbitaan to ray kaaro tan saray kakaabay to. Miliket kayod siak, ikuanto, ta nalmok so karniron abalang ko!

⁷ Ontan met, kuankod sikayo, a babaleg so liket ed tawen lapud sakey a toon mampataulid saray kasalanan to, nen say siamaplo tan siam a totoon matonung ya ag da la nakaukolay mampatauli.

Say Abalang a Kuarta

⁸ No say sakey a biin walay samploran pilak a kuarta et abalang toy sakey, antoy gawaen to? Manelsel na lamparaan, panisan toy abung, tan anapen ton maung ya anggad ag to pakalmo.

⁹ No nalmo to la, tawagen to ray kakaaro tan saray kakaabay to. Miliket kayod siak, ikuanto, ta nalmok so kuartan abalang ko!

¹⁰ Ontan met, kuankod sikayo, so panliket na saray anghil na Dios lapud sakey a toon mampataulid saray kasalanan to.

Say Anak a Nandarak na Kayamanan

¹¹ Intuloy nen Jesus, Walay sakey a lakin duaray ilalak ton lalaki.

¹² Inkuay yogtan ed kinen ama to, Ama, iter yo pa lad siak natan so tawir ko. Inapag nen ama sirin iray kayaryan to ed saramay duaran ilalak to.

¹³ Kalabas na pigaran agew, inlako to may yogtan so apag to, insan linmad arawin pasen a diman to dinarak so kuarta to diad aliwaliwan panagbilay.

¹⁴ Nen agastos to lan amiy kuarta to, sinmabiy baleg ya eras ed saman a pasen, kanyan anggapo lay nagastos to.

¹⁵ Linman akikimey ed sakey a tood saman a pasen, tan samay too imbaki ton manasikasoy baboy.

¹⁶ Labay to komun a tempeyey eras to na anggan say kupag a kakaney baboy, balet anggapoy mangiter ed sikato.

¹⁷ Nen anunotan toy maung inkuantod sikaton dili, Amin da ray katulong na amak dugay kakanen da. Masoluk ni ingen! Siak, balet, wadyan ompapatey lad eras.

¹⁸ Say maung, ompawil ak ed amak tan akoen koy impankasalanan kod Dios tan diad sikara.

¹⁹ Ibagak nin ag ak la manepeg a tawagen day anak, tan kerewen ko ya anggan ibilang da ak lan sakey ed saray katulong da.

²⁰ Inmalagey sirin, ta onla lan ompawil ed kinen ama to. Arawi nid abung nen anengneng nen ama to. Atenyeg so puso nen ama to, kanyan inabet ton mambabtik, nilakap toy anak to, tan inanguban to.

²¹ Ama, kuanen anak, nankasalanan ak ed Dios tan diad sikayo. Ag ak la manepeg a tawagen yon anak yo.

²² Balet tinawag nen ama ray katulong to tan inkuanto, Ganatan yo! Awit yo diay sankarakepan a kawes tan isolung yod sikato. Solungan yoy singsing tan itdan yoy sandalya.

²³ Patey yo may pinataban kilaw a baka, ta mangan tan manliket itayo!

²⁴ Ta inatey yan anak ko, balet mabilay la; abalang, balet nalmo la. Ginmapo sirin so panliliket da.

²⁵ Samay pangulowan balet, walad alog. Nen onsesempet tan asingger lad abung, nadngel toy togtog tan anengneng toy sayawan.

²⁶ Tinawag toy sakey ed saramay katulong tan tinepet to no antoy nagagawa.

²⁷ Pinmawil a mabilay imay agim tan anggapoy sakit, ebat to may katulong, kanyan impapatey nen amam imay pinataban baka.

²⁸ Diad pasnuk to may pangulowan, ag to onloob ed abung. Dinago nen ama to tan kinerew ton onloob la.

²⁹ Balet inkuantod kinen ama to, Nanlingkur ak a singa aripen ed sikayon piga-pigay taon. Anggapo niy ganggan yon sinumlang ko. Antoy inter yod siak? Anggapoy anggan kanding a panliliketan mi ray kakaarok!

³⁰ Balet satan ya anak yo, dinarak to ray amin a kayaryan yo ed marorotak a bibii. Natan ta pinmawil, pinatey yoy pinataban bakan kilaw para sikato!

³¹ Anak ko, kuay ama, wadya kan naynay ed abung tan kayaryan mo ray amin a kayaryan ko.

³² Balet nakaukolan a manliket tan mampista itayo, ta inatey yay agim, balet mabilay la; abalang, balet nalmo la!