Biblia Todo Logo
Bib sou entènèt

- Piblisite -

MATHI 4 - DAÜLANGPÜ LAIHING (BSI)


Jisu kü Dokpü
( Mk. 1:12–13 ; Lk. 4:1–13 )

1 Hapheikü Kahshih-i dokhühen shingvaishi Laanghai Jisu jahpanei müei dai.

2 Büpa nyih pinyi ya pinyi shüaeiyungle pheikü büpa aeiyei pei.

3 Hahepak kü Kahshih-i büpa touei peiyei büpa kü, “Nüngü Kahvang Ha shejema, hathü yaongi aan leihen ngeükhüam shuohtuh” shei e.

4 Shejao Jisui, “Laihingi hapakei enyüke: Shennyak hük aani mon yangnyu nenyuaokpih, shejao Kahvangei ju kübü vampü shahkuk ieyei mon nyunyeih” shei jangei e.

5 Hapheikü Kahshih-i daülangpü chingnyülei büpa müei deiyei phopshem shem adok deppülei anei yaonghütü,

6 büpa kü, “Nüngü Kahvang Ha shejema, nüng haleipü laongtuh; mehenangkü Laihingi enyüke: ‘Büpai nüng nangkü büpalei vangsho phongshanthü kü shah shuohhen, hatü nüngei la yaong kü ne-aokhahen shingvaishi jomei laki nüng yeplanghen’ ” shei e.

7 Jisui büpa kü, “Shao Laihingei hayao nyangei nyüke: Nüngi Shembüpa, nüngei Kahvang mong tedok” shei e.

8 Shao Kahshih-i büpa kahshang shaopü hükei müei antü kahdoknyü kübü müknyinshekhangpü ongchingthü peü huteke,

9 hatü büpai büpa kü, “Nüngi aümei shatü ngei kü khümjema, ngei hathü peü nüng kü shuohhen” shei e.

10 Jisui büpa kü, “Lüdaituh, Kahshih! Laihingi ha enyüke: ‘Shembüpa, nüngei Kahvang kü khümtuh, hatü büpa mon chongphotuh’ ” shei e.

11 Hahepak kü Kahshih-i büpa tuhtü lüdai, hatü lomi vangsho phongshan peiyei büpa kü jung.


Jisui Galilei Büpalei Dousho Pangpü
( Mk. 1:14–15 ; Lk. 4:14–15 )

12 Shaang mechem Jisui Johan yeplangpü jung danpa, büpa Galil lemei heihdai.

13 Büpai Nazareth tuhtü daiyei Zebulun hatü Naphtali kahdok moidoi kü shemyung yopailei Kapernaumei nyu,

14 hatü hayü Isaiah thibü homei epü jiühühen shingvaishi ha vamteke:

15 “Zebulun kahdok, hatü Naphtali kahdok, yungchingei heihpü lem, Jordan yungdang homei, Kung amei kahdok, Galil!

16 Shangmang kü nyupü shennyakthüi vangngai longpü hük eeteke, hatü dipü yingdhüm kahdokei nyupüthü touei vangngai vamteke.”

17 Hahepak kübü Jisui, “Amphong mong leptuh; mehenangkü vangsho ongching yopailei peiteke” shei baonghen chongpang.


Jisui Shongpü Nanglom Nyükpü
( Mk. 1:16–20 ; Lk. 5:1–11 )

18 Büpa Galil yungkungei kamei nyushingkü büpai cheihinaü nyi, Simon, üpa kü Peter shei nyüknya, hatü chenaü Andrew nyi yungchingei shang shepei nyupü ee; mehenangkü jijinyiyü nyah yeppü am nyuteke.

19 Büpai jiji kü, “Ngei phei mükei hatü ngei anjiyü shennyak yeppü am leihühen” shei e.

20 Shüshülangi jijinyi-i shang tuhphongtü büpa phei mü.

21 Büpa hatoueipü daishingkü büpai shao lebü cheihinaü nyi, Zebedeelei cheha Jakob hatü chenaü Johan nyi chepa mü ai kü uotü shang kaiyei ee, hatü büpai jiji kü nyükteke.

22 Shüshülangi jijinyi-i ai hatü chepa tuhphongtü büpa phei mü.


Jisui Nanglak Khongnyü Chongphopü
( Lk. 6:7–19 )

23 Jisui Galil peü thümei Sinagoglei nyuh-ei, hatü ongching jung shahjangmei chongvenei lemphü dinlem meihüei hatü nanglakthü khongkü tüngpü lemphü meihüei dai.

24 Hanangkü büpai dükpü doumei jung Syria kahdok peü lemei dai, hatü jomi büpa touei tüngpüthü, dinlem laolao thahpüthü, shangpüthü, shepe-i yeppüthü, mohohyoi kohpüthü hatü büm bhaoei didaipüthü büpai meihü.

25 Galil, Dekapolis, Jerusalem, Judea hatü Jordan yungdang phi kübü khongnyü longi büpa phei mü.

Phom Naga Bible - DAÜLANGPÜ LAIHING

Copyright © 2005 by The Bible Society of India

Used by permission. All rights reserved worldwide.

Bible Society of India
Swiv nou:



Piblisite