Korintoanɛ 2 12 - Nyangbo New TestamentPaulo Yɛɔlalazaza Nɛ̀ Yɛiwuɔ Giɛtsuiɛ 1 Kɛlɛ sɛ tɛ ɛzã kɛlɛ abha tɛ itũ ahɔɛ nɛ mitelũ. Kɛnanà ma gɛ ɛbamɔ nɛlɛ mɛ pɔ, ɛbazã kɛlɛ abha bhɛtɛ tɔɖɔ mɛɔdɔ̃ mɔmɔ nɛ tibubukasɛ gɛide Apaleteɛ ɔkɔ nabha. 2 Inyi anyɛ teli gɛ akpasɛ Apaleteɛ mɛ gɛ asɛ agɔ lɔfɔ nɛ talɛ nɛ alɛ befeke yɛ avɛnɔ kititi tramɛ mɛ. Onupɛ ishupi mɛ alo gɛnɛ ishupi mɛ o, mɛxɔnɔ itinyi, Owusoso Akaa xɔnɔ enyi ɛlɛ. 3 Kɛlɛ inyi sɛ anyɛ alɛ, onupɛ ishupi mɛ alo gɛnɛ ishupi mɛ o, mɛxɔnɔ tinyi, Owusoso Akaa ete yɛenyi ɔsɛ 4 bavɛnɔ yɛ nɛ paradiso mɛ. Elũ ebui gɛ atɛ balà alɛ esi bu, ebui gɛ bagɛ kɔ anɔ kidzo sɛ tɛ alà aɖɔ. 5 Ɛbatũ mɛitelũ nɛ anyɛ alɛ nɛidi shu, pɔ ɛtɛ batũ kitelũ ɔkɔ mɛishu, ɔdɛ mɛ bɔtɔ shu ete. 6 Onupɛ edzi asɛ ɛpɛ sɛ tɛ mɛitũ ahɔ nɛitũ tsyɛ elo, ɛtɛ badzi awɔaga ɔmɔsɛ ɛbazã ɛlɛ abha zɛɖɔ kibuiɛ gɛlɛ ɛlɛ ɔzãkɔ. Pɔ ɛzakà tũ mɛitelũ, sɛ tɛ anɔ nanà etì beɖi mɛ asɛ mɛinu anɔ gbagbla ɔdɛ ɔganà kɛgɛ ɛbhɛtɛ pɛ ɛɖɔ shu. 7 Tɛ kibu mɛ oyinɔ denɔ ishu fefeke mɛ gɛ, nɛ ebui gɛ labhɛtɛ kibi alɛ gɛ bebu akasɛ mɛ so, balɔkɔ kiwú akpɛ mɛishuɔ mɛ, gɛenu Satana yɛanɔkpɛkpɛ sɛ tɛ̀, ahɔhɔlɛ mɛ. 8 Bɔtɛ tɛtà mɛkɔ Apalete nɛtakpu sɛ tɛ ebu mɛ eyinɔ edenɔ kɛlɛ mɛ. 9 Pɔ etseɖe mɛasɛ, “Mɛ tibhui bhuibuɔ kpè kɔ wɔnɔ, ɔmɔsɛ mɛ ohuminɔ ɔna denɔ tibobotsòɔ mɛ.” Klisoɔ ɛbatũ mɛitelũ tɔɖɔ nɛ̀ same nɛ mɛ tibobotsò nulũ, sɛ tɛ Kristo yɛohumi nɔ zã mɛabha. 10 Kliso pɛ nɛ Kristo yɛtakpuɔ, ɛmɔ same nɛ tibobotsò mɛ, nɛ akwalatu mɛ, nɛ ebui gagalĩ mɛ, nɛ banɔede tɛtɔtɔnɔ mɛ nɛ̀ bɔtɔ mɛ. Ɔmɔsɛ onupɛ ibotsoɔ, ɛkɛlɛ mɛmɔ tɛgagalĩ. Kɛgɛ Paulo Apɛ Akɔ Korintoanɛ 11 Ɛdɔ bɔwɔaga, pɔ wɔnɔ gbana mɛɔkpɛ bɔlɛ tɛdɔdɔ mɛ. Tsyɛ alo kɛlɛ sɛ nɔɖɔ kibui gbangbã nɛ mɛishu flogo ɔmɔsɛ itinu agɔgɔɛ ɔkɔ “banɔkpɛkpɛ gɛ balɛ ɔzakɔ gbagbla” pɔ mɛxɔnɔ tinu kɛdɔ̃ nanà kɔ alɛ flogo. 12 Kɛgɛ kɔ bamɔ anɔ ɔsɛ enu anɔ kpɛkpɛ yɛenu ebui bubukasɛ, ebui gɛ abhɛtɛ ibi nɛ̀ atsyindzye ebui alɛ babhɛtɛ nɛ wɔnɔɛshi nɛ kemikpɛkpɛ. 