Korintoanɛ 1 7 - Nyangbo New Testament

Adzɛ Gbagbãna Shu Bɔdɔ̃kakasɛ

¹ Otsiɛ nɛ ebuiɛ gɛ alɛ shu nɔfɔ̃nɔ bɔdɔ̃ɔ, apɛ akɔ anyɛ sɛ tɛ̀ atɛ gbana adzɛ.

² Pɔ gɛ kɛgɔlɔ ŋaŋã ebuiɛ bekpe soɔ, adzɛ azã anyɛ ka nyia ka ahɔɛ, kɛlɛ anyɛ tsyɛ azã adzɛ ka nyia ka ahɔɛ.

³ Adzɛ enyineɛ abhɛtɛ tɛgbagbana ɛbuiɛ ɔkɔ yɛedziniɛ, adzɛ tsyɛ abhɛtɛ ana akɔ yɛ enyineɛ.

⁴ Adzɛ yɛishupiɛ tinu yɛ tenikpo ɔyɛ, pɔ bɔlɛ ɔkɔ yɛenyineɛ tsyɛ. Nɛ kidzo ɛlɛ nabhaa, adzɛ enyineɛ ishupiɛ tinu yɛ tenikpo ɔyɛ, pɔ bɔlɛ ɔkɔ yɛedziniɛ tsyɛ.

⁵ Nɔtɛ lɔkɔ wɔnɔ ishu kanà bagɔlɔ, ɔdɛ sɛ nɔ tɔɖɔ kɛlɛ elú ana ɔkɔ kibè tili, sɛ tɛ nɔlɔkɔ wɔnɔshu ɔkɔ Owusoso Akaa tikukulu. Kɛlɛ nɔ bhɛtɛ tenikpo sɛ tɛ Satana atɛ ba efeke wɔnɔ eɖi sɛ gɛ nɔtɛɔ là wɔnɔ shu abha ŋã so.

⁶ Ɛɖɔ ebui alɛ sɛ tɛ ɛkɔ wɔnɔ kidzo nɛ alɛ shu, gɛnɛ ɔsha mɛ ɛkpɛ ɔkɔ wɔnɔ.

⁷ Ɛpɛ sɛ tɛ̀ tsyɛ alo anyɛ ka nyia ka atazã asɛ mɛ ana. Pɔ anyɛ ka nyia ka nɛ kɛgɛ bakɔ yɛ edenɔ Owusoso Akaa ɔkɔ, anɔ alɛ bakɔ yɛ kɛdɔ̃ ɛlɛ, abhlatɔ tsyɛ bakɔ yɛ kɛlɛ.

⁸ Otsiɛ nɔ itseɖe bagbalugba nɛ̀ bavɛvɛ edziniɛ asɛ, kɛpɛ kɔ alɛ ɔsɛ tɛ bazã nɛ̀ kɛgbà, asɛ mɛ ana.

⁹ Pɔ onupɛ batɛ balà balɛ ishu abhaa aŋãa, kɛlɛ sɛ bazana anyɛ, ɔmɔsɛ apɛ̃ asɛ tɛ̀ ɔzanà anyɛ ɔdɛ ɔsɛ tɛ̀ wɔshumɛ zɛlɔ nɛ anyɛ shu.

¹⁰ Nɛ bagɛ agbana adzɛ shuɔ mɛ ɛkɔ ɔsha lɛ asɛ, (gɛnɛ mɛkpɛ ɔshaa, pɔ Apaleteɛ) Adzɛ agɛ mɔ kidzo sɛ tɛ ashɛnɛ ahɔɛ nɛ yɛenyine shù.

¹¹ Pɔ onupɛ abhɛtɛ ana, azã nɛ̀ kɛgbà alo tɛ etsodzi abhɛtɛ tenikpo nɛ yɛenyineɛ. Anyɛ tsyɛ atɛ shɛnɛ ahɔɛ nɛ yɛedzini shù.

¹² Wɔnɔ bagɔgɔ mɛitseɖe kibui ɛlɛ ɔsɛ, (kɛlɛ xɔnɔ mɛɖɔ ɛlɛ, gɛnɛ Apaleteɛ) Onupɛ ɔhamɛ anɔ teli agbana adzɛ gɛetinu anɔ gɛ ayɛkɛ aŋã pɛ adɛmɛ sɛ abazã nɛ yɛɛ, atɛ shɛnɛ ahɔɛ nɛishu.

¹³ Kɛlɛ onupɛ adzɛ edzini anyɛ gɛetinu anɔ gɛ ayɛkɛ aŋã pɛ adɛmɛ asɛ abazã nɛ yɛ, atɛ shɛnɛ ahɔɛ nɛishu.

¹⁴ Ɔmɔsɛ yɛenyineɛ gɛ agɛ ayɛkɛ ŋãa, atɛmɔ ishu dadalɛ ɔgana yɛedzinì nabha, kana adzɛ tsyɛ gɛ agɛ yɛkɛ ŋã atɛmɔ ishu dadalɛ ɔgana yɛenyineɛ gɛ ayɛkɛ aŋã nabha. Onu gɛnɛ ana wɔnɔ eyi alɛ shu tɛba dalɛ, pɔ asɛ gɛ kɛlɛ ana, balɛ shu dalɛ.

