Ester 2 - Fanawbuid tagsibaliwas Fakayabian

Ester ansik Fun at Mangena

¹ Fun Akasuerus at dotama nu nalyam wan, kanya namatang at bubay Basti ay at nafakamulun ay at nafariruk fag suguan tagalvngvdan sas Basti at nafakamulun.

² At ngay fagsuguan tagfakamulun sanya nalong te, “Mesug fag fun, rvbvyi at masine fag ngay baguina.

³ Filii sas galay afud talun am fagfagtainanan sik ngay fagsuguan laman nanrvbvy at masine fag ngay baguina ay gtaban stie sfuruan Susa, sa sangay mangena at bale. Ay fatigwanani sas Egay aroro kanya am fagsuguan at sadi tagalaga ngay mangena at bale. Kanya wan tagfon sa sangay baguina at ngay fagayudanun ay at ngay famasine.

⁴ Ay am naylatan ban fag baguina fantubus am mangena Basti.” Nu katanya, fun naylat at famalun ay nafaning.

⁵ Ginanya fag buknga, e sik taw Udyu tagbanwan sis furuan Susa at ngayan Mardukyu, Yair at baguama, Simei at fufu, ay Kis at fufu tud, kataip sas Benamin at kasugfunanan.

⁶ Kanya wan at sadi fun Nabukudunusur at ngay nataban sas Babilunya siginans Erusalem, gasfuan Yuyakin, talun Uda at fun.

⁷ Ay Mardukyu e lagbe sik baguina at ngayan Adasa. Ay kanya wan at nafagurang anya aroro at mama ay at mina anbul wan. Ay nafangayan yangay Adasa te, Ester. Ay Ester at bilug masine at kawalungan. Ay Mardukyu natuyan anya te, kata nu at sisian fia.

⁸ Gina nafoyung fun at longan, ngayu at nataban baguina sa sangay mangena at bale sas Susa. At sadi kafag ngay baguina Ester, ay nafalaga sas Egay aroro nafatigwanan wan sa anya nu galaga at ngay baguina.

⁹ Egay guseganan Ester, nu katanya, gfagadgalangan tua anya. Nafon wa vtv sas Ester at mafilian fag ngay fakonun, ay at ngay fagayudanun ay ngay famasine. Ay nafon yangay sa anya sik masine fia fag suluk, ay fituk fagsuguan fag mangena.

¹⁰ Ay Ester wa gfasaful te, sia sik taw Udyu, aroro Mardukyu nalong anya te, lag gfasaful.

¹¹ Kayu menit, Mardukyu gdalan munakbang sanya fag ngay mangena at bale laman nanginsaful te, setain at kindasug sas Ester.

¹² Sik mangena at nansalubang sas fun, masine kanya nu gfafasine yay at bilug kaduge sik banwa. Taguna fag unumk magdanun grarus sat bilug at mabebanglu fag langis, ay at fadogan fag unumk magdanun grarus tiba yak famaebebanglu ay tiba yak famasine.

¹³ Ay kanya ban gina nansalubang sas fun, Egay gfon anya nusnga setaw fag lanbung, ay ngay dalag at fakaylatun gsulun.

¹⁴ Ay ginanya ro fag yabi, gtaban anya sas fun, ay balabag di ban, gfafoli anya sa tibak afud ngay mangena at bale. Saasgas fun at fagsuguan tagalaga fun at ngay mangena. Nusnga sinu fag mangena wa ban manangafoli sas fun, bunway at fakaylatun ay at nafauro.

^15-16 Gina sis fasafuluk magdanun, Tebet fag magdanun, ay sis fafituk banwa gina fun Akasuerus nu gfunan, andasug wan at menit Ester nu nansalubang at fun sat bale. Ester nafaning Egay at longan fagayu, aroro kanya wan tagalaga ngay mangena. Ester nasulun Egay at nafon anya fag lanbung. Ay fagayu taw at nalag anya, andulo maksvn ay nauseganan, ay nataban anya sas fun at bale daul.

¹⁷ Fun naylat Ester gtungud yay sa tibak baguina. Kanya maksvn nu guseganan Ester, nu katanya, nafae sangbo ay namangena laman fantubus Basti.

¹⁸ Fun nafalganan sik fagmafulun daul laman famauseganan Ester. Kanya nafauro ngay tagfangguna ay fun ayu sirut. Ginanya fag menit, fun nasugu sas fagdaul at fagfagtainanan te, “Lag am gfakamulun.” Ay fun nafon ngayuk famonun sa sangay taw siginan at ramraman.

Mardukyu Nafalangfe Fun

¹⁹ Ay sis fadua ginan nu gfaful ngay baguina, Mardukyu sik tagfangguna wan ay ke fanambagun sas fun at bale at sakbawan.

²⁰ Ester wa yangay nafasaful te, sia sik taw Udyu kata Mardukyu at longan sa anya. Ester gfaning yay gugat Mardukyu kata ebi gina yay galaga anya.

²¹ Mardukyu gina sik tagulit sis fun at bale at sakbawan, fun at fagsuguan at dua, at ngayan Bigtana ay Teres, gulit fun at sakbawan suluk. Kanya fag dua kadotama fun Akasuerus, ay namatangan namabul anya.

²² Ay Mardukyu nasaful kanya fag algan, nu katanya, kanya nalong at nasaful sas Ester, fun at mangena. Ay Ester nafasaful yangay kafag algan sat fun ay nalong te, “Mardukyu nafasaful tuy fag algan laman namabul emu.”

²³ Ay fun nanamainsaful ay nu natuyan te, matuyan, narabing wan Bigtana ay Teres. Ay fun nafariruk takatanya sas fafil sabaliwa nu gfunan.