13 Kɛlɛ nɔzã asɛ banɔ bhlui ɔkɔ ɔhaa bhlatɔ, gɛ idzi bɔtɔ kɔ wɔnɔ flogo nɔɔ dza? Nɔlɔkɔ kesitata alɛ tsye mɛ! 14 Otsiɛ nɔ ɛbalɛ beke sɛ tɛ̀ ɛbaɖi wɔnɔ bɔtramɛ, kɛlɛ ɛtɛ badzi bɔtɔ kɔ wɔnɔ, ɔmɔsɛ gɛnɛ wɔnɔ bɔdɔ̃ gɛ nɔmɔ mɛpɛ, pɔ wɔnɔ mɛpɛ. Nɛ alɛ nyɔɔ edeɛ, gɛnɛ bunuvɔɛ kɛlɛ sɛ tɛ beɖi balɛ elĩ nɛ̀ balɛ akaa alɛ nabha, pɔ beyi akaa nɛ̀ beyielĩ kɛlɛ sɛ tɛ beɖi balɛ eyi alɛ abha. 15 Klisoɔ ɛbalɔkɔ same zĩ kɛka nyia ka gɛlɛ mɛahɔɛ ɔlɔkɔ plɛnɔ mɛishu nɛ wɔnɔɛtakpu. Onupɛ ɛdɛmɛ wɔnɔɛbui tɔɖɔ, wɔnɔ xɔnɔ ɔbɔ dɛmɛ mɛibui bhlui dza? 16 Asɛ kana gɛ kɛlɛ ana, itinu bɔtɔ kɔ wɔnɔ. Pɔ bɔshɛ mɛ anɔ mɛinu, kliso ivũ wɔnɔ nɛ mɛ bɔshɛ wɔawɔa mɛ! 17 Idzyini wɔnɔkpɛ gana banyɛ teli gɛ ɛkpɛ nɛ wɔnɔkɔ mɛ dza? 18 Ɛkpalà Tito sɛ tɛ aba wɔnɔkɔ, kɛlɛ ɛkpɛ ɔlɔ adzya plɛnɔ yɛ. Tito egidzyini wɔnɔ akpɛ, alo edzyini wɔnɔ akpɛɛ dza? Bɔgɛ bhɛtɛ ebui gana ɔfɔfuĩa tonikpo abha pɛ bɔzã kibui tinikpo bhɛbhɛtɛ abha dza? 19 Aabhɛtɛ wɔnɔ sɛ bɔpɛ asɛ tɛ bubu bɔlɔshu ulũ nɛ wɔnɔ amɛ dza? Bɔɔɖɔ kaɖɔ nɛ Owusoso Akaa amɛ asɛ banɔ gɛ akpasɛ Kristo mɛ ana, mɛadzya alɛ gɛ ɛdɛmɛ nɔ, kɛka nyia ka gɛ bɔbhɛtɛ, bɔbhɛtɛ ɛlɛ ɔkɔ wɔnɔ sɛ tɛ nɔzã gagalĩ. 20 Ɔmɔsɛ kifù yimɛ sɛ onupɛ ɛba wɔnɔ ɔkɔ, ɛtɛbà mɔ wɔnɔ asɛ kana gɛ ɛpɛ sɛ nɔzã, kɛlɛ wɔnɔ tsyɛ ɔtɛbɔ mɔ mɛ asɛ kana gɛ nɔpɛ ɔsɛ tɛ mɛzã. Kifù yimɛ ɔsɛ ebelà pɛpɛ ebui, kabhãwawlakɛ ebui, ɔmɔpɔɛ kpɛkpɛ, ɔhakpa yaya, kaɖɔ kpa tɛɖɔɖɔ, banɔ shu tizizĩ, ishu fefeke nɛ̀ kawlɔ̃akɛ ebui ebeku wɔnɔ mɛ. 21 Kifù yimɛ sɛ onupɛ ɛzɛba, mɛ Owusoso Akaa abakɔ mɛizhini mɛishu esi nɛ wɔnɔ amɛ, kɛlɛ ɛbàmɔ ɔwɔ̃nyɔnɔ denɔ banɔ gelee gɛ batɛ bhɛtɛ ebui kpa akpɛ otugbà pɛ begitsyina nɛ balɛ etúɔ mɛ odenɔ atsɔ̃bui bhɛbhɛtɛ mɛ, ebui asɛ ɔmamɛ dɛdɛ nɛ̀ bunu tibubuku ebui gɛ balɔkɔ balɛishu ashɔkpɛ mɛ. |
© (Active), Ghana Institute of Linguistics, Literacy and Bible Translation. All rights reserved.