¹⁵ Pɔ onupɛ anunɔ gɛ agɛ yɛkɛ aŋã pɛ asɛ ashɛɛ, nɔkɔ yɛagavɛ. Ɔsha gɛ nyã anyɛ nɛ adzɛ nɔnɔ gɛ ayɛkɛ aŋã nɛ ebui alɛ nɛidi mɛ, Owusoso Akaa ekulu lɔ́ sɛ tɛ bɔzã nɛishu yɔyɔ mɛ.

¹⁶ Anyɛ edzini, otinyi, ɔsɛ wɔ ɔbɔlà obu wɔenyineɛ dza? Kidzo ɛlɛ nabha wɔ adzɛ enyine tsyɛ otinyi ɔsɛ ɔbɔlà yɛkɛ woedziniɛ elu nɛ ɛkpãa dza?

¹⁷ Kɛkpasɛ kɛlɛ mɛ pɔ, anɔ ka nyia ka anyana ɔzãkɔ gɛ Apaleteɛ akpɛ ahɔɛ akɔɛ nɛ̀ kɛgɛ Owusoso Akaa ekulu yɛakɔ evunɔ. Ɔsha lɛ nabha mɛidzu ɔhaa petee tɔɖɔ.

¹⁸ Bebhui kɛhɔ̃a ɔkɔ anyɛ teli flogo pɛ bekulú yɛ dza? Eti dzí anɔ gɛ begi bhui kɛhɔ̃a akɔ. Anyɛ teli alɛ gɛ begi bhui kɛhɔ̃a akɔ yɛ flogo pɛ etsyina dza? Beteke bhui kɛhɔ̃a akɔɛ.

¹⁹ Kɛhɔ̃a bhui bhui tinu kɛdɔ̃ nanà, kɛhɔ̃a gɛ begi bhui tsyɛ itinu kɛdɔ̃ nanà. Owusoso Akaa ɔshaa nabha tɛbhɛ bhɛtɛ kɛlɛinu kɛgɛ pɛ ɔdɛ.

²⁰ Anɔ ka nyia ka azã kɛzãa gɛ azã flogo pɛ Owusoso Akaa ebekulú yɛ.

²¹ Anɔ dzidzi wɔonu flogo pɛ bekulú wɔ̀ dza? Tɛkɔ kɛkpɛ wɔ buluhũ, onupɛ edzi asɛ ɔbɔlá yɛkɛ wɔ ishu ahɔɛ mɛ zazãa, bhɛtɛ ana.

²² Ɔmɔsɛ anɔ gɛedzi anɔ dzidzì flogo pɛ Apaleteɛ ebekulú yɛ, enu Apaleteɛ yɛanɔ ishu ahɔɛmɛ azazã, kidzo ɛlɛ nabha anunɔ gɛ azã yɛishu ahɔɛmɛ flogo pɛ bekulu yɛ, edzì Kristo yɛanɔ dzidzi.

²³ Bedzi wɔnɔ nɛ̀ kedzì tieli, nɔoti tsyina odzi banɔ dzidzi ɔkɔ banɔdzyrame.

²⁴ Mɛ adzya alɛ, anɔka nyia ka, gɛ akpasɛ Owusoso Akaa mɛɛ, azã kɛgɛ kɛlɛ mɛ Owusoso Aka ekulu yɛakpɛ.

²⁵ Otsiɛ nɛ bubiteɛ gɛ betinyi anyɛ shuɔ, ɛgɛ yɛkɛ ɔsha nanà odenɔ Apaleteɛ ɔkɔ, pɔ ikulu kebhu asɛ anɔ gɛ denɔ Apaleteɛ ashagabui ɖiɖi mɛɛ bayɛkɛ yɛabha aŋã.

²⁶ Nɛ otsiɛ bɔtɔ lɛ shu soɔ, kɛba pɛ ɔkɔ wɔnɔ sɛ nɔzã asɛ gɛ nɔ ɔlɛ ana.

²⁷ Ɔgbana adzɛ dza? Nɔtɛ shɛnɛ ahɔɛ nɛ bagɔlɔ shu. Odzi nɛ kɛgbàa dza? Tɛ pɛɛ adzɛ sɛ tɛ̀ ɔgbanà.

²⁸ Pɔ edzi asɛ onupɛ ɔtɛ gbana adzɛɛ, ɔgɛ bhɛtɛ kibui kpa, kɛlɛ onupɛ kebiteɛ gɛ etinyi anyɛ pɛ azana anyɛɛ, agɛ bhɛtɛ kibui kpa. Pɔ ba agɛ bagbana bagɔlɔ babamɔ bɔtɔ nɛ ɛkpã ɛlɛ mɛ, kɛlɛ ɛtɛpɛɛ sɛ ebui alɛ aba wɔnɔ abha.

²⁹ Mɛ adzyaa alɛ, kɛgɛ mɛɖɔ kɛlɛinu ɔsɛ, kibeɛ dzi gulũi. Denɔ otsiɛ ɔvɛnɔ, bagɛ bagbana adzɛ bazã asɛ gɛ adzɛ ama balɛ ahɔɛ ana,

³⁰ bagɛ ebieyio, asɛ betie bi, bagɛ amɔ sameɛ, asɛ batiamɔ same, bagɛ edzi kɛdɔ̃ tiliɛ, asɛ kitinu balɛ kɛdɔ̃ babalɛ́,

³¹ bagɛ balawɔa kanɔ alɛ mɛ bɔdɔ̃ shu axɔ̃ɛ, asɛ gɛ onupɛ butinu kɛdɔ̃ nanà akɔ alɛ. Ɔmɔsɛ kanɔ alɛ mɛ asɛ gɛ kalɛ otsiɛ nɔ ulũ fala.

³² Ɛpɛ sɛ tɛ wɔnɔ etúɔ mɛ adɔ fɔ̃ɔ nɛ kɛka nyia ka shu. Anyɛ nɔnɔ gɛ agɛ gbana adzɛɛ alɔkɔ̀ tili nɛ Apaleteɛ ebui mɛ, nɛ kɛdɛmɛ gɛ abadɛmɛ nɔ nɛ̀ Apaleteɛ.

³³ Pɔ anyɛ gɛ agbana adzɛ xɔnɔ yɛebui tɔtɔɖɔ bazã kanɔ nɔ̀ mɛ ebuiɛ shu, nɛ kana gɛ ebekù yɛedzini awɔ̃

³⁴ kɛgɛ kɔ yɛamɔ sameɛ bagã ɔtɔ. Kebite nɔnɔ gɛ aka zana anyɛ, alɔkɔ tili nɛ Apaleteɛ ebui mɛ, Yɛ tɛtɔtɔɖɔ kɛlɛinu ɔsɛ tɛ̀ alɔkɔ yɛishu ashɔ akpɛ Apaleteɛ mɛ nɛ ishupi nɛ̀ ɔfɔfuĩa mɛ. Pɔ anyɛedzini xɔnɔ yɛebuitɔtɔɖɔ bazã kanɔ alɛ mɛ ebuiɛ shu-kana gɛ ebekù yɛinyine awɔ.

³⁵ Ɛɖɔ ebui alɛ akɔ wɔnɔ tɛpɛpɛ̃, anɛ sɛ tɛ̀ itsodzi wɔnɔ, pɔ sɛ tɛ̀ nɔzã nɛ kidzo gbangbãa gɛ kɛgɛ gã ɔtɔ nɛ Apaleteɛ mɛ zazã shu.

³⁶ Onupɛ abhɛtɛ anyɛ teli ɔsɛ atɛ alà agã nɛ kebiteɛ gɛ akpɛ bulũwɔa akɔ asɛ tɛ̀ agbanà shuɔ, pɛ adzɛ agɔ pɔ eekpè atɔɖɔ gɛ apɛasɛ tɛ agbanà adzɛɛ, abhɛtɛ asɛ kana gɛ apɛ nɔ. Agɛ abhɛtɛ kibui kpá. Bagbana bagɔlɔ.

³⁷ Pɔ anyɛ gɛ atɔɖɔ ahɔɛ nɛ ebui alɛ abha nɛ yɛ ekpeɖekpeɖe mɛ, pɛ gɛnɛ ananà yɛatɔɖɔ kɛlɛ akɔɛ sɛ abhɛtɛ pɔ nɛ yɛahɔɛ tɛpɛpɛ̃ ulũɔ, pɛ abhɛtɛ yɛ ekpeɖekpeɖe mɛ sɛ atɛ agbana kebite alɛ, anyɛ alɛ tsyɛ abhɛtɛ kibui gɛ kɛlɛ ɛlɛ ɔzãkɔ.

³⁸ Klisoɔ, anunɔ gɛ yɛagbana kebiteɛ abhɛtɛ piapii, pɔ anunɔ gɛ agɛ gbana kebiteɛ abhɛtɛ kɛgɛ pɛ̃ ɔdɛ.

³⁹ Ɔsha ɔnyã adzɛ nɛ yɛenyine shu nɛ kibeɛ gɛ anyɛ alɛ nɛ ɛkpã. Pɔ onupɛ yɛenyine etsiɛ xɔnɔ, ɔsha ɔkɔ kidzo sɛ tɛ̀ azãna anyɛ nɔnɔ gɛ yɛibui zã yɛuliɛ, pɔ kɛlɛ sɛ anyɛ azã Apaleteɛ mɛ.

⁴⁰ Nɛ mɛ bɔdɔ̃ mɔmɔ ulũɔ, same ebekù yɛ ɔdɛ gɛ onupɛ awɔ kɛgba, kɛlɛ ɛmɔ ɔsɛ Owusoso Akaa Ɔfɔfuĩa nɔ ɔlɛ otsiɖi mɛ tsyɛ abha.

« Previous

Swiv nou:

Lyen patwone

Piblisite